អ្នកស្រាវជ្រាវ​ជនជាតិ​នរ​វ៉េ​សបាន​និយាយថា បុរស​វ័យ​កណ្តាល​ដែល​មាន​កម្រិត​កូ​ឡេ​ស្តេ​រ៉ុល​ខ្ពស់​គឺ​មាន​ហានិភ័យ​ខ្ពស់​ចំពោះ​ការ​គាំងបេះដូង​ជាង​ស្ត្រី​ដែល​មាន​អាយុ​ប្រហាក់ប្រហែលគ្នា​។​
​នៅ​ក្នុង​ការស្រាវជ្រាវ​លើ​បុរស និង​ស្ត្រី​ជាង​៤០.០០០​នាក់​ដែល​មាន​អាយុ​ក្រោម​៦០​ឆ្នាំ​, បុរស​ដែល​មាន​កម្រិត​កូ​ឡេ​ស្តេ​រ៉ុល​ខ្ពស់​មាន​ហានិភ័យ​នៃ​ការ​គាំងបេះដូង​ច្រើនជាង​៣​ដង បើ​ធៀប​នឹង​ស្ត្រី​ដែល​មាន​កម្រិត​កូ​ឡេ​ស្តេ​រ៉ុល​ខ្ពស់​។​
​វេជ្ជបណ្ឌិត អេ​រីក ម៉េដ​សាន់ (Erik Madssen) បាន​និយាយថា ចំពោះ​អាយុ​វ័យ​កណ្តាល​នេះ​, លទ្ធផល​របស់​យើង​បានបង្ហាញ​ថា កូ​ឡេ​ស្តេ​រ៉ុល​ខ្ពស់​គឺ​ផ្តល់​ការគ្រោះថ្នាក់​ខ្ពស់​ចំពោះ​បុរស​ច្រើនជាង​ស្ត្រី ហើយ​ការការពារ និង​ការព្យាបាល​នៃ​ការ​មានកូ​ឡេ​ស្តេ​រ៉ុល​ខ្ពស់​ចំពោះ​បុរស​វ័យ​កណ្តាល​នេះ មាន​ឥទ្ធិពល​ខ្ពស់​ដើម្បី​បន្ថយ​ការ​មាន​ឡើង​វិញ​នៃ​ការ​គាំងបេះដូង​ចំពោះ​បុរស​។​


​គាត់​បាន​បន្ថែមថា បុរស​ដែល​មាន​អាយុ​ក្រោម​៦០​ឆ្នាំ គួរតែ​ត្រូវបាន​គេ​ធ្វើ​រោគ​វិនិច្ឆ័យ និង​ព្យាបាល​ចំពោះ​បញ្ហា​កូ​ឡេ​ស្តេ​រ៉ុល​ខ្ពស់​។​
​ដើម្បី​បន្ថយ​ហានិភ័យ​នៃ​ការ​គាំងបេះដូង​, បុរស​គួរតែ​ត្រូវបាន​ផ្តល់​ជា​ដំបូន្មាន​អំពី​ការផ្លាស់ប្តូរ​របៀប​រស់​នៅ​ដូច​ជា ចំណីអាហារ និង​ការធ្វើ​លំ​ហាត់ប្រាណ ក៏ដូចជា​ការប្រើ​ថ្នាំ statins ដើម្បី​បន្ថយ​កម្រិត​នៃ​កូ​ឡេ​ស្តេ​រ៉ុល​ជាដើម​។ ម៉េដ​សាន់​បាន​និយាយថា ជា​ពិសេស​នេះ​គឺជា​រឿង​មួយ​ពិត​ចំពោះ​បុរស​ដែល​មាន​ប្រវត្តិ​គ្រួសារ​នៃ​ការ​គាំងបេះដូង និង​អ្នក​ជក់បារី​។​


​មូលហេតុ​ដែល​មាន​ភាព​ខុសប្លែក​គ្នា​ចំពោះ​បុរស និង​ស្ត្រី​នោះ​គឺ​មិន​ច្បាស់​នោះទេ ប៉ុន្តែ​ម៉េដ​សាន់​បាន​គិតថា វា​អាច​មាន​ការ​ធ្វើ​ជាមួយ​នឹង​ឥទ្ធិពល​ការពារ​នៃ​អរ​ម៉ូ​ន​ដូចជា អរ​ម៉ូ​ន​អ៊ឹ​ស្ត្រូ​សែន ដែល​នេះ​ជា​ហេតុ​អ្វី​ដែល​ពួកគេ​បាន​កំណត់​លើ​ការស្រាវជ្រាវ​របស់​ពួក​គេ​លើ​ស្ត្រី និង​បុរស​ដែល​មាន​អាយុ​ក្រោម​៦០​ឆ្នាំ​។​​គាត់​បាន​និយាយថា យើង​ជឿ​ថា ស្ត្រី​ដែល​មាន​អាយុ​ក្រោម​៦០​ឆ្នាំ អាច​ត្រូវបាន​ការពារ​ប្រឆាំង​នឹង​ផលវិបាក​នៃ​ជំងឺ​បេះដូង​មួយចំនួន​នៃ​ការ​មានកូ​ឡេ​ស្តេ​រ៉ុល​ខ្ពស់​នោះ​ដោយសារ​តែ​អរ​ម៉ូ​ន​ភេទ​ញី គឺ​អរ​ម៉ូ​ន​អ៊ឹ​ស្ត្រូ​សែន​។​ការស្រាវជ្រាវ​ត្រូវ​បាន​ចេញផ្សាយ​នៅក្នុង​កាសែត Epidermiology​។​
​អ្នកឯកទេស​មួយរូប​បាន​និយាយថា វា​ជា​រឿង​សំខាន់​ទាំង​បុរស និង​ស្ត្រី​ដើម្បី​រក្សា​កម្រិត​កូ​ឡេ​ស្តេ​រ៉ុល​។​


