Join with Health.com.kh on Telegram

របបអាហារត្រឹមត្រូវ គឺចាំបាច់ណាស់ដើម្បីរក្សាបាននូវសុខភាពរាងកាយ និងសម្រស់ល្អប្រសើរ ជាពិសេសនៅឈានដល់វ័យក្រោយ ៤០ ឆ្នាំ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើអាហារអ្វីខ្លះទៅដែលអ្នកគួរ
ទទួលទាន ឬត្រូវចៀសវាងក្រោយវ័យ ៣០ឆ្នាំដើម្បីជៀសផុតពីបញ្ហាសុខភាពផ្សេងៗ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារទាំងនោះ ៖

  • អាហារចាំបាច់គួរទទួលទាន ឬរួមបញ្ចូលក្នុងរបបអាហារប្រចាំថ្ងៃ

១. គ្រាប់ធញ្ញជាតិ

ជាប្រភពដ៏ប្រសើរនៃខ្លាញ់ល្អ និងសារធាតុចិញ្ចឹមផ្សេងៗ ព្រមទាំងសារធាតុប្រឆាំងអុកស៊ីតកម្មដែលជួយការពារកោសិកា កាត់បន្ថយកូឡេស្តេរ៉ូលមិនល្អ និងល្អណាស់សម្រាប់កាត់បន្ថយហានិភ័យនៃជំងឺទឹកនោមផ្អែមប្រភេទទី ២។ គ្រាប់ធញ្ញជាតិក៏ប្រសើរសម្រាប់រក្សាសុខភាពបេះដូងផងដែរ។ ទោះជាយ៉ាងណាអ្នកមិនគួរទទួលទានច្រើនជាងមួយក្ដាប់ដៃពេញក្នុងមួយថ្ងៃឡើយ។

២. សណ្ដែកប្រភេទ Lentils

រួមមានសណ្ដែកបាយ សណ្ដែកខៀវ និងសណ្ដែកក្រហមជាដើមជាប្រភពដ៏ល្អបំផុតមួយនៃជាតិសសៃនិងវីតាមីន B9 ឬសារធាតុហ្វូឡេត (folate)។ ការទទួលទានសណ្ដែកប្រភេទ lentils អាចជួយបញ្ចុះកម្រិតនៃកូឡេស្តេរ៉ូលមិនល្អ និងកាត់បន្ថយហានិភ័យនៃបញ្ហាបេះដូងផ្សេងៗ រួមទាំងជំងឺទឹកនោមផ្អែម និងធាត់ជ្រុល។ ជាតិរ៉ែម្យ៉ាងហៅថាសេលេញ៉ូមក្នុងសណ្ដែក lentils ជួយប្រយុទ្ធប្រឆាំងជំងឺមហារីក កាត់ហានិភ័យនៃជំងឺវង្វេងស្មារតីចំពោះមនុស្សចាស់ និងសូម្បីតែជំងឺហឺតរ៉ាំរ៉ៃ។

៣. អាហារសម្បូរបាក់តេរីល្អ

រួមមានយ៉ាអួរជាដើម គឺមានផ្ទុកសារធាតុប្រូបាយអូទិកដែលជួយរក្សាសុខភាពពោះវៀនល្អណាស់សម្រាប់ស្ត្រីក្រោយវ័យ ៤០ឆ្នាំ។

៤. ត្រីសម្បូរខ្លាញ់

ត្រីសម្បូរខ្លាញ់រួមមានត្រីសាលម៉ុន និងត្រីសាឌីនជាដើមជាប្រភពដ៏ប្រសើរនៃអាស៊ីតខ្លាញ់អូមេហ្កា ៣និងវីតាមី​ន D ដែលមិ​នត្រឹមតែជួយទប់ស្កាត់ជំងឺបេះដូងប៉ុណ្ណោះទេ ប៉ុន្តែរួមទាំងជំងឺមហារីកជាច្រើនប្រភេទ ជំងឺទឹកនោមផ្អែម សម្ពាធឈាមឡើងខ្ពស់ និងសូម្បីតែជំងឺបាក់ទឹកចិត្ត (Depression)។ វាក៏ជួយបំបាត់អាការៈអស់រដូវមួយចំនួនផងដែរ។ ចូរព្យាយាមទទួលទានត្រីសម្បូរខ្លាញ់ ៣ដងក្នុងមួយស​ប្តាហ៍។

៥. អាហារសម្បូរជាតិកាល់ស្យូម

រួមមានផលិតផលអាហារផ្សំឡើងពីទឹកដោះគោ គ្រាប់ពូជ ត្រីសាឌីន និងត្រីសាម៉ុនកំប៉ុង សណ្ដែក ព្រមទាំងគ្រាប់អាល់ម៉ុនជាដើមសុទ្ធតែជាប្រភពដ៏ប្រសើរនៃជាតិកាល់ស្យូមដែលល្អណាស់សម្រាប់អ្នកដែលឈានចូលដល់វ័យក្រោយ ៤០ ដើម្បីពង្រឹងសុខភាពឆ្អឹង។ វ័យកាន់តែជ្រេ នោះសមត្ថភាពរបស់រាងកាយក្នុងការស្រូបយកជាតិកាល់ស្យូមពីអាហារកាន់តែអន់ថយទៅ។ ជាលទ្ធផលរាងកាយទាញយកជាតិកាល់ស្យូមពីឆ្អឹង។ ដូច្នេះដើម្បីទប់ស្កាត់កង្វះជាតិកាល់ស្យូម អ្នកគួរព្យាយាមរួមបញ្ចូលអាហារសម្បូរជាតិកាល់ស្យូមក្នុងរបបអាហារប្រចាំថ្ងៃ។

