អាហារក៏ជះឥទ្ធិពលលើសុខភាពស្បែកគួរឱ្យកត់សម្គាល់ផងដែរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើអាហារនិងភេសជ្ជៈអ្វីខ្លះជួយឱ្យស្បែកស្រស់ថ្លាស្អាតបែបធម្មជាតិ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារនិងភេស្ជជៈទាំងនោះ ៖
១. ត្រីសម្បូរខ្លាញ់
ជាប្រភពដ៏ប្រសើរបំផុតមួយនៃអាស៊ីតខ្លាញ់អូមេហ្កា ៣។ ត្រីសម្បូរខ្លាញ់ក៏មានផ្ទុកសម្បូរទៅដោយប្រូតេអ៊ីន ប៉ុន្តែខ្លាញ់មិនល្អនិងជាតិសូដ្យូមទាបដែលល្អសម្រាប់សុខភាពស្បែកស្រស់ថ្លាស្អាត។ ការទទួលទានត្រីសម្បូរខ្លាញ់ជួយរក្សាសំណើមស្បែកពីខាងក្នុងទប់ស្កាត់ភាពការលេចឡើងនូវស្នាមជ្រីវជ្រួញ។
២. សាច់ក្រហម
ភាគច្រើននៃពួកយើងគិតថាការទទួលទានបន្លែផ្លែឈើ គឺល្អសម្រាប់រក្សាសុខភាពនិងសម្រស់។ ទោះជាយ៉ាងណារាងកាយត្រូវការរបបអាហារតុល្យភាពដែលមានអាហារគ្រប់ក្រុម។ នេះមានន័យថារាងកាយក៏ត្រូវការសាច់ក្រហមក្នុងកម្រិតត្រឹមត្រូវមួយសម្រាប់រក្សាសាច់ដុំ ដោយការទទួលទានច្រើនពេកអាចបង្កផលប៉ះពាល់វិញ។ សាច់ក្រហមមានផ្ទុកសម្បូរទៅដោយជាតិដែកដែលជួយទប់ស្កាត់ជំងឺខ្វះគ្រាប់ឈាមក្រហមដោយកង្វះជាតិដែក។ ជំងឺនេះអាចបន្ថយគ្រាប់ឈាមក្រហមដែលជាស្ថានភាពមួយជះឥទ្ធិពលដល់ភាពស្រស់ស្អាតនៃស្បែកដែលនាំឱ្យមានថ្នក់ក្រោមភ្នែក ហើយស្បែកប្រែជាស្លេកស្លាំង។
៣. បន្លែបៃតង
ក្រៅពីមានផ្ទុកសម្បូរទៅដោយសារធាតុប្រឆាំងអុកស៊ីតកម្ម បន្លែបៃតងក៏ជាប្រភពដ៏ល្អបំផុតនៃជាតិរ៉ែ ព្រមទាំងវីតាមីនសំខាន់ៗរួមបញ្ចូលទាំងវីតាមីន E និងវីតាមីន D ដែលចាំបាច់សម្រាប់ការផលិតនិងបង្កើតកោសិកាស្បែកឡើងវិញ។ ដូច្នេះកុំភ្លេចរួមបញ្ចូលបន្លែក្នុងរបបអាហារប្រចាំថ្ងៃ។
៤. គ្រាប់ធញ្ញជាតិនិងគ្រាប់ពូជ
