ឧស្សាហ៍ញ៊ាំ ប៉ុន្តែតិចអត់ដឹង “ល្ហុងទុំ” អាចយកមកប្រើដោះស្រាយបញ្ហាសម្រស់ទាំងនេះ

ទោះជាស្គាល់និងចូលចិត្តញ៊ាំល្ហុងទុំប៉ុណ្ណាក៏ដោយ ក៏ភាគច្រើននៃពួកយើងប្រហែលជាមិនធ្លាប់ដឹងទេថា ផ្លែឈើនេះអាចយកមកប្រើដោះស្រាយបញ្ហាសម្រស់បានយ៉ាងប្រសើរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)  ប៉ុន្តែតើត្រូវយកមកធ្វើដូចម្ដេចទៅ? កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះប្រើប្រាស់ល្ហុងទុំរក្សាសម្រស់ ៖

១. ព្យាបាលសក់ខូច

អ្វីដែលអ្នកត្រូវការ គឺល្ហុងទុំប៉ុន្មានចំណិត ប្រេងអូលីវ ១ ស្លាបព្រាបាយ និងប្រេងដូង ២ ស្លាបព្រាបាយ។ អ្វីដែលអ្នកត្រូវធ្វើ គឺកិនក្រឡុកល្ហុងជាមួយប្រេងអូលីវឱ្យសព្វចូលគ្នា។ បន្ទាប់មកសឹមបន្ថែមប្រេងដូងចូលដើម្បីឱ្យក្លាយជាល្បាយខាប់ៗ។ លាបល្បាយលើសក់និងទុកចោលសម្រាប់រយៈពេល ៣០ នាទី សឹមលាងសម្អាតចេញជាមួយសាប៊ូកក់សក់ដូចពេលធម្មតា។

២. ព្យាបាលសក់បែកចុង

អ្វីដែលអ្នកត្រូវការ គឺល្ហុងទុំនិងទឹកឃ្មុំ។ អ្វីដែលអ្នកត្រូវធ្វើ គឺយកគ្រាប់ល្ហុងចេញ រួចហាន់ល្ហុងជាដុំតូចៗ។ ដាក់ល្ហុងក្នុងម៉ាស៊ីនកិន ឬក្រឡុក រួចបន្ថែមទឹកឃ្មុំកន្លះស្លាបព្រាបាយចូល។ កិនក្រឡុកឱ្យសព្វម៉ដ្ឋ រួចសឹមលាបម៉ាស្សាលើសក់និងស្បែកក្បាល។ ទុកចោលសម្រាប់រយៈពេលប្រហែល ១ ម៉ោង សឹមប្រើប្រាស់សាប៊ូកម្រិតស្រាលកក់សម្អាតចេញជាការស្រេច។

៣. កម្ចាត់រន្ធញើសធំពីស្បែក

អ្វីដែលអ្នកត្រូវធ្វើ គឺគ្រាន់តែកិនល្ហុងទុំប៉ុន្មានដុំឱ្យម៉ដ្ឋ រួចលាបម៉ាស្សាលើស្បែកមុខដែលមានបញ្ហា។ រងចាំសម្រាប់រយៈពេល ២០នាទី សឹមលាងសម្អាតចេញជាការស្រេច។

៤. ជួយឱ្យស្បែកក្មេងជាងវ័យ

ល្ហុងទុំមានផ្ទុកសម្បូរទៅដោយវីតាមីន A និងវីតាមីន C ជាពិសេសអង់ស៊ីម papain ដែលល្អសម្រាប់សុខភាពស្បែកប្រឆាំងភាពចាស់តាមវ័យ។ អ្វីដែលអ្នកត្រូវធ្វើ គឺគ្រាន់តែប្រើប្រាស់ស្លាបព្រាកោសយកផ្នែកខាងក្នុងនៃសំបកផ្លែល្ហុងទុំ។ បន្ទាប់មកលាបម៉ាស្សាសាច់ល្ហុងនោះលើស្បែកមុខ។ រងចាំសម្រាប់រយៈពេល ៣០ នាទី សឹមលាងសម្អាតចេញជាមួយទឹកក្ដៅឧណ្ហៗជាការស្រេច។

៥. ព្យាបាលស្បែកមុខខ្លាញ់

ចូរកិនល្ហុងទុំឱ្យម៉ដ្ឋរួចបន្ថែមស្ករសប្រហែល ២ ស្លាបព្រាកាហ្វេចូល។ លាបម៉ាស្សាល្បាយថ្នមៗលើស្បែកមុខសម្រាប់រយៈពេលពី ២ ទៅ ៣នាទី​ សឹមលាងសម្អាតចេញ។

៦. ព្យាបាលស្បែកអាចម៍រុយ

អ្វីដែលអ្នកត្រូវធ្វើ គឺគ្រាន់តែកិនល្ហុងទុំមួយដុំតូចឱ្យម៉ដ្ឋ រួចលាបវាលើស្នាមអាចម៍រុយនិងទុកចោលសម្រាប់រយៈពេលពី ១៥ ទៅ ២០ នាទី សឹមលាងសម្អាតចេញជាការស្រេច។

៧. កម្ចាត់ស្នាមខ្មៅក្រោមភ្នែក

អ្វីដែលអ្នកត្រូវធ្វើ គឺគ្រាន់តែបន្ទះល្ហុងទុំស្ដើងមួយបន្ទះលើភ្នែកនៅពេលសម្រាក។ អ្នកក៏អាចកិនល្ហុងទុំមួយដុំតូចឱ្យម៉ដ្ឋដោយប្រើសមនិងលាបសាច់ល្ហុងនេះក្រោមភ្នែក។ រងចាំសម្រាប់រយៈពេល ១០ នាទី សឹមសម្អាតចេញ។

៨. កម្ចាត់ស្នាមមុន និងស្នាមជាំអ៊ុចខ្មៅ

អ្វីដែលអ្នកត្រូវធ្វើ គឺគ្រាន់តែយកចំណិតបន្ទះល្ហុងខ្លះមកបិតលើផ្ទៃមុខកន្លែងទទួលរងផលប៉ះពាល់ ហើយម៉ាស្សាសម្រាប់រយៈពេល ១០ នាទី សឹមលាងសម្អាតចេញ។ ឬក៏អ្នកអាចយកល្ហុងមួយចំនួនមកកិនឱ្យម៉ដ្ឋ រួចលាយម្ស៉ៅរមៀត ១ ច្បិច និងទឹកក្រូចឆ្មារស្រស់ចំនួនសមល្មមចូល ហើយកូរឱ្យសព្វ សឹមលាបលើផ្ទៃមុខ រួចទុកចោលរហូតដល់ស្ងួត សឹមលាងចេញជាការស្រេច។ អនុវត្តរូបមន្តនេះ ២ ដងក្នុងមួយសប្តាហ៍៕