ការស្រាវជ្រាវណែនាំថា ស្ត្រីដែលខ្ពស់និងធាត់ជាងអ្នកដទៃអាចមានគ្រោះថ្នាក់ជំងឺមហារីកស្បូនខ្លាំងជាងអ្នកដទៃ។
ក្រុមស្រាវជ្រាវអន្តរជាតិបានពិនិត្យទិន្នន័យពីការសិក្សាស្រាវជ្រាវ ៤៧ ដែលបានធ្វើឡើងនៅក្នុង ១៤ប្រទេស ដែលបានចូលរួមដោយស្ត្រីមានជំងឺមហារីកស្បូនចំនួន ២៥.០០០នាក់ និងស្ត្រីគ្មានជំងឺ ៨១.០០០នាក់។
ក្រុមអ្នកស្រាវជ្រាវបានរកឃើញថា រៀងរាល់ការកើនឡើង ៥សង់ទីម៉ែត្រនៃកម្ពស់របស់មនុស្សស្រីមានទាក់ទងទៅនឹងការកើនឡើងគួរឱ្យកត់សម្គាល់ក្នុងការកើតមានជំងឺមហារីកស្បូន។ ទម្ងន់ខ្លួនធៀបនឹងកម្ពស់កាន់តែធំក៏មានទំនាក់ទំនងជាមួយនឹងគ្រោះថ្នាក់នៃជំងឺមហារីកស្បូនេះដែរ ប៉ុន្តែចំពោះតែស្ត្រីដែលមិនធ្លាប់ប្រើថ្នាំព្យាបាលអរម៉ូនពេលអស់រដូវតែប៉ុណ្ណោះ។
ក្រុមអ្នកស្រាវជ្រាវបានរកឃើញថា ទំនាក់ទំនងរវាងកម្ពស់និងទម្ងន់និងជំងឺមហារីកស្បូននៅតែមានបើទោះជាគេដាក់រួមបញ្ចូលកត្តាផ្សេងទៀតដែលអាចមានឥទ្ធិពលលើគ្រោះថ្នាក់ជំងឺមហារីកស្បូនក៏ដោយ ដូចជា អាយុ អាយុនៅពេលមានរដូវលើកដំបូង ប្រវត្តិជំងឺមហារីកស្បូនឬសុដន់របស់ក្រុមគ្រួសារ ការប្រើថ្នាំលេបពន្យារកំណើត និងការប្រើប្រាស់គ្រឿងស្រវឹងឬថ្នាំជក់។
កម្ពស់និងទម្ងន់ជាមធ្យមរបស់ស្ត្រីក្នុងប្រទេសមានប្រាក់ចំណូលខ្ពស់បានកើនឡើងក្នុងប៉ុន្មានទសវត្សរ៍កន្លងមកនេះ។
លទ្ធផលនៃការសិក្សាស្រាវជ្រាវមួយធំនេះ បានចេញផ្សាយក្នុងច្បាប់សម្រាប់សប្តាហ៍នេះក្នុងសារពត៌មាន PLoS Medicine។