ភាពតានតឹងក្នុងអារម្មណ៍ ឬស្ត្រេសអាចជាមូលហេតុចម្បងបំផុតមួយនៃបញ្ហាជំងឺជាច្រើន។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) នោះក៏ព្រោះតែស្ត្រេសកាត់បន្ថយភាពរឹងមាំនៃប្រព័ន្ធភាពស៊ាំគួរឱ្យបារម្ភដែលមិនត្រឹមតែបង្កើនហានិភ័យនៃជំងឺផ្សេងៗប៉ុណ្ណោះទេ ប៉ុន្តែក៏ជះផលប៉ះពាល់ដល់ស្បែកផងដែរ។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីផលប៉ះពាល់នៃភាពតានតឹងក្នុងអារម្មណ៍ចំពោះស្បែក ៖
១. រោគមុន
ជាពិសេសប្រសិនបើអ្នកមានស្បែកដែលងាយនឹងកើតមុន! ដូច្នេះដើម្បីជាការប្រសើរចូរព្យាយាមគ្រប់គ្រងកម្រិតនៃភាពស្ត្រេសកុំឱ្យខ្ពស់ពេក។ ការរលាកអាចនឹងកើតឡើងដោយសារកំណើននៃអ័រម៉ូនក្នុងរាងកាយ ហើយអ្វីដែលគួរឱ្យបារម្ភនោះ គឺរោគមុនតែងផ្សារភ្ជាប់នឹងការរលាក។
២. ស្នាមជ្រីវជ្រួញ
ភាគច្រើននៃពួកយើងប្រហែលជាមិនធ្លាប់ដឹងទេថា ស្ត្រេសក៏ជាកត្តាចម្បងមួយដែលធ្វើឱ្យស្បែកឆាប់ចាស់ជ្រីវជ្រួញ។ នេះក៏ព្រោះតែកម្រិតនៃអ័រម៉ូនស្ត្រេសកើនឡើងខ្ពស់អាចពន្លឿនការបំបែកកូឡាជែន។
៣. ស្បែកឡើងខ្លាញ់ខ្លាំង ឬស្ងួតពេក
មិនថាអ្នកមានស្បែកស្ងួត ឬខ្លាញ់នោះទេ វាចាំបាច់ណាស់ក្នុងការរក្សាកម្រិតនៃភាពស្ត្រេសមិនឱ្យខ្ពស់ពេក។ បើមិនដូច្នោះទេ អ្នកអាចនឹងជួបប្រទះបញ្ហាស្បែកផ្សេងៗកាន់តែគួរឱ្យបារម្ភ។ អ័រម៉ូនស្ត្រេសអាចជះឥទ្ធិពលអវិជ្ជមានជាច្រើនប្រភេទលើស្បែក។ អ្នកខ្លះអាចជួបបញ្ហាស្បែកស្ងួតខ្លាំង ខណៈដែលអ្នកមួយចំនួនទៀតជួបប្រទះបញ្ហាស្បែកឡើងខ្លាញ់លើស។
៤. ជំងឺសើស្បែកត្រអក (Eczema)
កម្រិតនៃអ័រម៉ូនស្ត្រេសកើនឡើងខ្ពស់ក៏ជាកត្តាចម្បងមួយនៃជំងឺសើស្បែកត្រអកដែរ។ ហើយជំងឺសើស្បែកនេះអាចនឹងបណ្ដាលឱ្យអ្នកកាន់តែស្ត្រេសលើសដើមថែមទៀត។
៥. ជំងឺពងបែកមាត់
មួយក្នុងចំណោមមូលហេតុទូទៅបំផុតដែលបង្កបញ្ហាពងបែកមាត់នោះ គឺភាពតានតឹងក្នុងអារម្មណ៍ ឬស្ត្រេស។ ដូច្នេះដើម្បីជាការប្រសើរចៀសផុតពីបញ្ហានេះ អ្នកគួរព្យាយាមគ្រប់គ្រងកម្រិតនៃភាពស្ត្រេសមិនឱ្យកើនឡើងខ្ពស់ពេក។
សម្គាល់ ៖ អ្នកជំនាញជាច្រើនបានបង្ហាញថាបញ្ហាស្បែកផ្សេងៗក៏អាចកើតមានឡើងដោយសារតែភាពតានតឹងក្នុងអារម្មណ៍ ឬស្ត្រេសខ្លាំងផងដែរ។ កម្រិតនៃភាពតានតឹងក្នុងអារម្មណ៍ខ្ពស់ធ្វើឱ្យស្បែកងាយនឹងឆ្លងមេរោគ៕