​ការស្រាវជ្រាវ​ថ្មី​មួយ​បាន​បង្ហាញថា អ្នក​ដែល​មាន​ជំងឺឆ្កួតជ្រូក​គឺ​ហាក់ដូចជា​ស្លាប់​មុន​អាយុ​ជាង​មនុស្ស​ធម្មតា​១១​ដង​។ ហើយ​ការកើនឡើង​ហានិភ័យ​នៃ​ការស្លាប់​មុន​អាយុ​នេះ​គឺ​ខ្ពស់​ក្នុង​ចំនោម​អ្នក​នោះ​មាន​ជំងឺផ្លូវចិត្ត​គួបផ្សំ​ជាមួយ ជាពិសេស​ជំងឺ​ធ្លាក់​ទឹកចិត្ត និង​ជំងឺ​ញៀន​ស្រា និង​ញៀន​សារធាតុ​ញៀន​ដទៃទៀត​។​


​សេណា ហ្វា​ហ្សេ​ល (Seena Fazel) ដែល​មកពី​សាកលវិទ្យាល័យ Oxford បាន​និយាយថា លទ្ធផល​របស់​យើង​មានការ​ផ្សារភ្ជាប់​ជាមួយនឹង​សុខភាព​សាធារណៈ​នៅពេលដែល​មនុស្ស​ជុំវិញ​៧០​លាន​នាក់​លើ​ពិភពលោក​មាន​ជំងឺ​ឆ្កួតជ្រូន ហើយ​បាន​សង្កត់ធ្ងន់ថា ការវាយតម្លៃ និង​ការព្យាបាល​ជំងឺផ្លូវចិត្ត​យ៉ាង​យកចិត្ត​ទុក​លើ​អ្នក​ជំងឺឆ្កួតជ្រូក​អាចជួយ​បន្ថយ​ហានិភ័យ​នៃ​ការស្លាប់​មុន​អាយុ​ចំពោះ​អ្នកជំងឺ​ទាំងនេះ​បាន​។​

ការស្រាវជ្រាវ​បាន​មើល​ទៅលើ​អ្នក​ជំងឺឆ្កួតជ្រូក​ជិត​៧០.០០០​នាក់ ហើយ​បាន​តាមដាន​អស់​រយៈពេល​លើសពី​៤១​ឆ្នាំ​។ ពួកគេ​ត្រូវបាន​គេ​ប្រៀបធៀប​ទៅ​នឹង​មនុស្ស​ជាង​៦៦០.០០០​នាក់​ក្នុងចំនោម​ប្រជាជន​ទូទៅ និង​ជាង​៨១.០០០​នាក់​ដែល​មិន​មាន​ជំងឺឆ្កួតជ្រូក​។​

អំឡុងពេល​នៃ​ការស្រាវជ្រាវ​, ប្រហែល​៩%​នៃ​អ្នក​ជំងឺឆ្កួតជ្រូក​បាន​ស្លាប់ បើ​ធៀប​ជាមួយនឹង​០,៧%​នៃ​ប្រជាជន​ទូទៅ​។ ការស្លាប់​ពី​មូលហេតុ​ដទៃ ដូចជា ការ​សម្លាប់ខ្លួន​, គ្រោះថ្នាក់​ចរាចរណ៍​នានា​នោះ​មាន​ប្រហែល​១៦%​នៃ​ការស្លាប់​ទាំងអស់​ក្នុង​ចំនោម​អ្នក​ដែល​មាន​ជំងឺ​ឆ្កួតជ្រូក និង​ជា​មូលហេតុ​ទូទៅ​បំផុត​នៃ​ការស្លាប់​ដែល​មិន​ត្រូវ​បាន​ពាក់ព័ន្ធ​ទៅ​នឹង​ជំងឺ​ដទៃទៀត​។​

ចំពោះ​អ្នក​ជំងឺឆ្កួតជ្រូក​ដែល​បាន​ស្លាប់​ដោយសារ​មូលហេតុ​ដទៃទៀត​, ៧៥%​បាន​ធ្វើ​រោគវិនិច្ឆ័យ​ថា​មាន​ជំងឺ​ផ្លូវចិត្ត ដែល​បញ្ហា​ញៀន​សារធាតុ​ញៀន ៥៦% និង​ជំងឺ​ធ្លាក់​ទឹកចិត្ត​២៣% ដែល​ជា​កើត​មាន​ញឹកញាប់​បំផុត​។ នេះ​ដោយយោង​តាម​ការស្រាវជ្រាវ​ដែល​ត្រូវ​បាន​ចេញផ្សាយ​នៅក្នុង​កាសែត The Lancet​។​

អ្នក​ដែល​មាន​ទាំង​ជំងឺឆ្កួតជ្រូក និង​ញៀន​សារធាតុ​ញៀន ហាក់ដូចជា​ងាយ​ស្លាប់​ដោយសារ​មូលហេតុ​ដទៃទៀត​ជាង​អ្នក​ដទៃ​ដល់​ទៅ​២២​ដង​។ ភាគច្រើន​នៃ​ការស្លាប់​ដោយសារ​មូលហេតុ​ដទៃ​រួមមាន ការ​សម្លាប់ខ្លួន ហើយ​អ្នក​ដែល​មាន​ជំងឺឆ្កួតជ្រូក​ហាក់ដូចជា​ប៉ុនប៉ង​សម្លាប់​ខ្លួន​ជាង​អ្នកដទៃ​ដល់​ទៅ​៤​ដង​។​

ហ្វា​ហ្សេ​លបាន​បន្ថែមថា ការស្រាវជ្រាវ​បាន​មើល​ទៅលើ​ចំនុច​សំខាន់​នៃ​ការ​សម្លាប់ខ្លួន និង​គ្រោះ​ថ្នាក់​នានា​ដែលជា​មូលហេតុ​នៃ​ការស្លាប់​ដែល​កើតមាន​ញឹកញាប់​ចំពោះ​អ្នក​ជំងឺឆ្កួតជ្រូក​៕