ឧស្សាហ៍ញ៊ាំ ប៉ុន្តែតិចអត់ដឹង “ខ្ទឹមស” អាចជួយអ្នកឱ្យស្រស់ស្អាត

ភាគច្រើននៃពួកយើងសុទ្ធតែស្គាល់និងឧស្សាហ៍ទទួលទានខ្ទឹមស ហើយក៏បានដឹងពីអត្ថប្រយោជន៍ដ៏ប្រសើររបស់វាចំពោះសុខភាព។ ( អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ទោះជាយ៉ាងណាប្រហែលជាមិនដែលចាប់អារម្មណ៍ដឹងពីការប្រើប្រាស់ខ្ទឹមសដោះស្រាយបញ្ហាសម្រស់ឡើយ។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីរបៀបប្រើប្រាស់ខ្ទឹមសដោះស្រាយបញ្ហាសម្រស់មួយចំនួន ៖

១. បង្រួមរន្ធញើស

អ្វីដែលអ្នកត្រូវធ្វើ គឺគ្រាន់តែបុកខ្ទឹមស ២ កំពឹសលាយជាមួយទឹកប៉េងប៉ោះស្រស់បន្តិច រួចលាបល្បាយលើស្បែកមុខដែលមានបញ្ហារន្ធញើសធំ។ ទុកចោលសម្រាប់រយៈពេលពី ២ ទៅ ៣ នាទី សឹមលាងសម្អាតមុខចេញជាមួយសាប៊ូកម្រិតស្រាលនិងទឹកធម្មតា។

២. ព្យាបាលមុន

អ្វីដែលអ្នកត្រូវធ្វើ គឺគ្រាន់តែដុសចំនិតខ្ទឹមសស្រស់ៗលើមុន ឬបុកខ្ទឹមសឱ្យម៉ដ្ឋយកទឹកខ្ទឹមសស្រស់លាបម៉ាស្សាលើមុន រួចលាងសម្អាតចេញជាមួយទឹកសម្អាតនិងសាប៊ូកម្រិតស្រាល។

៣. ទប់ស្កាត់សក់ជ្រុះ

អ្នកអាចលាយទឹកខ្ទឹមសស្រស់ជាមួយប្រេងជីអង្កាម។ រួចលាបម៉ាស្សាល្បាយលើស្បែកក្បាលសម្រាប់រយៈពេលពី ១០ ទៅ ១៥ នាទី។ លាងសម្អាតចេញជាមួយទឹកក្ដៅឧណ្ហៗនិងកក់សក់នៅថ្ងៃបន្ទាប់។ អ្នកអាចអនុវត្តរូបមន្តនេះពី ៣ ទៅ ៤ ដងក្នុងមួយសប្តាហ៍។

៤. ពន្យឺតដំណើរការនៃភាពចាស់តាមវ័យរបស់ស្បែក

ភាគច្រើននៃពួកយើងប្រហែលជាមិនធ្លាប់ដឹងទេថា ខ្ទឹមសមានផ្ទុកសម្បូរទៅដោយសារធាតុប្រឆាំងអុកស៊ីតកម្មដែលកម្ចាត់រ៉ាឌីកាល់សេរី។ ជាលទ្ធផលស្បែកនឹងទទួលបានការពារប្រឆាំងរាល់សញ្ញានៃភាពចាស់តាមវ័យ។ ការទទួលទានខ្ទឹមសឆៅត្រឹមតែ ១កំពឹសជាមួយទឹកឃ្មុំនិងទឹកក្រូចឆ្មារស្រស់នៅពេលព្រឹកពោះទទេរមិនទាន់ញ៊ាំអ្វីផ្សេងពិតជាមានប្រយោជន៍ណាស់សម្រាប់សុខភាពស្បែក។

៥. កម្ចាត់មុនក្បាលខ្មៅ

អ្វីដែលអ្នកត្រូវធ្វើ គឺគ្រាន់តែកិនប៉េងប៉ោះ ១ បន្ទះជាមួយខ្ទឹមសពី ២ ទៅ ៣កំពឹស។ កិនឱ្យម៉ដ្ឋចូលគ្នា សឹមលាបល្បាយលើតំបន់ស្បែកដែលមានបញ្ហា។ រងចាំសម្រាប់រយៈពេលពី ១០ ទៅ ១៥នាទី សឹមលាងជម្រះចេញ។

៦. ជួយគ្រប់គ្រងទម្ងន់

ក្រៅពីជួយពន្លឿនការដុតរំលាយអាហារហើយនោះ ខ្ទឹមសក៏មានផ្ទុកសារធាតុ ajoene ជួយបំផ្លាញជាតិខ្លាញ់មិនល្អដែលស្ដុកទុកក្នុងរាងកាយ។ ខ្ទឹមសថែមទាំងជួយដុតបំផ្លាញជាតិកាឡូរីដែលលើសផងដែរ។ ដូច្នេះកុំភ្លេចរួមបញ្ចូលខ្ទឹមសក្នុងរបបអាហារប្រចាំថ្ងៃរបស់អ្នកដើម្បីសម្រក ឬរក្សាទម្ងន់សមស្របដូចបច្ចុប្បន្ន។

៧. សុខភាពស្បែក

ក្រៅពីជួយបន្ថែមក្លិននិងរសជាតិដល់អាហារហើយនោះ ខ្ទឹមសក៏បង្កើនការផលិតកូឡាជែនផងដែរ។ ខ្ទឹមសមានផ្ទុកសារធាតុ sulfur ដែលអាចបញ្ឈប់ការបំបែកកូឡាជែនល្អសម្រាប់សុខភាពស្បែកក្មេងជាងវ័យ។

៨. កម្ចាត់អង្គែ

អ្នកអាចលាយទឹកក្រូចឆ្មារស្រស់ ១ ស្លាបព្រាបាយជាមួយខ្ទឹមសម៉ដ្ឋឱ្យក្លាយជាល្បាយខាប់ៗ។ លាបល្បាយលើស្បែកក្បាលនិងសក់ដោយម៉ាស្សាថ្នមៗ។ ទុកចោលសម្រាប់រយៈពេល ៣០ នាទី សឹមកក់សក់លាងសម្អាតចេញជាមួយទឹកត្រជាក់។ អនុវត្តសារឡើងវិញជាប្រចាំ៕