ទោះបីជា រាងកាយរបស់យើងម្នាក់ៗ ត្រូវការកូលេស្ដេរ៉ូលខ្លះក៏ពិតមែន តែសារធាតុនេះ ផ្តល់ ឲ្យនូវគុណវិបត្តិច្រើនជាងគុណសម្បត្តិ។ ចំនួនដ៏ច្រើននៃកូលេស្ដេរ៉ូល មិនត្រឹមតែ ធ្វើឲ្យមាននូវជំងឺ បេះដូង សំពាធឈាមឡើងខ្ពស់ និង ជំងឺដាច់សសៃឈាមខួរក្បាលប៉ុណ្ណោះទេ ប៉ុន្តែវាក៏អាចបង្កើតជា ក្រួសក្នុងប្រម៉ាត់ផងដែរ។ ទោះជាក្រួសទាំងនេះ តូចៗក៏ពិតមែន ប៉ុន្តែវាអាចបង្ករការឈឺចាប់យ៉ាង ខ្លាំង។
ក្រួសទាំងនេះ កើតមាននៅក្នុងថង់ប្រម៉ាត់ ជាទីតាំងសំរាប់ផ្ទុកទឹកប្រម៉ាត់ ដែលរាងកាយយើង ប្រើប្រាស់សំរាប់រំលាយខ្លាញ់ នៅក្នុងពោះវៀនតូច។ ទឹកប្រម៉ាត់ ជាធម្មតាមានសភាពរាវ ហើយមាន ផ្ទុកភាគល្អិតតូចៗ ដូចជាកូលេស្ដេរ៉ូល ប្រូតេអ៊ីន និងខ្លាញ់។
វេជ្ជបណ្ឌិត Henry A. Pitts សាស្ត្រាចារ្យផ្នែកវះកាត់ និង ជាប្រធាន ផ្នែកវះកាត់ថ្លើម លំពែងនិង ប្រម៉ាត់នៅមន្ទីពេទ្យ Johns Hopkins រដ្ឋ Baltimore សហរដ្ឋអាមេរិក និយាយថា ប៉ុន្តែនៅពេលដែល នៅក្នុងរបបអាហារយើង យើងញ៉ាំខ្លាញ់ និងកូលេស្ដេរ៉ូលច្រើន ភាគល្អិតតូចៗទាំងនេះ ទំនងជា អាចផ្តុំ គ្នាបង្កើតជា ក្រួសបាន។ គាត់បន្តទៀតថា ដូច្នេះហើយដំបូន្នានល្អបំផុតសំរាប់អ្នក ដែលងាយ កើត ក្រួស ក្នុងប្រម៉ាត់ គេគួរតែញ៉ាំឲ្យបានតិចជាងមុននូវ សាច់ក្រហម អាហារធ្វើពីទឹកដោះគោ មានខ្លាញ់ ច្រើន និងអាហារ ទាំងឡាយណាដែលមានខ្លាញ់ និងកូលេស្ដេរ៉ូលច្រើន។
វិធីម្យ៉ាងទៀតដើម្បី ជួយបង្ការពីក្រួសក្នុងប្រម៉ាត់នេះ គឺញ៉ាំតិចជាងមុន តែច្រើនដង។ ដោយ សារតែ ក្រួសក្នុងប្រម៉ាត់បង្ករឡើងពី ការផ្តុំគ្នានៃកំទេចកំទីល្អិតៗ ការដែលថង់ទឹកប្រម៉ាត់កន្ត្រាក់ញឹក ញាប់ជាងមុន អាចជួយការពារយកកំទេចកំទីល្អិតៗទាំងនេះចេញ មុនពេលវាផ្តុំជាក្រួស។ ថង់ទឹក ប្រម៉ាត់កន្ត្រាក់នៅពេលដែលអ្នកញ៉ាំ ដូច្នេះការញ៉ាំតិច តែច្រើនដងក្នុងមួយថ្ងៃ ប្រសើរជាងការញ៉ាំ ច្រើន តែពីរ ឬបីដង