ក្រុមអ្នកវិទ្យាសាស្ត្រជប៉ុនបានឱ្យដឹងថាសត្វស្វាដែលមានជំងឺញ័រ (Parkinson’s Disease) បង្ហាញភាពប្រសើរឡើងនៃចលនាគួរឱ្យកត់សម្គាល់ ក្រោយពេលយកកោសិកាមនុស្សទៅផ្សាំក្នុងខួរក្បាលរបស់ពួកវា។
មុនពេលធ្វើការផ្សាំ សត្វស្វាបួនក្បាលសុទ្ធតែមានអាការៈញ័រជើងយ៉ាងខ្លាំង ហើយមិនអាចគ្រប់គ្រងរាង្គកាយរបស់ពួកវាបានឡើយ។
បីខែក្រោយពេលធ្វើការផ្សាំ សត្វស្វាទាំងនោះចាប់ផ្តើមបង្ហាញភាពជាសះស្បើយនៃការគ្រប់គ្រងសាច់ដុំរបស់វា។ ក្នុងរយៈពេលប្រហែល ៦ខែ ពួកវាអាចដើរជុំវិញទ្រុងបាន។
ជុន តាកាហាស៊ី (Jun Takahashi) សហការីសាស្ត្រាចារ្យនៅមហាវិទ្យាល័យក្យូតូ បាននិយាយថា “ភាពប្រសើរឡើងនៃចលនារបស់ពួកវាត្រូវបានបញ្ជាក់យ៉ាងជាក់ច្បាស់”។
គាត់បាននិយាយថា លទ្ធផលនេះគឺជាការរកឃើញដំបូងបង្អស់ ហើយគាត់ចង់ធ្វើឱ្យដំណើរការផ្សាំនេះមានសុវត្ថិភាពនិងប្រសិទ្ធភាពជាមុនសិនមុននឹងធ្វើការសាកល្បងលើមនុស្ស។