Join with Health.com.kh on Telegram

​នាយករដ្ឋមន្ត្រី​ថៃ លោក ប្រា​យុ​ធ ចាន​អូ​ចា បាន​លុបចោល​ផែនការ ដើម្បី​ចាក់​វ៉ាក់សាំង AstraZeneca ជា​សាធារណៈ​នៅ​ថ្ងៃ​សុក្រ​នេះ ដោយសារ​មាន​របាយការណ៍​ថា ប្រជាជន​នៅ​ដា​ណឺ​ម៉ាក និង​អូទ្រីស បាន​ជួបប្រទះ​ផលប៉ះពាល់​កំណក​ឈាម បន្ទាប់ពី​ទទួលបាន​វ៉ាក់សាំង​។​

​លោក​វេជ្ជបណ្ឌិត Piyasakol Sakolsatayadorn សមាជិក​ជាន់ខ្ពស់​នៃ​គណៈកម្មាធិការ​ចាក់​ថ្នាំ​បង្ការ​របស់​ប្រទេស​ថៃ បាន​និយាយ​នៅក្នុង​សន្និសីទ​សារព័ត៌មាន​មួយ កាលពី​ថ្ងៃ​សុក្រ​ថា អាជ្ញាធរ​ថៃ​បាន​ពន្យា​ពេល​ការចាក់​វ៉ាក់សាំង​នេះ ខណៈ​ពួកគេ​ពិចារណា​លើ​បញ្ហា​នេះ​។​

​វេជ្ជបណ្ឌិត​ខាងលើ បាន​បន្ថែមថា “​គោលបំណង​តែមួយគត់​នៃ​ការចាក់​វ៉ាក់សាំង​របស់​យើង គឺ​សុវត្ថិភាព​របស់​ប្រជាជន​។ នៅពេល​មាន​ព្រឹត្តិការណ៍​មិនល្អ យើង​មិនចាំបាច់​ប្រញាប់ប្រញាល់​ទេ​”​។

​ក្រុមមន្ត្រី​បាន​និយាយថា ពួកគេ​នឹង​រង់ចាំ​លទ្ធផល​នៃ​ការស៊ើបអង្កេត​នៅក្នុង​ប្រទេស​ដា​ណឺ​ម៉ាក និង​ដោយ​អង្គការ​សុខភាព​ពាក់ព័ន្ធ​នៅ​អឺរ៉ុប មុនពេល​ធ្វើការ​សម្រេច​ចិត្ត​បន្ថែមទៀត​។​

​មន្ត្រី​រដ្ឋាភិបាល​បាន​និយាយ​កាលពី​ដើមខែ​នេះ​ថា ប្រទេស​ថៃ​បានទទួល​វ៉ាក់សាំង AstraZeneca ចំនួន ១១៧.៣០០ ពី​បរទេស​។ ប្រទេស​នេះ ក៏​កំពុង​រៀបចំ​ផែន​ការផលិត​វ៉ាក់សាំង​ក្នុងស្រុក​ចំនួន ៦១ លាន​ដូ​ស​តាមរយៈ​ក្រុមហ៊ុន​ឱសថ​សៀម​ជីវ​ជីវសាស្ត្រ​៕