អ្នកឯកទេសបាននិយាយថា ការគ្រប់គ្រងសម្ពាធឈាមរបស់អ្នកគឺជារឿងសំខាន់បំផុតដែលអ្នកអាចធ្វើដើម្បីជួយបន្ថយហានិភ័យនៃជំងឺដាច់សរសៃឈាមខួរក្បាលដែលជាមូលហេតុទី៤សំខាន់មួយនាំអោយមនុស្សស្លាប់។
ផ្ទុយមកវិញ, មនុស្សជាច្រើនមិនដឹងថា ពួកគេមានហានិភ័យនៃការមានសម្ពាធឈាមខ្ពស់ឬយ៉ាងណានោះទេ។នេះដោយយោងតាមសមាគមជំងឺបេះដូងអាមេរិក។
ជំងឺបេះដូង និងជំងឺដាច់សរសៃឈាមខួរក្បាលគឺជាហានិភ័យខ្ពស់សម្រាប់អ្នកដែលមានជំងឺលើសឈាម។
ប្រវត្តិគ្រួសារ៖ ប្រសិនបើឪពុកម្តាយ ឬសាច់ញាតិរបស់អ្នកធ្លាប់មានជំងឺលើសឈាមនោះ,អ្នកមានហានិភ័យក្នុងការកើតមានជំងឺលើសឈាម។ វាជាយោបល់ល្អមួយដើម្បីស្រាវជ្រាវប្រវត្តិគ្រួសារដើម្បីរកមើលថាជំងឺលើសឈាមមាននៅក្នុងគ្រួសារឬទេ។
អាយុ៖ នៅពេលមនុស្សកាន់តែចាស់, ពួកគេមានហានិភ័យខ្ពស់នៃជំងឺលើសឈាមនិងជំងឺសរសៃឈាម និងបេះដូង។ នេះដោយសារតែសរសៃឈាមបាត់បង់ភាពបត់បែនទៅតាមអាយុដែលនាំអោយមានការកើនឡើងសម្ពាធលើប្រព័ន្ធបេះដូង និងសរសៃឈាម។
ភេទ៖ បុរសហាក់ដូចជាងាយកើតមានជំងឺលើសឈាមច្រើនជាងស្ត្រីរហូតដល់អាយុ ៤៥ឆ្នាំ។ នៅចន្លោះអាយុ ៤៥ ទៅ៥០ឆ្នាំ និង៥៥ ទៅ៦៤ឆ្នាំ ហានិភ័យនៃជំងឺលើសឈាមគឺប្រហាក់ប្រហែលគ្នាចំពោះបុរស និងស្ត្រី។ បន្ទាប់ពីអាយុ ៦៤ឆ្នាំ ឡើងទៅ ស្ត្រីហាក់ដូចជាងាយមានជំងឺលើសឈាមច្រើនជាងបុរស។
ការមិនមានសកម្មភាព៖ ការអង្គុយធ្វើការមួយកន្លែងក៏បង្កើនហានិភ័យនៃការកើតមានជំងឺលើសឈាមផងដែរ។ ការធ្វើលំហាត់ប្រាណជាទៀងទាត់គឺជាមធ្យោបាយធម្មជាតិមួយដើម្បីបន្ថយវា។
ញ៉ាំប្រៃពេក៖ អំបិលរក្សាការកើនឡើងជាតិទឹកនៅក្នុងបេះដូងដែលអាចបន្ថែមបន្ទុកដល់បេះដូង,ដែលបង្កើនហានិភ័យនៃជំងឺលើសឈាម។ សូមញ៉ាំជាតិប្រៃអោយតិចជាង ១.៥០០មីលីក្រាម ក្នុងមួយថ្ងៃ។
លើសទម្ងន់៖ សូមពិនិត្យមើលទម្ងន់របស់អ្នក។ ប្រសិនបើអ្នកលើសទម្ងន់, ការសម្រកទម្ងន់ពី ៤,៥ ទៅ ៩គីឡូ អាចជួយបន្ថយសម្ពាធឈាមរបស់អ្នកបាន។
ផឹកស្រាច្រើនពេក៖ ការទទួលទានស្រាអាចនាំអោយបង្កើនសម្ពាធឈាមនិងបណ្តាលអោយមានជំងឺខ្សោយបេះដូង, ជំងឺដាច់សរសៃឈាមខួរក្បាលនិងចង្វាក់បេះដូងលោតមិនស្មើគ្នា។ ប្រសិនបើអ្នកផឹកគ្រឿងស្រវឹង,សូមកំនត់នូវការផឹកដែលកុំអោយលើសពី២កែវក្នុងមួយថ្ងៃចំពោះបុរសនិងមួយកែវក្នុងមួយថ្ងៃចំពោះស្ត្រី។