​ការសិក្សា​ថ្មី​មួយ​ណែនាំ​ថា មិត្ត​ជិតស្និទ្ធ​អាច​ជួយ​កុមារ​ប្រឈមមុខ​នឹង​បទពិសោធន៍​អវិជ្ជមាន​។​

​ ​សាស្ត្រាចារ្យ​ចិត្តសាស្ត្រ វីលៀម ប៊ូ​កូ​ស្គី (William Bukowski) និយាយថា “​ការ​មាន​មិត្ត​ជិតស្និទ្ធ​មាន​វត្តមាន​ក្នុង​ពេល​ព្រឹត្តិការណ៍​មិន​ល្អ​កើតឡើង​មាន​ឥទ្ធិពល​ភ្លាមៗ​ទៅលើ​រាង្គ​កាយ​និង​គំនិត​របស់​កុមារ​។ ប្រសិនបើ​កុមារ​នៅ​ម្នាក់ឯង​នៅពេលដែល​ពួកគេ​ជួប​នឹង​បញ្ហា​ជាមួយ​គ្រូ​ឬ​ជម្លោះ​ផ្សេងៗ​ជាមួយ​មិត្ត​រួម​ថ្នាក់ យើង​មើលឃើញ​ថា​មាន​ការកើនឡើង​នៃ​កម្រិត​អរ​ម៉ូ​ន cortisol និង​ការធ្លាក់ចុះ​នៃ​អារម្មណ៍​ថា​ខ្លួនឯង​មានតម្លៃ​”​។​

​ ​ក្រុម​អ្នកស្រាវជ្រាវ​បាន​សួរ​ក្មេងប្រុស ៥៥​នាក់ និង​ក្មេង​ស្រី ៤៨​នាក់ ដែល​រៀន​ថ្នាក់​ទី ៥ និង​ទី ៦ ដើម្បី​កត់ត្រា​អារម្មណ៍​និង​បទពិសោធន៍​របស់​ពួកគេ​រយៈពេល ៤​ថ្ងៃ​។ កម្រិត cortisol (​អរ​ម៉ូ​ន​ស្ត្រេ​ស​) របស់​កុមារ ក៏​ត្រូវ​បាន​ពិនិត្យ​មើល​ជា​ប្រចាំ​តាម​រយៈ​ការ​ធ្វើ​តេស្ត​ទឹកមាត់​។​

​ ​ការសិក្សា​បាន​រកឃើញថា កម្រិត cortisol បាន​កើនឡើង​និង​ការឱ្យ​តម្លៃ​លើ​ខ្លួនឯង​ធ្លាក់ចុះ នៅពេល​ដែល​កុមារ​ជួបប្រទះ​នឹង​បទពិសោធន៍​អវិជ្ជមាន​។ ប៉ុន្តែ​ប្រសិនបើ​មាន​វត្តមាន​មិត្ត​ជិតស្និទ្ធ​របស់គេ​នៅពេលដែល​មាន​បញ្ហា កម្រិត cortisol និង​អារម្មណ៍​នៃ​ការឱ្យ​តម្លៃ​លើ​ខ្លួនឯង​ប្រែប្រួល​តិចតួច​តែប៉ុណ្ណោះ​។​

​ ​ក្រុម​អ្នកស្រាវជ្រាវ​បាន​សម្គាល់​ថា​អ្វី​ដែល​កើតឡើង​ក្នុង​វ័យ​កុមារ​អាច​មាន​ឥទ្ធិពល​នៅក្នុង​វ័យ​ជំទង់ រួម​ទាំង​ការ​មាន​អារម្មណ៍​នៃ​ការឱ្យ​តម្លៃ​ខ្លួន​ទាប​ផង​ដែរ​។​

​ ​សាស្ត្រាចារ្យ ប៊ូ​កូ​ស្គី បាន​ពន្យល់ថា “​ប្រតិកម្ម​សរីរសាស្ត្រ​និង​ចិត្តសាស្ត្រ​របស់​យើង​ទៅលើ​បទ​ពិសោធន៍​អវិជ្ជមាន​ក្នុង​វ័យ​កុមារ​មាន​ឥទ្ធិពល​ទៅលើ​ជីវិត​នៅ​ថ្ងៃ​អនាគត​។ កម្រិត​លើស​នៃ​អរ​ម៉ូ​ន cortisol ច្រើនពេក អាច​បង្ករ​ឱ្យ​មាន​ការប្រែប្រួល​ផ្នែក​សរីរសាស្ត្រ រួម​ទាំង​ការ​សង្កត់​លើ​ប្រព័ន្ធ​ភាព​ស៊ាំ និង​ការធ្លាក់ចុះ​នៃ​ការកកើត​នៃ​ឆ្អឹង​។ ការកើនឡើង​នៃ​ភាព​តានតឹង អាច​កាត់បន្ថយ​ការវិវត្តន៍​របស់​កុមារ​”​។​

​ ​ក្រុម​អ្នកស្រាវជ្រាវ​និយាយថា ការសិក្សា​ពី​មុន​ក៏​បាន​រកឃើញ​ថា​ការ​មាន​ទំនាក់ទំនង​មិត្តភក្តិ​អាចជួយ​ការពារ​ពី​ការ​សម្លុត​គំរាមកំហែង ការ​មិន​ឱ្យ​ចូលរួម​ក្នុង​ក្រុម និង​ទម្រង់​នៃ​ការរំលោភ​បំពាន​ផ្សេងទៀត​។​