៦. បន្លែផ្លែឈើចម្រុះពណ៌

ទោះបីជាបន្លែផ្លែឈើភាគច្រើនមានផ្ទុកសម្បូរទៅដោយសារធាតុប្រឆាំងអុកស៊ីតកម្ម ប៉ុន្តែមួយចំនួនធំ គឺមិនមានផ្ទុកសារធាតុប្រឆាំងអុកស៊ីតកម្ម anthocyanin ឡើយ។ សារធាតុប្រឆាំងអុកស៊ីតកម្ម anthocyanin អាចជួយរក្សាសុខភាពសសៃឈាមបេះដូង និងទប់ស្កាត់ហានិភ័យនៃជំងឺវង្វេងស្មារតី (dementia)។ បន្លែផ្លែឈើដែលមានផ្ទុកសម្បូរទៅដោយសារធាតុប្រឆាំងអុកស៊ីតកម្មនេះរួមមានប្ល៊ូបឺរី ឆៃថាវក្រហម ស្ពៃក្ដោបពណ៌ស្វាយ ឬឈើរីជាដើម។

  • អាហារចាំបាច់គួរចៀសវាង

១. គ្រឿងស្រវឹង

មានផ្ទុកសម្បូរទៅដោយជាតិកាឡូរី។ ចាប់ពីអាយុ ឬវ័យ ៤០ ឆ្នាំឡើង រាងកាយមិនអាចដុតបំផ្លាញកាឡូរីនៃគ្រឿងស្រវឹងបានយ៉ាងសកម្មទៀតឡើយ។ លើសពីនេះទៅទៀត គ្រឿងស្រវឹង ឬស្រាបៀរក៏បង្កើនកម្រិតនៃអាំងស៊ុយលីនដែលបង្កភាពពិបាកដល់ប្រព័ន្ធរាងកាយគួរអោយបារម្ភផងដែរ។ ការទទួលទានគ្រឿងស្រវឹងច្រើនថែមទាំងជះឥទ្ធិពលដល់សម្ពាធឈាម បង្កបញ្ហានៃជំងឺបេះដូង ក៏ដូចជាថ្លើមទៀតផង។

២. ជាតិផ្អែមសិប្បនិម្មិត

ស្ករ ឬជាតិផ្អែមសិប្បនិម្មិតមិនផ្ដល់ជាតិកាឡូរីដល់រាងកាយដែលធ្វើអោយរាងកាយមិនអាចគ្រប់គ្រងការឃ្លានបាន។ ហើយជាតិផ្អែមសិប្បនិម្មិតក៏ផ្សារភ្ជាប់ជាមួយជំងឺមហារីក បង្កើនកម្រិតនៃជាតិគ្លុយកូស និងបន្ថយសមត្ថភាពឆ្លើយតបទៅនឹងអាំងស៊ុយលីនផងដែរ។ ហើយបញ្ហាទាំងនេះបង្កើនហានិភ័យនៃជំងឺពាក់ព័ន្ធនឹងការដុតរំលាយអាហារក្នុងរាងកាយ ការស្តុកទុកនូវជាតិខ្លាញ់ ជំងឺសសៃឈាមបេះដូង និងជំងឺទឹកនោមផ្អែមប្រភេទទី ២។

៣. ជាតិកាហ្វេអ៊ីន

ក្រៅពីផលពាល់ដល់ដំណេកហើយនោះ ការទទួលទានជាតិកាហ្វេអ៊ីនច្រើនពេកក៏បណ្ដាលអោយអ្នកឆាប់ចាស់ជាងវ័យផងដែរ។ ហើយក៏មិនខុសពីគ្រឿងស្រវឹង ការទទួលទានជាតិកាហ្វេអ៊ីនអាចបង្កបញ្ហានៃភាពធាត់ជ្រុលដោយរាងកាយមិនអាចដុតបំផ្លាញកាឡូរីនៃកាហ្វេអ៊ីន។

៤. អាហារកំប៉ុង

ក៏ព្រោះអាហារប្រភេទនេះមានផ្ទុកសម្បូរទៅដោយជាតិស្ករ អំបិល និងជាតិខ្លាញ់មិនល្អខ្ពស់ ប៉ុន្តែមិនសូវសម្បូរសារធាតុចិញ្ចឹមចាំបាច់ រួមទាំងជាតិសសៃដែលបង្កផលប៉ះពាល់គួរអោយព្រួយបារម្ភចំពោះសុខភាព។

៥. សាច់កែច្នៃ

ភាគច្រើននៃសាច់កែច្នៃមានផ្ទុកសារធាតុ nitrates ដែលបង្កបញ្ហានៃជំងឺមហារីក។ ដូច្នេះដើម្បីជាការប្រសើរ អ្នកគួរជៀសអោយផុតពីការទទួលទានសាច់ដែលមានផ្ទុកសារធាតុ nitrates។ លើសពីនេះទៅទៀត សាច់កែច្នៃ ក៏ជាប្រភពនៃជាតិខ្លាញ់មិនល្អ និងជាតិប្រៃខ្ពស់ដែលមិនល្អចំពោះសុខភាពបេះដូងផងដែរ។

៦. ភេសជ្ជៈសូដា

មានផ្ទុកសម្បូរទៅដោយជាតិស្ករមិនល្អខ្ពស់ដែលអាចបង្កផលប៉ះពាល់គួរអោយព្រួយបារម្ភជាច្រើនចំពោះសុខភាព។ ភេសជ្ជៈប្រភេទនេះក៏បង្កើតភាពធន់ទៅនឹង leptin ដែលជាអ័រម៉ូនកាត់បន្ថយចំណង់អាហារ ហើយជះឥទ្ធិពលដល់ការកើនឡើងនូវជាតិខ្លាញ់ក្នុងរាងកាយ៕