ជាថ្មីម្តងទៀត មានបងប្អូនស្ត្រីយើងម្នាក់ គាត់បានសួរខ្ញុំតាមរយៈទំព័រ Facebook Page ទាក់ទងនឹងបញ្ហារបស់គាត់។ ក្រោយពីអាន ក៏ដូចជាឆ្លើយជូនគាត់រួចមក ខ្ញុំយល់ថា សំណួរមួយនេះទំនងជាសំខាន់សម្រាប់ចំណេះដឹងទូទៅ ដូច្នេះ ខ្ញុំក៏សម្រេចចិត្តយកវា មកបកស្រាយឲ្យកាន់តែច្បាស់លាស់បន្តិចតែម្តងទៅ។
គាត់បានសរសេរថា “ជម្រាបសួរបង ខ្ញុំអាយុ ៣៥ឆ្នាំ ហើយ ធ្លាប់មានទម្ងន់ (ផ្ទៃពោះ) ២ដងរួចហើយ តែធ្លាក់រហូត ទោះបីជាញ៉ាំថ្នាំរក្សាគ៌ ហើយក៏មិននៅដែរ។ តើខ្ញុំត្រូវធ្វើដូចម្តេច ទើបកុំឲ្យមានបញ្ហាបែបនេះទៀត?”
លើលោកនេះ មិនមានស្ត្រីមានផ្ទៃពោះណា ម្នាក់ចង់ឲ្យកូនរបស់ខ្លួន ដែលមិនទាន់នឹងបានឃើញពន្លឺថ្ងៃផង ស្លាប់ទៅវិញនោះទេ។ ចំពោះបញ្ហាដែលនាំឲ្យកូនរលូតនោះ ភាគច្រើន ទាក់ទងនឹងបញ្ហាម្តាយផ្ទាល់តែម្តងដូចជា ម្តាយអាចនឹងមានជំងឺជាប់ខ្លួន ជាពិសេសជំងឺកាមរោគ ឬជំងឺស្អូចជាដើម ព្រោះថាជំងឺនេះ អាចនឹងកើតមានបាន ដោយមិនមានរោគសញ្ញាអ្វីសម្គាល់ដឹងឡើយ ក្នុងដំណាក់កាលដំបូង។ ដូច្នេះ បើសិនជាដំណាក់កាលមួយនេះ បែរជាមានផ្ទៃពោះទៀត កូនពិតជាមិនអាចនៅបានឡើយ។
មួយវិញទៀត ទាកទងនឹងរបបអាហារ និងការចាក់ថ្នាំបង្ការ។ ក្នុងការផ្សាយពាណិជ្ជកម្មក្នុងទូរទស្សន៍ស្រុកយើង ភាគច្រើន ក៏មានបង្ហាញអំពីរឿងដែលស្ត្រីមានផ្ទៃពោះភ្លាមៗ ត្រូវធ្វើដូចជា ការចាក់ថ្នាំបង្ការ ប្រើថ្នាំរក្សាគភ៌ និងញ៉ាំរបបអាហារឲ្យបានត្រឹមត្រូវ ជាពិសេស ត្រូវចៀសវាងអាហារដែលហាមប្រាម ដូចជាគ្រឿងស្រវឹង និងការជក់បារីជាដើម។
ការដែលមានដុំសាច់ក្នុងស្បូន ក៏អាចជាហេតុផលមួយ ធ្វើឲ្យកូនមិនអាចនៅបានដែរ។ ដុំសាច់មួយនេះហៅថា Fibroma។ ភាគច្រើនដុំសាច់ប្រភេទនេះ កម្រនឹងធ្វើឲ្យរលូតកូនណាស់ ប៉ុន្តែ បើសិនជាវាកើតមាន ក្នុងក្រោមភ្នាសស្បូនវិញនោះ វាពិតជាអាចធ្វើឲ្យកូនរលូតបាន។
ករណីមួយទៀតគឺ ទម្រង់ស្បូនរបស់មនុស្សស្រី គឺមិនអាចរក្សាកូនបានតែម្តង។ ទោះបីជាករណីបែបនេះ កម្រនឹងកើតមានលើស្ត្រីភាគច្រើនក៏ដោយ ប៉ុន្តែ វាក៏ជាដើមហេតុមួយផងដែរ ជាក់ស្តែង ដូចជា មានសន្ទះកណ្តាលនៅក្នុងស្បូនជាដើម។
ដូច្នេះសរុបមក បើសិនជាយើងចង់បានកូន ដ៏មានសុខភាពល្អមែន សូមចៀសវាងការបណ្តោយតាមយថាកម្ម។ មានន័យថា មានក៏បានអត់ក៏បាន ឬហៅថាយកដោយចៃដន្យ។ យើងគួរតែមានគម្រោងណាមួយឲ្យប្រាកដ ក្រោយពីរៀបការរួច។ ឧទាហរណ៍ អាចគិតថា ពីរឆ្នាំក្រោយចាំយក ដូច្នេះ អ្វីដែលអាចធ្វើបានទាំងប្តី និងប្រពន្ធ ត្រូវទៅឲ្យពេទ្យពិនិត្យសុខភាពសិនថា អ្នកទាំងពីរពិតជាមានសុខភាពល្អបរិបូរណ៍ និងស័ក្តិសមនឹងមានផ្ទៃពោះហើយ។ ការធ្វើតេស្តនេះ អាចមានជាការពិនិត្យឈាម និងការថតអេកូ ដើម្បីពិនិត្យទៅលើស្បូនស្ត្រីជាដើម៕
