ការស្រាវជ្រាវថ្មីមួយបានបង្ហាញថា អ្នកដែលមានជំងឺបេះដូង ដែលបរិភោគត្រីជាប្រចាំមានការគាំងបេះដូង, ជំងឺដាច់សរសៃឈាមខួរក្បាល តិចតួច ហើយហាក់ដូចជាមិនសូវវិវត្តទៅជាជំងឺខ្សោយបេះដូង ឬស្លាប់បើធៀបនឹងអ្នកដែលមិនបរិភោគត្រី។
អ្នកស្រាវជ្រាវបានវិភាគទិន្នន័យពីការសិក្សា ៤ លើកមុន ដែលរួមមានមនុស្សជាង ១៩១.០០០ នាក់មកពី ៥៨ ប្រទេស ដែលបានឆ្លើយនឹងការស្ទង់មតិអំពីរបបអាហាររបស់ពួកគេ។ ពួកគេមិនបានរកឃើញទំនាក់ទំនងល្អណាមួយពីការបរិភោគត្រីក្នុងចំណោមមនុស្សដែលមិនមានជំងឺបេះដូងនោះទេ។
បណ្ឌិត Andrew Mente ជាអ្នកស្រាវជ្រាវជាន់ខ្ពស់នៃការស្រាវជ្រាវ ដែលត្រូវបានចេញផ្សាយនៅក្នុង JAMA Internal Medicine និងជាអ្នកជំនាញផ្នែករោគឆ្លងនៃសាកលវិទ្យាល័យ McMaster នៅកាណាដាបាននិយាយថា “មានអត្ថប្រយោជន៍ការពារដ៏សំខាន់មួយនៃការញ៉ាំត្រី ចំពោះអ្នកដែលមានជំងឺសរសៃឈាមបេះដូង” ។
គាត់បាននិយាយថា ការស្រាវជ្រាវនេះមានការជាប់ទាក់ទងសំខាន់ចំពោះការណែនាំស្តីពីការញ៉ាំត្រី នៅទូទាំងពិភពលោក។ វាបង្ហាញថា ការកើនឡើង ការប្រើប្រាស់ត្រី និងជាពិសេសខ្លាញ់ត្រី ចំពោះអ្នកជំងឺសរសៃឈាម អាចផ្តល់អត្ថប្រយោជន៍ដល់សរសៃឈាមបេះដូងតិចតួច។
តិចជាង មួយភាគបួន នៃអ្នកដែលត្រូវបានរាប់បញ្ចូលក្នុងការស្រាវជ្រាវថ្មី មានប្រវត្តិ ឬមានហានិភ័យខ្ពស់នៃជំងឺបេះដូង។ ក្នុងចំនោមមនុស្សប្រហែល ៥១.០០០ នាក់នេះ, អ្នកដែលញ៉ាំត្រីយ៉ាងតិច ២ ដងក្នុងមួយសប្តាហ៍មានអត្រាថយចុះ ១៦% នៃព្រឹត្តិការណ៍សំខាន់ៗនៃប្រព័ន្ធសរសៃឈាមបេះដូង រួមមាន ការគាំងបេះដូង, ដាច់សរសៃឈាមខួរក្បាល, ការធ្វើរោគវិនិច្ឆ័យនៃជំងឺខ្សោយបេះដូង កកស្ទះ និងការស្លាប់ភ្លាមៗ ដែលទាក់ទងនឹងជំងឺបេះដូង អំឡុងពេលតាមដានជាមធ្យមប្រហែល ៧.៥ ឆ្នាំ។ ព្រឹត្តិការណ៍ទាំងនេះបានកើតឡើងនៅក្នុងមនុស្ស ១៧% ដែលមានជំងឺបេះដូង ឬមានហានិភ័យខ្ពស់ចំពោះវា។
អត្រានៃការស្លាប់ពីបុព្វហេតុណាមួយ គឺទាបជាង ១៨% ក្នុងចំនោមអ្នក ដែលមានជំងឺបេះដូង ដែលបរិភោគត្រីពីរ ឬច្រើនចំណែកក្នុងមួយសប្តាហ៍ បើប្រៀបធៀបជាមួយអ្នកដែលមិនបរិភោគ។ ក្នុងអំឡុងពេលនៃការតាមដានការស្លាប់ពីបុព្វហេតុណាមួយ បានកើតឡើងនៅក្នុងមនុស្ស ១៣% នៃអ្នកដែលមានជំងឺបេះដូង ឬមានហានិភ័យខ្ពស់។
អ្នកស្រាវជ្រាវមិនបានមើលឃើញពីអត្ថប្រយោជន៍បន្ថែមទៀតទេនៅពេលដែលមនុស្សបរិភោគត្រីច្រើន៕