ទោះបីជាស្គាល់និងឧស្សាហ៍ញ៊ាំ ប៉ុន្តែភាគច្រើននៃពួកយើងប្រហែលជាមិនធ្លាប់ចាប់អារម្មណ៍ពីអត្ថប្រយោជន៍ដ៏ប្រសើររបស់បន្លែនេះចំពោះសុខភាពឡើយ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើម្ទេសផ្លោកពណ៌ស្វាយអាចផ្ដល់ផលល្អយ៉ាងណាខ្លះ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកគួររួមបញ្ចូលម្ទេសផ្លោកពណ៌ស្វាយក្នុងរបបអាហារប្រចាំថ្ងៃ ៖

១. ពង្រឹងប្រព័ន្ធភាពស៊ាំរាងកាយ

ម្ទេសផ្លោកពណ៌ស្វាយមានផ្ទុកសម្បូរទៅដោយវីតាមីន C ដែលចាំបាច់សម្រាប់ប្រព័ន្ធភាពស៊ាំរាងកាយជួយឱ្យកាន់តែរឹងមាំ។ នេះមានន័យថាការរួមបញ្ចូលបន្លែនេះក្នុងរបបអាហារប្រចាំថ្ងៃអាចជួយកាត់បន្ថយហានិភ័យនៃរោគឆ្លងផ្សេងៗ ជាពិសេសជំងឺផ្ដាសាយ ឬគ្រុនផ្ដាសាយ។

២. ល្អសម្រាប់សុខភាពអញ្ចាញធ្មេញ

ការទទួលទានម្ទេសផ្លោកពណ៌ស្វាយក៏អស្ចារ្យសម្រាប់ការញញឹមរបស់អ្នកផងដែរ។ ពួកយើងសុទ្ធតែដឹងហើយថាវីតាមីន C គឺល្អសម្រាប់ពង្រឹងប្រព័ន្ធភាពស៊ាំ។ ប៉ុន្តែថាតើអ្នកធ្លាប់ដឹងទេថាវាក៏សំខាន់សម្រាប់រក្សាសុខភាពអញ្ចាញធ្មេញគួរឱ្យកត់សម្គាល់? ជាមួយនឹងអញ្ចាញដែលរឹងមាំមានសុខភាពល្អ អ្នកប្រាកដជាមិនខ្លាចនឹងការញញឹមស្រស់ឡើយ។

៣. ជួយឱ្យស្បែកក្មេងជាងវ័យ

វីតាមីន C គឺល្អណាស់សម្រាប់ស្បែក។ នេះក៏ព្រោះតែវីតាមីន C ជាសារធាតុប្រឆាំងអុកស៊ីតកម្មដ៏មានឥទ្ធិពលដែលកម្ចាត់រាល់រ៉ាឌីកាល់សេរីមុនពេលវាបង្កការបំផ្លាញដល់កោសិកាស្បែក។ ម្យ៉ាងវិញទៀតវីតាមីនផ្សេងៗដែលមានផ្ទុកក្នុងម្ទេសផ្លោកពណ៌ស្វាយក៏ចាំបាច់សម្រាប់ការផលិតកូឡាជែនផងដែរ។

៤. ធ្វើឱ្យសុខភាពភ្នែកកាន់តែមានលក្ខណៈប្រសើរឡើង

វីតាមីនដ៏សំខាន់មួយទៀតដែលមានផ្ទុកក្នុងម្ទេសផ្លោកពណ៌ស្វាយនោះ គឺវីតាមីន A ដែលចាំបាច់ណាស់សម្រាប់រក្សាពង្រឹងសុខភាពភ្នែកជួយឱ្យការមើលឃើញរបស់អ្នកកាន់តែប្រសើរឡើង។ ការទទួលទានអាហារសម្បូរវីតាមីន A ឬការរួមបញ្ចូលម្ទេសផ្លោកពណ៌ស្វាយក្នុងរបបអាហារប្រចាំថ្ងៃពិតអាចជួយកាត់បន្ថយហានិភ័យនៃជំងឺភ្នែកផ្សេងៗគួរឱ្យកត់សម្គាល់។

៥. បង្កើនថាមពល

ម្ទេសផ្លោកពណ៌ស្វាយក៏ជាប្រភពដ៏ប្រសើរនៃវីតាមីនក្រុម B ដែលចាំបាច់សម្រាប់ការបំលែងអាហារទៅជាថាមពល។ វីតាមីនក្រុម B ក៏ល្អសម្រាប់ប្រព័ន្ធសសៃប្រសាទផងដែរ។ បន្ថែមពីនេះវីតាមីន B មួយប្រភេទ គឺហ្វូឡេត (Folate) ដែលម្ទេសផ្លោកពណ៌ស្វាយមានផ្ទុក គឺល្អសម្រាប់ស្ត្រីមានផ្ទៃពោះ។

៦. ប្រឆាំងការរលាកក្នុងរាងកាយ

ម្ទេសផ្លោកពណ៌ស្វាយជាប្រភពដ៏ប្រសើរនៃសារធាតុ capsaicin ដែលមានលក្ខណៈសម្បត្តិប្រឆាំងការរលាកក្នុងរាងកាយ។ ដូច្នេះការរួមបញ្ចូលម្ទេសផ្លោកក្នុងរបបអាហារប្រចាំថ្ងៃ គឺល្អណាស់សម្រាប់ទប់ស្កាត់បញ្ហាសុខភាពផ្សេងៗដែលទាក់ទងនឹងការរលាកដូចជាជំងឺបេះដូងនិងជំងឺមហារីក។ រោគមុននិងបញ្ហាស្បែកផ្សេងៗទៀតក៏ត្រូវបានរួមបញ្ចូលផងដែរ។

៧. បញ្ចុះសម្ពាធឈាម

ម្ទេសផ្លោកពណ៌ស្វាយមានផ្ទុកសម្បូរទៅដោយប៉ូតាស្យូមដែលជួយគ្រប់គ្រងកម្រិតនៃសម្ពាធឈាមបានយ៉ាងប្រសើរ។

៨. គ្រប់គ្រងចលនាពោះវៀន

ការទទួលទានម្ទេសផ្លោកពណ៌ស្វាយ គឺល្អសម្រាប់ដោះស្រាយ ក៏ដូចជាទប់ស្កាត់អាការៈទល់លាមក។ នេះក៏ព្រោះតែវាជាប្រភពដ៏ប្រសើរនៃជាតិសសៃដែលជួយកម្ចាត់ជាតិពុលនិងកាកសំណល់ចេញពីពោះវៀន។ ម្យ៉ាងវិញទៀតជាតិសសៃក៏អាចកាត់បន្ថយហានិភ័យនៃជំងឺឬសដូងបាតនិងមហារីកពោះវៀនធំគួរឱ្យកត់សម្គាល់៕