ការស្រាវជ្រាវថ្មីមួយបាននិយាយថា ការបំបៅកូនដោយទឹកដោះគឺជារឿងល្អមួយចំពោះខួរក្បាលរបស់កុមារ។អ្នកស្រាវជ្រាវបានប្រើប្រាស់ការថត MRI ដើម្បីពិនិត្យលើការលូតលាស់ខួរក្បាលកុមារ ១៣៣នាក់ដែលមានអាយុចន្លោះពី១០ខែ ទៅ៤ឆ្នាំ។ នៅអាយុ២ឆ្នាំ, កុមារដែលបៅទឹកដោះម្តាយយ៉ាងហោចណាស់៣ខែ មានកម្រិតនៃការវិវត្តល្អនៅផ្នែកសំខាន់នៃខួរក្បាលជាងកុមារដែលបៅដោយទឹកដោះគោ ឬបៅទឹកដោះគោផង និងទឹកដោះម្តាយផង។
ការលូតលាស់បន្ថែមគឺឃើញមានច្រើននៅផ្នែកដទៃទៀតនៃខួរក្បាលដែលមានដូចជា ភាសា, មុខងារនៃអារម្មណ៍ និងជំនាញនៃការគិត, នេះបើយោងតាមការស្រាវជ្រាវដែលត្រូវបានចេញផ្សាយនៅក្នុងកាសែត NeuroImage។ស៊ាន ដេអូនី (Sean Deoni) ជាសាស្ត្រាចារ្យរងនៅសាកលវិទ្យាល័យ Brown បាននិយាយថា យើងកំពុងស្វែងរកពីភាពរវាងការលូតលាស់នេះចំពោះកុមារដែលបៅទឹកដោះម្តាយ និងកុមារដែលបៅទឹកដោះគោ។
បន្ថែមពីលើការថតខួរក្បាល, អ្នកស្រាវជ្រាវបានផ្តល់នូវតេស្តដល់កុមារធំដែលពាក់ព័ន្ធនឹងសមត្ថភាពនៃការគិត និងបានរកឃើញពីការកើនឡើងនៃជំនាញនៃភាសា និងជំនាញនៃចលនា ហើយកើនឡើងចក្ខុវិញាណចំពោះកុមារដែលបៅដោះម្តាយ។អ្នកស្រាវជ្រាវក៏បានរកឃើញថា កុមារដែលបៅទឹកដោះម្តាយលើសពីមួយឆ្នាំ មានភាពលូតលាស់នៃមុខងារខួរក្បាលប្រសើរជាងកុមារដែលបៅទឹកដោះម្តាយតិចជាងមួយឆ្នាំ ជាពិសេសត្រង់តំបន់នៃខួរក្បាលដែលគ្រប់គ្រងចលនា។
ដេអូនីបាននិយាយថា នេះមិនមែនជាការស្រាវជ្រាវលើកដំបូងដែលបង្ហាញថា ការបំបៅកូនដោយទឹកដោះម្តាយជួយការវិវត្តនៃខួរក្បាលរបស់កុមារនោះទេ ប៉ុន្តែវាជាការស្រាវជ្រាវលើរូបភាពវេជ្ជសាស្ត្រដំបូងដើម្បីពិនិត្យលើភាពខុសប្លែកគ្នានៃខួរក្បាលរបស់កុមារតូចៗ និងកុមារដែលមានសុខភាពល្អដែលទាក់ទងនឹងការបំបៅកូនដោយទឹកដោះម្តាយ។គាត់បានបន្តថា យើងចង់ឃើញថាតើការប្រែប្រួលទាំងនេះចំពោះការលូតលាស់ខួរក្បាលកើតឡើងយ៉ាងពិតប្រាកដ។ ការស្រាវជ្រាវនេះបង្ហាញអោយកាន់តែច្បាស់ថា ការបំបៅកូនដោយទឹកដោះគឺជារឿងល្អចំពោះខួរក្បាលកុមារ៕