មន្ត្រីម្នាក់បានប្រាប់ AFP នៅថ្ងៃសៅរ៍ថា ប្រទេសឥណ្ឌា នឹងធ្វើការពិនិត្យឱ្យកាន់តែស៊ីជម្រៅ អំពីផលប៉ះពាល់ បន្ទាប់ពីការចាក់វ៉ាក់សាំងកូវីដ-១៩ AstraZeneca នៅសប្តាហ៍ក្រោយ ទោះបីជាមិនមានរបាយការណ៍អំពីការកកឈាមក៏ដោយ។
ទីក្រុងញូវដេលី បានសំរេចធ្វើការពិនិត្យឡើងវិញ បន្ទាប់ពីប្រទេសជាច្រើនបានផ្អាកការចាក់វ៉ាក់សាំងនេះ ដោយសារការភ័យខ្លាចនៃការកកឈាម ទោះបីជាអង្គការសុខភាពពិភពលោកបាននិយាយថា គ្មានហេតុផលអ្វី ដែលត្រូវបញ្ឈប់ការប្រើប្រាស់វ៉ាក់សាំងកូវីដ របស់ក្រុម AstraZeneca ។
គួរបញ្ញាក់ថា ប្រទេសដាណឺម៉ាក ន័រវែស និងអ៊ីស្លង់ បានផ្អាកការប្រើប្រាស់ថ្នាំរបស់ក្រុមហ៊ុននេះ ដែលជាការប្រុងប្រយ័ត្ន បន្ទាប់ពីមានរបាយការណ៍ដាច់ស្រយាលនៃអ្នកទទួលការវិវត្តទៅជាកំណកឈាម។
លោក NK Arora សមាជិកនៃក្រុមការងារជាតិរបស់ប្រទេសឥណ្ឌានៅលើ កូវីដ-១៩ បានប្រាប់ AFP ថា៖ «យើងកំពុងពិនិត្យមើលរាល់ព្រឹត្តិការណ៍អាក្រក់ ជាពិសេសព្រឹត្តិការណ៍ធ្ងន់ធ្ងរ ដូចជាការស្លាប់ និងការចូលមន្ទីរពេទ្យ យើងនឹងត្រឡប់មកវិញប្រសិនបើយើងរកឃើញអ្វីដែលគួរឱ្យព្រួយបារម្ភ»។
ប្រទេសឥណ្ឌា បានផ្តល់ការចាក់វ៉ាក់សាំងយ៉ាងតិច ២៨ លានដូស នៅក្នុងកម្មវិធីចាក់វ៉ាក់សាំងដ៏ធំរបស់ពួកគេ ដែលភាគច្រើនគឺថ្នាំ AstraZeneca ដែលត្រូវបានផលិតនៅវិទ្យាស្ថាន Serum នៃប្រទេសឥណ្ឌា។
ទីក្រុងញូវដែលី ក៏បានផ្តល់អំណោយ និងអនុញ្ញាតឱ្យនាំចេញកញ្ចប់រាប់លានទាំងនេះ ទៅប្រទេសចំនួន ៧០ នៅក្នុងរយៈពេលប៉ុន្មានសប្តាហ៍ចុងក្រោយនេះ ដែលជាផ្នែកមួយនៃការទូតវ៉ាក់សាំងរបស់ខ្លួន។
លោក Arora បាននិយាយថាមិនមានបញ្ហាព្រួយបារម្ភភ្លាមៗទេ ចំនួននៃផលអាក្រក់នៅក្នុងប្រទេសឥណ្ឌា គឺទាបណាស់។ យើងកំពុងមើល ព្រឹត្តិការណ៍អាក្រក់ដែលត្រូវបានគេរាយការណ៍ ដើម្បីពិនិត្យមើលថា តើមានបញ្ហាណាមួយនៃការកកឈាមដែរឬទេ? ។
វេជ្ជបណ្ឌិតបាននិយាយថា “គិតមកទល់ថ្ងៃនេះ មានអ្នកស្លាប់ចំនួន ៥៩ ឬ ៦០ នាក់ ហើយពួកគេទាំងអស់សុទ្ធតែចៃដន្យ” ដោយបន្ថែមថា ករណីមន្ទីរពេទ្យកំពុងត្រូវបានពិនិត្យឡើងវិញ។
លោក Arora បានបន្ថែមថា តាមពិត មានការខិតខំប្រឹងប្រែងពីខាងយើង នៅពេលដែលការស៊ើបអង្កេតពេញលេញត្រូវបានធ្វើឡើង ដើម្បីដាក់លទ្ធផលជាសាធារណៈនៅលើគេហទំព័ររបស់ក្រសួងសុខាភិបាល” ៕