ស្នាមអ៊ុចខ្មៅលើស្បែកមិនត្រឹមតែជាបញ្ហាគួរអោយរំខានប៉ុណ្ណោះទេ ប៉ុន្តែថែមទាំងអាចធ្វើអោយអ្នកបាត់បង់នូវភាពទាក់ទាញផងដែរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប្រសិនបើអ្នកកំពុងជួបប្រទះបញ្ហានេះ ហើយមិនចង់ទទួលយកការព្យាបាលបែបទំនើប ឬការប្រើប្រាស់ផលិតផលសម្រស់ផ្សេងៗដែលមានផ្ទុកសារធាតុគីមីនោះក៏កុំបារម្ភ! ក៏ព្រោះស្នាមអ៊ុចខ្មៅលើស្បែកអាចត្រូវបានដោះស្រាយតាមរយៈរូបមន្តបែបធម្មជាតិមួយចំនួន។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីរូបមន្តបែបធម្មជាតិងាយៗ ប៉ុន្តែមានប្រសិទ្ធិភាពខ្ពស់កម្ចាត់ស្នាមអ៊ុចខ្មៅចេញពីស្បែកបានយ៉ាងឆាប់រហ័ស ៖
១. ដំឡូងបារាំង
អ្វីដែលអ្នកត្រូវធ្វើ គឺគ្រាន់តែហាន់ដំឡូងបារាំងមួយមើមជាចំណិតៗ រួចសឹមចាប់ផ្ដើមកិនយកទឹក។ លាបទឹកដំឡូងបារាំងលើស្បែកដែលមានស្នាមអ៊ុចខ្មៅ ហើយទុកចោលសម្រាប់រយៈពេលពី ២ ទៅ ៣ នាទី សឹមលាងសម្អាតចេញជាមួយទឹកធម្មតាជាការស្រេច។
២. ប្រទាលកន្ទុយក្រពើ
អ្វីដែលអ្នកត្រូវធ្វើ គឺគ្រាន់តែលាបម៉ាស្សាជែលប្រទាលកន្ទុយក្រពើស្រស់លើតំបន់ស្បែកដែលមានបញ្ហា។ រងចាំរហូតដល់ស្ងួតនិងលាងសម្អាតចេញជាមួយទឹកធម្មតា។ អនុវត្តសារឡើងវិញជាប្រចាំរហូតទទួលបានលទ្ធផលជាទីគាប់ចិត្ត។ អ្នកអាចលាយទឹកក្រូចឆ្មារ ជាមួយម្ស៉ៅរមៀត និងជែលប្រទាលកន្ទុយក្រពើមកលាបលើផ្ទៃមុខក៏បាន។ អនុវត្តម្ដងក្នុងមួយថ្ងៃ សម្រាប់រយៈពេលពី ២ ទៅ ៣ សប្តាហ៍។
៣. សំបកក្រូច
លាយម្សៅសំបកក្រូច ១ស្លាបព្រាបាយជាមួយទឹកដោះគោស្រស់ ៣ស្លាបព្រាបាយ។ កូរឱ្យសព្វ សឹមលាបម៉ាស្សាល្បាយលើតំបន់ស្បែកដែលមានបញ្ហា និងរងចាំសម្រាប់រយៈពេលពី ១០ ទៅ ១៥នាទី។ លាងសម្អាតចេញជាមួយទឹកធម្មតា។
៤. ប្រេងដូង
លាបម៉ាស្សាប្រេងដូងលើតំបន់ស្បែកដែលទទួលរងផលប៉ះពាល់និងរងចាំរហូតដល់ស្បែកស្រូកយកជាតិប្រេងអស់។
៥. ទឹកខ្មេះផ្លែប៉ោម
លាយទឹកខ្មេះផ្លែប៉ោមជាមួយទឹកធម្មតាក្នុងបរិមាណស្មើគ្នា។ កូរឱ្យសព្វ សឹមលាបល្បាយលើស្បែកដែលទទួលផលប៉ះពាល់។ រងចាំរហូតដល់ស្ងួត សឹមលាងសម្អាតចេញជាមួយទឹកធម្មតា។ អនុវត្តជាប្រចាំ។
៦. ទឹកម្នាស់
អ្វីដែលអ្នកត្រូវធ្វើ គឺគ្រាន់តែលាបទឹកម្នាស់ស្រស់លើតំបន់ស្បែកដែលមានស្នាមអ៊ុចខ្មៅដោយប្រើប្រាស់បន្ទះសំឡី។ រងចាំសម្រាប់រយៈពេល ៥នាទី សឹមលាងសម្អាតចេញ។
៧. ទឹកក្រូចឆ្មារស្រស់
អ្វីដែលអ្នកត្រូវធ្វើ គឺគ្រាន់តែច្របាច់យកទឹកក្រូចឆ្មារស្រស់ ១ ផ្លែ ហើយប្រើប្រាស់សំឡីជ្រលក់លាប ឬផ្ដិតថ្នមៗលើតំបន់ស្បែកដែលទទួលរងផលប៉ះពាល់ និងទុកចោលសម្រាប់រយៈពេលពី ១ ទៅ ២ ម៉ោងសិន សឹមលាងជាមួយទឹកធម្មតា។ អនុវត្តរូបមន្តនេះ ២ ដងក្នុងមួយថ្ងៃជាប្រចាំសម្រាប់ពេលយ៉ាងហោចណាស់ ២សប្តាហ៍ ហើយត្រូវប្រាកដថាអ្នកមិនចេញក្រៅត្រូវពន្លឺព្រះអាទិត្យក្រោយពីលាបទឹកក្រូចឆ្មាររួច។ សម្រាប់អ្នកដែលមានរបួសលើស្បែកមិនគួរអនុវត្តរូបមន្តនេះឡើយ។ ហើយរូបមន្តនេះក៏មិនសាកសមសម្រាប់អ្នកដែលមានស្បែកមុខស្ដើងឆាប់ប្រតិកម្មដែរ។
៨. រមៀត
អ្វីដែលអ្នកត្រូវធ្វើ គឺគ្រាន់តែលាយម្ស៉ៅរមៀត ១ ស្លាបព្រា ជាមួយទឹកក្រូចឆ្មារចំនួនសមល្មម និងទឹកដោះគោស្រស់ កូរអោយសព្វចូលគ្នា សឹមលាបល្បាយលើតំបន់ស្បែកដែលទទួលរងផលប៉ះពាល់ ហើយទុកចោលរហូតដល់ស្ងួត សឹមលាងសម្អាតចេញជាមួយទឺកធម្មតា។ អនុវត្តម្ដងក្នុងមួយថ្ងៃ៕