ការដឹកជញ្ជូនវ៉ាក់សាំងកូវីដ-១៩របស់ក្រុមហ៊ុន AstraZeneca ជាង២៥០.០០០ដូស ទៅកាន់ប្រទេសអូស្ត្រាលីត្រូវបានរារាំងមិនអោយចេញពីអឺរ៉ុប។ ការហាមឃាត់នេះ ត្រូវបានធ្វើឡើងតាមការបង្គាប់បញ្ជាពីអ៊ីតាលី ហើយសហភាពអឺរ៉ុបមិនបានជំទាស់នឹងជំហរនេះទេ ដើម្បីដោះស្រាយការខ្វះខាតវ៉ាក់សាំងនៅក្នុងប្លុកនេះ។
ការរារាំងរបស់អ៊ីតាលី សំអាងលើការខ្វះវ៉ាក់សាំង ជាទូទៅនៅក្នុងសហភាពអឺរ៉ុប និងការពន្យារពេលផ្គត់ផ្គង់វ៉ាក់សាំងរបស់ AstraZeneca មកកាន់អឺរ៉ុបនិងអ៊ីតាលី នេះបើតាមសេចក្តីថ្លែងការណ៍របស់ក្រសួងការបរទេស។
សេចក្តីថ្លែងការណ៍បានបន្ថែមថា ខ្លួនចូលធ្វើអន្តរាគមន៍ពីព្រោះវ៉ាក់សាំងជាង២៥០.០០០ដូសត្រូវដឹកទៅកាន់អូស្ត្រាលី ដែលជាប្រទេសមិនងាយរងគ្រោះសោះ។ អ៊ីតាលីបានជូនដំណឹងដល់ក្រុមហ៊ុនកាលពីថ្ងៃអង្គារ តែ AstraZeneca មិនព្រមឆ្លើយ។
សូមបញ្ជាក់ថា ប្រឈមនឹងការខ្វះវ៉ាក់សាំងនៅក្នុងដំណាក់កាលដំបូងៗនៃយុទ្ធនាការចាក់វ៉ាក់សាំងបង្ការវីរុសកូរ៉ូណាដែលបានចាប់ផ្តើមកាលពីចុងខែធ្នូឆ្នាំមុន សហភាពអឺរ៉ុបបានចេញប្រើប្រព័ន្ធគ្រប់គ្រងការនាំចេញសំរាប់វ៉ាក់សាំងកូវីដ១៩ កាលពីចុងខែមករា ឆ្នាំ២០២១ ដោយចាប់បង្ខំអោយក្រុមហ៊ុនឱសថ និងក្រុមហ៊ុននាំចេញគោរពកាតព្វកិច្ចកុងត្រាផ្គត់ផ្គង់វ៉ាក់សាំងរបស់គេមកអោយប្លុកអឺរ៉ុបមុនការនាំចេញបែបពាណិជ្ជកម្ម៕
ហើយ ការដែលសហភាពអឺរ៉ុបមិនពេញចិត្តនឹងក្រុមហ៊ុន AstraZeneca នេះដោយសារក្រុមហ៊ុនប្រគល់មកអោយខ្លួននូវវ៉ាក់សាំងតិចដូសជាងការសន្យា ពោលគឺក្រោមកិច្ចសន្យាប្រគល់៨០លានដូសក្នុងការបញ្ជាទិញដំបូងនៅត្រីមាសទី១នេះ ក្រុមហ៊ុនអាចប្រគល់អោយបានតែពាក់កណ្តាល។
មានការលេចឮថា ក្រុមហ៊ុនបានលួចបញ្ចេញវ៉ាក់សាំងទៅអោយប្រទេសនានាក្រៅប្លុក តែប្រធានក្រុមហ៊ុនបានបដិសេធ និងថាវាបណ្តាលមកពីបញ្ហាបច្ចេកទេសផលិតកម្ម។
សូមបញ្ជាក់ថា គិតមកត្រឹមថ្ងៃនេះ សហភាពអឺរ៉ុបទើបចាក់វ៉ាក់សាំងអោយពលរដ្ឋខ្លួនបាន៨ភាគរយ នៅពេលអង់គ្លេសចាក់បានជាង៣០ភាគរយ៕