ការសិក្សាថ្មីមួយណែនាំថា ការប្រើកម្មវិធីបណ្តាញសង្គម ហ្វេសប៊ុគ (Facebook) អាចជាកត្តាមិនល្អចំពោះអ្នកដែលមានជំនឿចិត្តលើខ្លួនឯងទាប។
ក្រុមអ្នកស្រាវជ្រាវកាណាដាបានរកឃើញថាអ្នកដែលមានជំនឿចិត្តលើខ្លួនឯងទាបចែកចាយពត៌មានអវិជ្ជមានពីជីវិតរបស់ពួកគេជាមួយមិត្តភក្តិក្នុងហ្វេសប៊ុគដែលធ្វើឱ្យពួកគេកាន់តែមិនគួរឱ្យចូលចិត្ត។
មនុស្សជាច្រើនដែលមានជំនឿចិត្តទាបលើខ្លួនឯងមិនមានអារម្មណ៍ថាចង់ចែករំលែកគំនិតនិងអារម្មណ៍របស់ខ្លួនចំពោះមុខមនុស្សផ្ទាល់នោះទេ ប៉ុន្តែហ្វេសប៊ុគអាចឱ្យពួកគេនិយាយពីគំនិតនិងអារម្មណ៍របស់ពួកគេបាន។
អ្នកដឹកនាំការសិក្សា អាមេនដា ហ្វររ៉េស (Amanda Forest) និយាយថា “យើងមានគំនិតថាហ្វេសប៊ុគគឺជាកន្លែងមួយដ៏ល្អសម្រាប់ពង្រឹងទំនាក់ទំនងរបស់ពួកគេ”។
ខណៈដែលអ្នកដែលមានជំនឿចិត្តទាបលើខ្លួនឯងមានអារម្មណ៍ថាវាគឺជាកន្លែងដែលមានសុវត្ថិភាពក្នុងការបង្ហាញពីរឿងផ្ទាល់ខ្លួន ប៉ុន្តែការធ្វើបែបនេះគឺជាគ្រោះថ្នាក់ក្នុងសង្គមទៅវិញ។
គាត់បន្តថា “ប្រសិនបើអ្នកកំពុងនិយាយជាមួយនរណាម្នាក់ដោយជួបផ្ទាល់ ហើយអ្នកនិយាយពីរឿងអ្វីមួយ អ្នកប្រហែលជាអាចទទួលបាននូវសញ្ញាមួយចំនួនដែលបង្ហាញថាគេមិនចូលចិត្តពីប្រធានបទនោះ ឬគេមិនចូលចិត្តក្នុងការស្តាប់ពីភាពអវិជ្ជមានរបស់អ្នក”។
ប៉ុន្តែនៅពេលដែលមនុស្សម្នាក់មានអារម្មណ៍អវិជ្ជមានទៅលើអ្វីមួយនៅលើហ្វេសប៊ុគ គេបែរជារក្សាវាទុកក្នុងចិត្តទៅវិញ។
គាត់និយាយថា “ក្នុងហ្វេសប៊ុគ ភាគច្រើនអ្នកមិនបានមើលឃើញពីប្រតិកម្មរបស់អ្នកដទៃនោះទេ”។