​វេជ្ជបណ្ឌិត ហ្គ្រេ​ក ហ្វូ​ណារ៉ូវ (Gregg Fonarow) ជា​អ្នកនាំពាក្យ​នៃ​សមាគមន៍​ជំងឺ​បេះដូង​អាមេរិក និង​ជា​សាស្ត្រាចារ្យ​ខាង​ជំងឺ​បេះដូង​នៅ​សាកលវិទ្យាល័យ California បាន​និយាយថា វា​ជា​រឿង​មួយ​ដែល​ត្រូវ​បាន​ដឹង​ច្បាស់​ថា បុរស​មាន​ហានិភ័យ​ខ្ពស់​ចំពោះ​បញ្ហា​នៃ​ការ​គាំងបេះដូង​នៅ​អាយុ​តិចជាង​ស្ត្រី​។​គាត់​បាន​បន្ថែមថា បន្ថែម​ពីលើ​នេះ​, វា​ត្រូវ​បាន​គេ​បង្ហាញ​ថា កម្រិត​កូ​ឡេ​ស្តេ​រ៉ុល​ខ្ពស់​គឺ​ជា​កត្តា​ហានិភ័យ​មួយ​ចំពោះ​បុរស និង​ស្ត្រី​, ហើយ​អ្នក​ទាំង​ពីរ​ភេទ​គឺ​មាន​អត្ថប្រយោជន៍​ស្រដៀង​គ្នា​ចំពោះ​ការការពារ​ពី​ជំងឺ​សរសៃឈាម​បេះដូង​ជាមួយ​នឹង​ការប្រើ​ថ្នាំ statin​។​


​ហ្វូ​ណារ៉ូវ បាន​និយាយថា ការប្រើប្រាស់​នៃ​ការប្រែប្រួល​របៀប​រស់នៅ និង​ការព្យាបាល​ដោយ​ថ្នាំ statin គឺជា​មធ្យោបាយ​មួយ​ដែល​មាន​ប្រសិទ្ធភាព​បំផុត​នោះ​, ជា​ការព្យាបាល​ដែល​មាន​តម្លៃ​ខ្បស់​ដើម្បី​ការពារ​បញ្ហា​សរសៃឈាម​បេះដូង និង​ពន្យារ​អាយុជីវិត​ចំពោះ​បុរស ក៏​ដូច​ជា​ស្ត្រី​ដែរ​។ ការយកចិត្តទុកដាក់​លើ​កម្រិត​កូ​ឡេ​ស្តេ​រ៉ុល និង​កត្តា​ហានិភ័យ​ដទៃទៀត​នៅ​តែ​សំខាន់​ទាំង​បុរស និង​ស្ត្រី​។​​ចំពោះ​ការស្រាវជ្រាវ​, អ្នកស្រាវជ្រាវ​បាន​មើល​ទៅលើ​ស្ត្រី​២៣.៥២៥​នាក់ និង​បុរស​ចំនួន ២០.៧២៥​នាក់​ដែល​មាន​អាយុ​តិចជាង​៦០​ឆ្នាំ​។ អំឡុងពេល​នៃ​ការតាមដាន​អស់​រយៈពេល​ជិត​១២​ឆ្នាំ​, បុរស​៥២២​នាក់​មាន​បញ្ហា​គាំងបេះដូង​ច្រើន បើ​ធៀប​ទៅ​នឹង​ស្ត្រី​ដែលមាន​១៥៧​នាក់​បាន​គាំងបេះដូង​។​​អ្នកស្រាវជ្រាវ​ក៏បាន​មើល​ទៅលើ​អ្នក​គាំងបេះដូង​ក្នុងចំនោម​មនុស្ស​២០.១៣៨​នាក់​ដែល​មាន​អាយុ​លើសពី​៦០​ឆ្នាំ​ផង​ដែរ​។ ទោះជា​យ៉ាងណា​ក៏ដោយ​, ក្នុងចំនោម​អ្នកចូលរួម​, មិន​មាន​ភាព​ខុសប្លែក​គ្នា​ចំពោះ​មនុស្ស​ភេទ​ទាំងពីរ​ក្នុងចំនោម​ហានិភ័យ​នៃ​ការ​គាំងបេះដូង​នោះទេ​៕​