ក៏ជាប្រភពដ៏ប្រសើរនៃអាស៊ីតខ្លាញ់អូមេហ្កា ៣ និងអូមេហ្កា ៦ ដែលជួយស្បែកផលិតជាតិប្រេងដើម្បីរក្សាសំណើមទប់ស្កាត់បញ្ហាស្បែកស្ងួត។ មិនត្រឹមតែស្បែកប៉ុណ្ណោះទេ ប៉ុន្តែការទទួលទានគ្រាប់ធញ្ញជាតិនិងគ្រាប់ពូជក៏ល្អសម្រាប់ផ្នែកផ្សេងទៀតនៃរាងកាយផងដែរ។ អាស៊ីតខ្លាញ់ចាំបាច់ហៅថាអាស៊ីតអាមីណូក្នុងគ្រាប់ធញ្ញជាតិនិងគ្រាប់ពូជជួយទប់ស្កាត់ហានិភ័យនៃជំងឺផ្សេងៗ រួមបញ្ចូលទាំងជំងឺបេះដូង ក៏ដូចជាជំងឺដទៃទៀតដែលពាក់ព័ន្ធនឹងប្រព័ន្ធសសៃឈាមបេះដូង។ ទោះជាយ៉ាងណាមិនគួរទទួលទានច្រើនជាងមួយក្ដាប់ដៃក្នុងមួយថ្ងៃឡើយ។
៥. ផ្លែឈើប្រភេទ Citrus
រួមមានផ្លែក្រូច ទំពាំងបាយជូរ ក្រូចឆ្មារជាដើមមានផ្ទុកសម្បូរទៅដោយវីតាមីន C។ វីតាមីននេះជាសារធាតុប្រឆាំងអុកស៊ីតកម្មខ្លាំងក្លាបំផុតមួយដែលមិនត្រឹមតែជួយពង្រឹងប្រព័ន្ធភាពស៊ាំរាងកាយប៉ុណ្ណោះទេ ប៉ុន្តែក៏ចាំបាច់សម្រាប់សុខភាពស្បែកផងដែរ។ សម្រាប់អ្នកដែលចង់ឱ្យស្បែកសស្រស់ស្អាតជាងមុនកុំភ្លេចរួមបញ្ចូលផ្លែឈើប្រភេទ Citrus ក្នុងរបបអាហារប្រចាំថ្ងៃ។
៦. រមៀត
មានផ្ទុកលក្ខណៈសម្បត្តិប្រឆាំងការរលាកជួយរក្សាកោសិកាស្បែកប្រឆាំងរ៉ាឌីកាល់សេរី និងធ្វើឱ្យស្បែកទន់រលោងស្រស់ថ្លាពីខាងក្នុង។ ក្រៅពីរួមបញ្ចូលក្នុងរបបអាហារ អ្នកអាចទទួលទានម្សៅរមៀត ឬរមៀតម៉ដ្ឋជាមួយទឹកក្ដៅឧណ្ហៗ ឬទឹកដោះគោ។
៧. ចេក
ផ្លែឈើនេះជាប្រភពដ៏ប្រសើរនៃវីតាមីននិងជាតិរ៉ែសំខាន់ៗរួមមាន B6 អាស៊ីតហ្វូលិក និងប៉ូតាស្យូមជាដើមដែលមិនត្រឹមតែជួយផ្ដល់សារធាតុចិញ្ចឹមដល់ស្បែក ហើយរក្សាសំណើម និងភាពទន់រលោងនៃស្បែកទប់ស្កាត់ព្យាបាលស្បែកស្ងួតប៉ុណ្ណោះទេ ប៉ុន្តែថែមទាំងបង្កើនបរិមាណនៃលំហូរឈាមក្នុងខួរក្បាលល្អសម្រាប់សុខភាពខួរក្បាលផងដែរ។
៨. ទំពាំងបាយជូរ
ផ្លែឈើនេះល្អចំពោះទាំងសុខភាពរាងកាយនិងសម្រស់។ ការទទួលទានផ្លែទំពាំងបាយជូរជួយសម្អាតឈាមនិងធ្វើឱ្យស្បែកមានសំណើមស្រស់ថ្លាមិនស្រអាប់។ សារធាតុ polyphenols ក្នុងគ្រាប់ទំពាំងបាយជូរជួយការពារស្បែកមិនឱ្យទទួលរងការបំផ្លាញពីសំណាក់រ៉ាឌីកាល់សេរីនិងពន្យឺតដំណើរការនៃភាពចាស់តាមវ័យ៕