នាថ្ងៃចន្ទទី០១ មីនា នេះ ប្រទេសហ្វីលីពីន បានចាប់ផ្តើមយុទ្ធនាការចាក់វ៉ាក់សាំងការពារកូវីដ-១៩ហើយ។ មន្ត្រីក្នុងគណៈរដ្ឋមន្ត្រី រួមជាមួយបុគ្គលិកវេជ្ជសាស្ត្រ យោធា និងប៉ូលិស បានស្ថិតចំណោមក្រុមមនុស្សដំបូងគេដែលចាក់វ៉ាក់សាំងនៅមន្ទីរពេទ្យចំនួន៦ក្នុងក្រុងម៉ានីល បន្ទាប់ពីប្រធានាធិបតីនិងមន្ត្រីជាន់ខ្ពស់ដទៃទៀត។
ដោយវ៉ាក់សាំងដែលទទួលបានមានចំនួន៦សែនដូស គឺសំរាប់ចាក់បានតែមនុស្ស៣សែននាក់ ដូច្នេះ ការចាក់នៅថ្ងៃចន្ទនេះ គ្រាន់តែជានិម្មិតរូប។
ក្រៅពីវ៉ាក់សាំងជំនួយនេះ ហ្វីលីពីនបានបញ្ជាទិញវ៉ាក់សាំង២៥លានដូសទៀតពីក្រុមហ៊ុនដដែល។ វាជាចំណែកមួយក្នុងចំណោមវ៉ាក់សាំង១៤៨លានដូស ដែលរដ្ឋាភិបាលបានចរចាទិញមកពីក្រុមហ៊ុនផ្សេងៗ រួមទាំងក្រុមហ៊ុនអាស៊ី និងលោកខាងលិច។
រដ្ឋមន្ត្រីសុខាភិបាលហ្វីលីពីននៅថ្ងៃនេះក៏បានអោយដឹងថា វ៉ាក់សាំងកូវីដ-១៩របស់ក្រុមហ៊ុនAstraZeneca ចំនួនជាងកន្លះលានដូស ដែលគ្រោងដឹកមកដល់នៅថ្ងៃចន្ទនេះ ត្រូវបានពន្យារពេល១សប្តាហ៍ទៀត។
គួរបញ្ជាក់ថា ហ្វីលីពីន ស្ថិតចំណោមប្រជាជាតិអាស៊ីអាគ្នេយ៍ចុងក្រោយគេក្នុងការទទួលវ៉ាក់សាំងកូវីដ១៩ ដោយសារការពន្យារពេលដឹកជញ្ជូន។
ប្រទេសនេះមានអ្នកឆ្លងជំងឺកូវីដ-១៩ សរុប៥៧៦.០០០នាក់ និង១២.៣១៨នាក់ស្លាប់ ដែលជាចំនួនឆ្លងនិងស្លាប់ដោយកូវីដ-១៩ខ្ពស់បំផុតលំដាប់ទី២នៅអាស៊ីអាគ្នេយ៍ បន្ទាប់ពីឥណ្ឌូនេស៊ី៕