ជារៀងរាល់ថ្ងៃ មនុស្សរាប់ពាន់លាននាក់ពឹងផ្អែកលើជាតិកាហ្វេអ៊ីន ដើម្បីភ្ញាក់ពីដំណេក ឬដើម្បីឆ្លងកាត់វេនយប់ ឬពេលរសៀល។
តាមពិតសារធាតុរំញោចធម្មជាតិនេះ គឺជាគ្រឿងផ្សំមួយក្នុងចំណោមគ្រឿងផ្សំ ដែលត្រូវបានប្រើជាទូទៅបំផុតនៅលើពិភពលោក ។
ជាតិកាហ្វេអ៊ីន ច្រើនតែត្រូវបានគេនិយាយអំពីផលប៉ះពាល់អវិជ្ជមានរបស់វាទៅលើការគេង និងការថប់បារម្ភ។
ទោះយ៉ាងណា ការសិក្សាក៏រាយការណ៍ថា វាមានអត្ថប្រយោជន៍ជាច្រើនចំពោះសុខភាព។
តើកាហ្វេអ៊ីនជាអ្វី?
ជាតិកាហ្វេអ៊ីន គឺជាភ្នាក់ងាររំញោចធម្មជាតិ ដែលត្រូវបានគេប្រើប្រាស់យ៉ាងទូលំទូលាយនៅទូទាំងពិភពលោក។ វាអាចជួយឱ្យអ្នកភ្ញាក់ដឹងខ្លួន និងអាចបំបាត់ភាពនឿយហត់។
របៀបដែលវាដំណើរការ
ឥទ្ធិពលចម្បងរបស់ជាតិកាហ្វេអ៊ីន គឺស្ថិតនៅលើខួរក្បាល។ វារំញោចខួរក្បាល ដោយរារាំងផលប៉ះពាល់នៃប្រព័ន្ធសរសៃប្រសាទ
តើអាហារនិងភេសជ្ជៈអ្វីខ្លះដែលមានជាតិកាហ្វេអ៊ីន?
ជាតិកាហ្វេអ៊ីន ត្រូវបានគេរកឃើញជាទូទៅនៅក្នុងកាហ្វេ តែ ភេសជ្ជៈ សូកូឡា និងភេសជ្ជៈប៉ូវកម្លាំង។
អាចធ្វើអោយអារម្មណ៍និងមុខងារខួរក្បាលប្រសើរឡើង
ជាតិកាហ្វេអ៊ីន អាចធ្វើឱ្យប្រសើរឡើងនូវអារម្មណ៍ កាត់បន្ថយលទ្ធភាពនៃការធ្លាក់ទឹកចិត្ត រំញោចមុខងារខួរក្បាល និងការពារប្រឆាំងនឹងជំងឺភ្លេចភ្លាំង និងវង្វេងវង្វាន់។
អាចជំរុញការរំលាយអាហារនិងដុតខ្លាញ់
ជាតិកាហ្វេអ៊ីន អាចជម្រុញការរំលាយអាហារ និងលើកកម្ពស់ការបាត់បង់ជាតិខ្លាញ់ ប៉ុន្តែប្រសិទ្ធភាពទាំងនេះ ទំនងជានៅតែមានតិចតួចក្នុងរយៈពេលវែង។
អាចបង្កើនការអនុវត្តលំហាត់ប្រាណ
ការទទួលទានជាតិកាហ្វេអ៊ីនក្នុងបរិមាណតិចតួចប្រហែលមួយម៉ោងមុនពេលហាត់ប្រាណទំនងជាធ្វើឱ្យប្រសើរឡើងនូវការធ្វើលំហាត់ប្រាណ។
អាចការពារប្រឆាំងនឹងជំងឺបេះដូង និងទឹកនោមផ្អែម
ភេសជ្ជៈ ដែលមានជាតិកាហ្វេអ៊ីនដូចជា កាហ្វេ និង តែ អាចកាត់បន្ថយហានិភ័យនៃជំងឺបេះដូង និងជំងឺទឹកនោមផ្អែមប្រភេទទី ២។
អត្ថប្រយោជន៍សុខភាពផ្សេងទៀតរបស់កាហ្វេ
ផឹកកាហ្វេអាចជួយជំរុញថ្លើម ស្បែក និងបំពង់រំលាយអាហារ ឱ្យមានសុខភាពល្អ។ វាក៏អាចពន្យារអាយុជីវិត និងជួយការពារជំងឺមួយចំនួន។
សុវត្ថិភាពនិងផលប៉ះពាល់
ជាតិកាហ្វេអ៊ីនអាចមានផលប៉ះពាល់អវិជ្ជមានចំពោះមនុស្សមួយចំនួនរួមមាន ការថប់បារម្ភ ការមិនស្រួល និងបញ្ហានៃការគេង។
កំរិតប្រើដែលបានណែនាំ
ការទទួលទានជាតិកាហ្វេអ៊ីន ២០០ មីលីក្រាម ក្នុងមួយដូស ហើយរហូតដល់ ៤០០ មីលីក្រាម ក្នុងមួយថ្ងៃ ជាទូទៅត្រូវបានគេចាត់ទុកថាមានសុវត្ថិភាព។ ស្ត្រីមានផ្ទៃពោះ គួរតែកំណត់កំរិតទទួលទានប្រចាំថ្ងៃ ២០០ មីលីក្រាម ឬតិចជាងនេះ៕