ងាយៗ! “កម្ចាត់រន្ធញើសធំពីស្បែក” ដោយមិនបាច់ចំណាយប្រាក់ច្រើន ជាមួយរូបមន្តបែបធម្មជាតិ

គ្មាននរណាចង់បានស្បែកមុខមានរន្ធញើសធំៗឡើយ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)  ហើយបញ្ហានេះអាចបណ្ដាលមកពីទម្លាប់ប្រចាំថ្ងៃមួយចំនួនដែលយើងស្មានមិនដល់រួមមានការប្រើប្រាស់ផលិតផលលាងសម្អាតស្បែកមុខមិនត្រូវប្រភេទ ការទទួលទានអាហារខុស មិនខាត់សម្អាតស្បែកមុខឱ្យបានទៀងទាត់ និងត្រូវកម្ដៅថ្ងៃច្រើនពេកជាដើម។ ប៉ុន្តែកុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗដោះស្រាយបញ្ហារន្ធញើសធំ ៖

១. ទឹកខ្មេះផ្លែប៉ោម

អ្វីដែលអ្នកត្រូវធ្វើ គឺគ្រាន់តែលាយទឹកខ្មេះផ្លែប៉ោមជាមួយទឹកធម្មតាក្នុងបរិមាណស្មើគ្នា។ កូរឱ្យសព្វ សឹមប្រើប្រាស់ដុំសំឡីជ្រលក់ក្នុងទឹកល្បាយនិងលាបផ្ដិតៗលើស្បែកមុខកន្លែងដែលមានបញ្ហា។ រងចាំសម្រាប់រយៈពេលពី ២ ទៅ ៣ នាទី សឹមលាងសម្អាតចេញ។ រូបមន្តសាកសមសម្រាប់អនុវត្តមុនពេលចូលគេងក្រោយពេលអ្នកលាងសម្អាតមុខរួច។

២. ប្រទាលកន្ទុយក្រពើ

ជាដំបូងត្រូវលាងសម្អាតស្បែកមុខរបស់អ្នកជាមុនសិន បន្ទាប់មកសឹមលាបម៉ាស្សាជែលប្រទាលកន្ទុយក្រពើស្រស់សម្រាប់រយៈពេលពី ២ ទៅ ៣នាទីលើតំបន់ស្បែកដែលទទួលរងផលប៉ះពាល់។ រងចាំសម្រាប់រយៈពេល ១០នាទី សឹមលាងសម្អាតចេញជាមួយទឹកត្រជាក់។

៣. ស្ករស

អ្វីដែលអ្នកត្រូវធ្វើ គឺគ្រាន់តែលាយស្ករស ២ ស្លាបព្រាបាយជាមួយប្រេងអូលីវ ១ ស្លាបព្រាបាយ រួចកូរអោយសព្វសឹមលាងម៉ាស្សាល្បាយថ្នមៗលើផ្ទៃមុខកន្លែងដែលមានរន្ធញើសធំ។ លាងសម្អាតចេញជាមួយទឹកក្ដៅឧណ្ហៗជាការស្រេច។ អនុវត្តអោយបានពី ២ ទៅ ៣ ដងក្នុងមួយសប្តាហ៍។ អ្នកក៏អាចលាយស្ករសជាមួយក្រូចឆ្មារនិងប្រេងអូលីវដោយជាដំបូងត្រូវលាយប្រេងអូលីវ ១ស្លាបព្រាបាយជាមួយស្ករ ២ស្លាបព្រាបាយនិងទឹកក្រូចឆ្មារស្រស់ពី ២ ទៅ ៣ដំណក់។ បន្ទាប់មកដុសលាបល្បាយលើស្បែកដែលបញ្ហាសម្រាប់រយៈពេលពី ២០ ទៅ ៣០វិនាទី សឹមលាងសម្អាតចេញជាមួយទឹកត្រជាក់។ អ្នកអាចអនុវត្ត ២ដងក្នុងមួយសប្តាហ៍។

៤. ល្ហុងទុំ

កិនល្ហុងទុំប៉ុន្មានដុំឱ្យម៉ដ្ឋ រួចលាបម៉ាស្សាលើស្បែកមុខដែលមានបញ្ហា។ រងចាំសម្រាប់រយៈពេល ២០នាទី សឹមលាងសម្អាតចេញជាការស្រេច។

៥. ម្សៅ Baking Soda

លាយម្សៅ Baking soda ២ ស្លាបព្រាបាយជាមួយទឹកធម្មតា ២ ស្លាបព្រាបាយ។ កូរឱ្យក្លាយជាល្បាយខាប់ៗ សឹមលាបម៉ាស្សាលើស្បែកមុខក្នុងបែបរង្វង់ និងរងចាំសម្រាប់រយៈពេល ១៥ នាទី សឹមលាងសម្អាតចេញជាមួយទឹកត្រជាក់។ អ្នកអាចអនុវត្តពី ៣ ទៅ ៥ ដងក្នុងមួយសប្តាហ៍៕