មិនពិបាកឡើយ! បែកញើសខ្លាំង ចង់ទប់ស្កាត់កុំរំលងអត្ថបទនេះ

ការបែកញើស គឺជាប្រតិកម្មទូទៅមួយរបស់រាងកាយតបតនឹងកម្ដៅ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ហើយការបែកញើសច្រើននៅពេលធ្វើសកម្មភាពរាងកាយ ឬហាត់ប្រាណខ្លាំងក៏មិនមែនជារឿងចម្លែកអ្វីដែរ។ ទោះជាយ៉ាងណាការបែកញើសខ្លាំងសូម្បីតែពេលអង្គុយធម្មតាសោះអាចជារឿងគួរឱ្យអាម៉ាសបំផុតមួយ។ គួរធ្វើបែបណា? ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗទប់ទល់បញ្ហាបែកញើសខ្លាំង ៖

១. ចៀសវាងទទួលទានភេសជ្ជៈកាហ្វេអ៊ីននិងគ្រឿងស្រវឹង

ក៏ព្រោះតែកាហ្វេអ៊ីនបង្កការរំញោចដល់ក្រពេញញើសនោះ ចូរអ្នកជៀសវាងទទួលទានកាហ្វេសូម្បីតែមួយពែង ឬភេសជ្ជៈដទៃទៀតដែលមានផ្ទុកជាតិកាហ្វេអ៊ីននៅរយៈពេលប៉ុន្មានម៉ោងមុនពេលចូលគេង។ ជាពិសេសប្រសិនបើអ្នកឆាប់ប្រតិកម្មទៅនឹងជាតិកាហ្វេអ៊ីនទៀតនោះ ចូរជៀសវាងការទទួលទានភេសជ្ជៈកាហ្វេអ៊ីន ឬកាហ្វេពី ៥ ទៅ ៦ ម៉ោងមុនពេលចូលគេង។ ហើយចំពោះគ្រឿងស្រវឹងវិញ ប្រសិនបើអ្នកគិតថាការទទួលទានគ្រឿងស្រវឹងអាចជួយឱ្យអ្នកឈប់ខ្វល់ខ្វាយពីបញ្ហាបែកញើសពេលយប់នោះ ចូរគិតម្ដងទៀត! នោះក៏ព្រោះតែជាតិអាល់កុលធ្វើឱ្យសសៃឈាមរីកធំជិតស្បែកដែលអាចធ្វើឱ្យអ្នកមានអារម្មណ៍ក្ដៅពេញខ្លួន និងបែកញើសកាន់តែច្រើន។

២. ងូតទឹកត្រជាក់

ធ្លាប់ដឹងទេថាការងូតទឹកត្រជាក់ក៏ជួយកាត់បន្ថយការបែកញើសហួសប្រមាណផងដែរ។ រួមបញ្ចូលទាំងការប្រើប្រាស់សាប៊ូដុសខ្លួនកម្ចាត់បាក់តេរីនោះកាន់តែប្រសើរដោយបាក់តេរីជាប់ស្បែកត្រូវបានកម្ចាត់ ហើយក្លិនខ្លួនមិនល្អក៏ត្រូវបានកាត់បន្ថយ។

៣. ស្លៀកសម្លៀកបំពេករលុងៗ

គន្លឹះដ៏ងាយបំផុតមួយទៀតដើម្បីដោះស្រាយទប់ស្កាត់បញ្ហាបែកញើសខ្លាំង គឺការជ្រើសរើសស្លៀកសម្លៀកបំពាក់រលុងៗងាយឱ្យខ្យល់ចេញចូលប៉ះស្បែក។

៤. ចៀសវាងទទួលទានអាហារហឹរ

ដើម្បីដោះស្រាយបញ្ហាបែកញើស អ្នកគួរជៀសវាងទទួលទាននូវអាហារ ឬភេសជ្ជៈអ្វីដែលបង្កើនសីតុណ្ហភាពក្នុងរាងកាយដូចជាអ្វីដែលក្ដៅ ឬហឹរ។

៥. ប្រើប្រាស់ផលិតផលលាបក្លៀកបំបាត់ក្លិន

ក្រពេញញើសមិនសកម្មខ្លាំងនៅពេលយប់ឡើយ ដូច្នេះអ្នកគួរប្រើប្រាស់ផលិតផលលាបក្លៀកកំឡុងពេលនេះទើបប្រសើរ។

៦. ទទួលទានទឹកឱ្យបានច្រើន

ប្រសិនបើអ្នកបញ្ឈប់ការបែកញើសហួសប្រមាណ អ្នកគួរទទួលទានទឹកឱ្យបានច្រើនគ្រប់គ្រាន់។ នៅពេលទទួលទានទឹកគ្រប់គ្រាន់ជាប្រចាំ រាងកាយនឹងចុះត្រជាក់ហើយអ្នកមិនមានអារម្មណ៍ថាក្ដៅពេកឡើយ។ អ្វីដែលសំខាន់ទៀតនោះ គឺជាតិពុលផ្សេងៗក៏ត្រូវបានកម្ចាត់ចេញពីរាងកាយល្អចំពោះសុខភាពទាំងមូលផងដែរ។

៧. ហាត់យូហ្កា

ភាគច្រើននៃពួកយើងប្រហែលជាមិនធ្លាប់ដឹងទេថាការហាត់យូហ្កាអាចជួយទប់ទល់អាការៈបែកញើសខ្លាំង។ ការធ្វើលំហាត់ប្រាណ គឺមិនត្រឹមតែល្អសម្រាប់សាច់ដុំនិងភាពបត់បែនប៉ុណ្ណោះទេ ប៉ុន្តែក៏ជួយសម្រួលដល់ការដកដង្ហើមឱ្យបានត្រឹមត្រូវ ព្រមទាំងធ្វើឱ្យស្ងប់អារម្មណ៍។ ជាលទ្ធផលអ្នកអាចរក្សាសុខភាពសសៃប្រសាទកាត់បន្ថយបរិមាណនៃការផលិតញើស៕