(ភ្នំពេញ)៖ តារាចម្រៀងប្រចាំផលិតកម្មហង្សមាសអ្នកនាង ពេជ្រ សោភា បានបង្ហើបឱ្យដឹងថា នាងប្រឹងធ្វើការធម្មតាតាមទៅទម្លាប់ដោយមិនខ្វល់ច្រើនរឿងតារាសម្តែងលោក ឆឹម សក្កដា ដែលជាសង្សារនឹងគ្នាឡើយក៏ព្រោះចង់ទុកពេលវេលាជូនខាងប្រុស។
តារាចម្រៀងចាស់វស្សាដែលមិនព្រមទម្លាប់ដៃ បានអះអាងពេលបង្ហាញវត្តមានក្នុងការប្រគំ តន្ត្រីរបស់ស្ថានីយទូរស្សន៍លេខ៥ ខារ៉ាបាវ ស្ប៉ាក តាវេងដេន ខនសឺត (Caraboa Spark Tawaden Concert) កាលចុងសប្តាហ៍កន្លងមកនេះ ថា មួយរយៈពេលដែលមិនសូវឃើញលោក ឆឹម សក្កដា ទៅណាមក ឬ បង្ហាញមុខជាមួយនាងតាមកម្មវិធីនានានោះ ក៏ព្រោះតែទីផ្សារការងារ របស់លោក សក្កដា ឡើងល្អជាងមុនដែលធ្វើឱ្យលោកមមាញឹក ។
អ្នកនាង ពេជ្រ សោភា បានបញ្ជាក់ថា ស្នេហានាងរវាងនាងនិងលោក ឆឹម សក្កដា គឺមានទំនាក់ទំនង ធម្មតានៅឡើយគ្មានបញ្ហាអ្វីប្រែប្រួលឡើយ។ មូលហេតុដែលខាងប្រុសមិនសូវលេចមុខនៅជាមួយគ្នា ដោយសារតែនាងចង់ឱ្យខាងប្រុសខំប្រឹងរកលុយឱ្យច្រើន ដើម្បីអនាគត ហើយនាងមិនចង់ចំណាយ ពេលច្រើនមកតាមនោះទេ។ ពេលទំនេរបានជួបគ្នា ហើយបើមានការងារធ្វើរៀងខ្លួនគឺរវល់បែបនេះ គ្មានបញ្ហាអ្វី ឬ រឿងអ្វីកើតឡើង រវាងនាង និង លោក ឆឹម សក្កដា ឡើយ។
សូមរំលឹកថា ទំនាក់ទំនងស្នេហារបស់ អ្នកនាង ពេជ្រ សោភា បានកើតឡើងក្រោយនាងបញ្ចប់ ចំណងអាពាហ៍ពិពាហ៍ជាមួយអណិកជនខ្មែរអាមេរិកជាច្រើនឆ្នាំមកហើយក៏ស្រាប់តែលេចមុខ លោក ឆឹម សក្កដា តារាសម្តែងរូបសង្ហា ដែលនាងហ៊ានបង្ហាញជាសាធារណៈ និងបង្ហាញ សកម្មភាពយ៉ាងផ្អែមល្ហែមជាហូរហែរនៅលើបណ្តាញសង្គមហ្វេសប៊ុកធ្វើឱ្យមហាជនភ្ញាក់ផ្អើល ប៉ុន្តែទំនាក់ទំនងរបស់តារាល្បីពីររូបនេះក៏មានរយៈពេលយូរមកហើយ ដូច្នេះមហាជនក៏បាន សង្ស័យថា ទំនាក់ទំនងនេះអាចកំពុងមានបញ្ហា ព្រោះមួយរយៈនេះមិនសូវឃើញមុខលោក ឆឹម សក្កដា តាមអ្នកនាង ពេជ្រ សោភា ៕
ប្រភព៖ rasmeinews.com
