​ការសិក្សា​ថ្មី​មួយ​ដាស់តឿន​ថា ស្ត្រី​ដែល​លើស​ទម្ងន់​និង​ជក់បារី​ក្នុងពេល​មានគភ៌​អាច​បំផ្លាញ​ការវិវត្តន៍​បេះដូង​របស់​ទារក​ពួកគេ​។​

​ ​ក្រុម​អ្នកស្រាវជ្រាវ​ហុឡង់​បាន​ពិនិត្យ​មើលគ​ត៌​និង​ទារក​ជិត ៨០០​នាក់ ដែល​មាន​បញ្ហា​បេះដូង​ដែល​បណ្តាល​មក​ពី​ខូច​ទ្រង់ទ្រាយ​ពី​កំណើត ប៉ុន្តែ​មិន​មាន​ការ​ខូច​ទ្រង់ទ្រាយ​ពី​កំណើត​ផ្សេង​ទៀត​នោះ​ទេ នៅ​ចន្លោះ​ឆ្នាំ ១៩៩៧ ដល់ ២០០៨​។ ក្រុម​នេះ​បាន​ប្រៀបធៀប​ជាមួយនឹង​គភ៌​និង​ទារ​កជាង ៣០០​នាក់​ទៀត ដែល​មាន​ភាពមិនប្រក្រតី​នៃ​ក្រូម៉ូសូម ប៉ុន្តែ​មិន​មាន​បញ្ហា​បេះដូង​នោះ​ទេ​។​

​ ​លទ្ធផល​បាន​បង្ហាញថា ស្ត្រី​ដែល​លើស​ទម្ងន់ (BMI យ៉ាងតិច ២៥) និង​ជក់បារី ក្នុងពេល​មាន​គភ៌ មាន​អត្រា​ងាយ​នឹង​មាន​កូន​មាន​ជំងឺ​បេះដូង​ដោយសារ​ការ​ខូច​ទ្រង់ទ្រាយ​ពី​កំណើត​ច្រើន​ជាង​ស្ត្រី​ដែល​គ្រាន់តែ​ជក់បារី​ឬ​លើស​ទម្ងន់​ក្នុងពេល​មានគភ៌​ដល់​ទៅ ២,៥​ដង​។​

​ ​ក្រុម​អ្នកស្រាវជ្រាវ​ក៏​បាន​រកឃើញថា ទារក​ដែល​កើត​ពី​ម្តាយ​លើស​ទម្ងន់​ដែល​ជក់បារី​ក្នុងពេល​មាន​គភ៌ មាន​គ្រោះថ្នាក់​កើនឡើង​ដល់​ទៅ​បី​ដង​នៃ​ភាពមិនប្រក្រតី​នៃ​លំហូរ​ឈាម​ពី​ប្រអប់​បេះដូង​ខាងក្រោម​ទៅកាន់​សរសៃ​អាទែសួ​តត្រូវបាន​កាត់បន្ថយ​ឬ​មាន​ការរាំងស្ទះ​។​

​ ​វេជ្ជបណ្ឌិត ម៉ា​រៀន បាក​ឃើរ (Marian Bakker) និង​ក្រុមការងារ និយាយថា “​លទ្ធផល​ទាំងនេះ​បង្ហាញថា ការជក់បារី​និង​លើស​ទម្ងន់​ក្នុងពេល​មានគភ៌​ប្រហែលជា​មាន​ទាក់ទង​នឹង​មូលហេតុ​នៃ​បញ្ហា​បេះដូង​ដោយសារ​ការ​ខូច​ទ្រង់ទ្រាយ​ពី​កំណើត​”​។​

​ ​ការរកឃើញ​នេះ​បន្ថែម​ទៅលើ​ភស្តុតាង​ជា​ច្រើន​ដែល​មាន​ស្រាប់​ថា​ការជក់បារី​និង​លើស​ទម្ងន់​ក្នុងពេល​មាន​គភ៌​មាន​ទាក់ទង​នឹង​បញ្ហា​ដូចជា រលូត​កូន​និង​ការ​កើត​កូន​ដែល​ស្លាប់​ក្នុង​ពោះ ការរារាំង​ការលូតលាស់ និង​ការ​សម្រាលកូន​មុនពេល​។​

​ ​ភាពមិនប្រក្រតី​នៃ​បេះដូង​ដែល​ជា​បញ្ហា​ដ៏​សម្បូរ​មួយ​នៃ​បញ្ហា​ការ​ខូច​ទ្រង់ទ្រាយ​ពី​កំណើត បាន​ប៉ះពាល់​ដល់​ទារក​ប្រហែលជា ៨ ក្នុងចំណោម ១.០០០​នាក់​។