តាមរបាយការណ៍របស់សមាគមន៍ជំងឺមហារីកអាមេរិកនិងសមាគមន៍សួតពិភពលោកបានឱ្យដឹងថា មនុស្សលើពិភពលោកជិត ៦លាននាក់ដែលបានស្លាប់កាលពីឆ្នាំ ២០១១ កន្លងទៅនេះដោយសារការប្រើប្រាស់ថ្នាំជក់។
សារពត៌មាន Bloomberg បានរាយការណ៍ថា ការស្លាប់ដែលទាក់ទងនឹងការប្រើប្រាស់ថ្នាំជក់បានកើនឡើងស្ទើតែបីដងក្នុងមួយទសវត្សរ៍កន្លងមកនេះ ជាមួយនឹងការកើនឡើងនៃការផលិតបារី ១៧ភាគរយ និងកើនឡើងនៃភាពដែលអាចរកទិញផលិតផលថ្នាំជក់បានក្នុងប្រទេសដែលមានប្រាក់ចំណូលទាប។
ក្នុងឆ្នាំ ២០១១ ការស្លាប់ ៤ ក្នុងចំណោម ៥ករណីនៃការស្លាប់ដែលទាក់ទងនឹងថ្នាំជក់គឺកើតឡើងនៅក្នុងប្រទេសមានប្រាក់ចំណូលទាបនិងមធ្យម។ ការប្រើប្រាស់ថ្នាំជក់គឺជាមូលហេតុនាំមុខគេនៃការស្លាប់នៅប្រទេសចិន ដែលជជាទីផ្សារបារីធំជាងគេបំផុតក្នុងលោក។
ឯកសារនោះបាននិយាយថា ប្រសិនបើអត្រាបច្ចុប្បន្ននេះនៅតែបន្ត នោះការប្រើប្រាស់និងការប៉ះពាល់នឹងថ្នាំជក់ នឹងសម្លាប់មនុស្ស ១.០០០លាននាក់ក្នុងសតវត្សរ៍នេះ។