ដោយសារតែវាអាចជួយធ្វើអោយថង់ទឹកប្រម៉ាត់ សកម្ម និង មិនមាននូវកំទេចកំទី ល្អិតៗ។ អ្នកស្រាវជ្រាវនៅមហាវិទ្យាល័យរ៉ូម បានពិនិត្យមើលនូវ ចលនារបស់ថង់ទឹកប្រម៉ាត់ ដោយប្រើប្រាស់បចេ្ចកវិទ្យា អ៊ុលត្រាសោន(Ultrasound) ហើយបានរកឃើញថាការញ៉ាំអាហារញឹក ញាប់ធ្វើឲ្យ ថង់ប្រម៉ាត់ក្រឡាប់ឡើងលើខ្ពស់ ដែលទំនងជាធ្វើអោយកំទេចកំទី មិនអាចករជាក្រួស បានឡើយ។ ការផឹកទឹកច្រើន ក៏ជួយការពារមិនឲ្យករជា ក្រួសបានដែរ។
វេជ្ជបណ្ឌិតMichael D. Myers គ្រូពេទ្យគ្លីនិកឯកជន នៅ Los Alamitos រដ្ឋCalifornia និយាយ ថាមនុស្សដែលលើសទំងន់ ទំនងជាអាចមាន ជំងឺគ្រោះក្នុងប្រម៉ាត់ច្រើន ជាងអ្នកស្គម។ គាត់បាន ពន្យល់ថា“មួយផោននៃខ្លាញ់នៅក្នុងរាងកាយរបស់អ្នក បង្កើតបានជា១០ មីលីក្រាម នៃកូលេស្ដេរ៉ុល”។
ដូច្នេះហើយក្រៅពីកាត់បន្ថយនូវអាហារ ដែលមានជាតិខ្លាញ់ខ្ពស់ ប្រការល្អ គួរតែញ៉ាំ ផ្លែឈើ បន្លែ សណ្តែកកួរ និង គ្រាប់ធញ្ញជាតិ ដោយសារតែអាហារទាំងនេះជាអាហារមូលដ្ឋាន ក្នុងការសម្រក ទំងន់។
វេជ្ជបណ្ឌិត Myers បន្តទៀតថា ថ្វីត្បិតតែការសម្រកទំងន់ អាចជួយការពារជំងឺគ្រោះក្នុងប្រម៉ាត់
ប៉ុន្តែការស្រកទំងន់ច្រើនពេក និងឆាប់រហ័ស អាចមានផលប៉ះពាល់មិនល្អទៅវិញទេ ដោយសារតែវា ធ្វើឲ្យកូលេស្ដេរ៉ុល ក្នុងប្រម៉ាត់កើនឡើង។ ផលប៉ះពាល់ដូចគ្នានេះកើតមានចំពោះអ្នក ដែលអនុវត្តរបប អាហារដែលមានជាតិខ្លាញ់ទាបផងដែរ។ កាលណាដែលអ្នក កាត់បន្ថយរបបអាហាររបស់អ្នក តាម ធម្មជាតិ ប្រម៉ាត់ នឹង ធ្វើការមិនសូវសកម្ម ដែលនេះអាចធ្វើឲ្យកករខាប់ផ្តុំគ្នាជា ដុំៗបាន។
វេជ្ជបណ្ឌិត Dominic Nompleggi សាស្ត្រាចារ្យផ្នែកសល្យសាស្ត្រ នៅមហាវិទ្យាល័យ Massachusetts នាទីក្រុងWorcester សហរដ្ឋអាមេរិក និយាយថា ប្រសិនបើ យើងរាប់កាឡូរី វិញ ចំនួនចន្លោះពី ១០០០-១២០០ ក្នុងមួយថ្ងៃ នឹងជួយឲ្យយើងស្រកទំងន់ ដោយមិនប្រឈមមុខនឹងក្រួស ក្នុងប្រម៉ាត់។