Join with Health.com.kh on Telegram

​ការស្រាវជ្រាវ​ថ្មី​មួយ​បាន​បង្ហាញថា បុរស​វ័យ​ចំណាស់​បង្កើន​ហានិភ័យ​នៃ​ការវិវត្ត​ទៅជា​ជំងឺមហារីក​ស្បែក​, ប៉ុន្តែ​ភាគច្រើន​គឺ​មិន​ខ្វាយខ្វល់​អំពី​ការការពារ​ពី​កម្តៅ​ថ្ងៃ និង​មិន​ដឹង​ថា​តើ​គួរ​សង្កេតមើល​ដោយ​ខ្លួន​គាត់​យ៉ាង​ដូចម្តេច​ចំពោះ​រោគសញ្ញា​នៃ​ជំងឺមហារីក​ស្បែក​នេះ​។​

​នេះ​គឺ​ជា​ការព្រួយបារម្ភ​ដោយសារ​តែ​ជិត ១៣២.០០០ ករណី នៃ​ជំងឺមហារីក​ស្បែក​នេះ​នឹង​ត្រូវបាន​គេ​ធ្វើ​រោគវិនិច្ឆ័យ​នៅក្នុង​ឆ្នាំ ២០១២​។ នេះ​បើ​យោងតាម American Academy of Dermatology ។​

​ការស្ទង់មតិ​នេះ​បានបង្ហាញ​ថា បុរស​ជា​ច្រើន​មិន​ការពារ​ខ្លួន​ពួក​គេ​ពី​កម្តៅ​ព្រះអាទិត្យ​នោះទេ​នៅពេលដែល​ពួកគេ​ចេញ​ក្រៅ និង​អ្នក​មួយចំនួន​ជឿថា ការប៉ះពាល់​នឹង​កម្តៅ​ព្រះអាទិត្យ​គឺជា​រឿង​ល្អ​សម្រាប់​សុខភាព​។ វេជ្ជបណ្ឌិត ថូ​ម៉ាស រ៉ូ​រ៉េ (Thomas Rohrer) ជា​គ្រូពេទ្យ​ឯកទេស​ជំងឺ​ស្បែក និង​ជា​សាស្ត្រាចារ្យ​នៃ​ជំងឺ​ស្បែក​នៅឯ​សាកលវិទ្យាល័យ​វេជ្ជសាស្ត្រ Brown បាន​និយាយថា​នេះ​គឺជា​បញ្ហា​មួយ​ដែល​ពន្លឺ​ថ្ងៃ​ដែល​កត្តា​ហានិភ័យ​ចំបង​ចំពោះ​អ្នកជំងឺ​គឺ​ប៉ះពាល់​ទៅ​នឹង​ពន្លឺ​អ៊ុល​ត្រាវី​យ៉ូ​ឡេ​។​

​ការស្ទង់មតិ​ថ្នាក់ជាតិ​បានបង្ហាញ​ថា បុរស​ត្រឹមតែ ២៩% ការពារ​ស្បែក​របស់​ពួកគេ​នៅពេលដែល​ពួកគេ​ចេញ​ក្រៅ​។ ស្របពេល​ដែល ៤៣% នៃ​ស្ត្រី​គឺ​ធ្វើ​ការប្រុងប្រយ័ត្ន​យ៉ាងខ្លាំង​។​

​លើសពីនេះទៅទៀត​, ៣៩% នៃ​បុរស​បាន​និយាយថា ពួកគេ​ចូលចិត្ត​ការប៉ះពាល់​ទៅ​នឹង​កម្តៅ​ព្រះអាទិត្យ និង​មិន​បារម្ភ​អំពី​របៀប​នៃ​ការការពារ​ពួកគេ​ពី​កម្តៅ​ព្រះអាទិត្យ​នោះទេ​, បើ​ប្រៀប​ទៅ​នឹង​ស្ត្រី​គឺមាន ២៨%​។​

​ទោះបីជា​យ៉ាងណា​ក៏ដោយ​, ៤៩% នៃ​ស្ត្រី​បាន​និយាយថា ពួកគេ​ដឹង​ពី​របៀប​ពិនិត្យ​ស្បែក​របស់​ពួកគេ​ដែល​ជា​សញ្ញា​នៃ​ជំងឺមហារីក​, ហើយ​ការស្រាវជ្រាវ​ក៏​បាន​បង្ហាញថា ៤៦% នៃ​បុរស​បានដឹង​ពី​របៀប​ថា​តើ​វា​គួរ​ត្រូវ​បាន​គេ​ធ្វើ​យ៉ាងដូចម្តេច​។​

​រ៉ូ​រ៉េ​បាន​និយាយថា បុរស​ចាំបាច់​ពិនិត្យ​ស្បែក​របស់​ពួកគេ និង​ពិនិត្យ​ជាមួយ​គ្រូពេទ្យ​ឯកទេស​ថា​តើ​ស្បែក​របស់​ពួកគេ​មាន​ការប្រែប្រួល​, ឈាម ឬ​ដុះ​សាច់​ឬ​យ៉ាងណា​។​

​ជា​សំណាងល្អ​, អ្នកស្រាវជ្រាវ​បាន​សម្គាល់​ឃើញថា អត្រា​នៃ​ការរស់រានមានជីវិត ៥​ឆ្នាំ បន្ទាប់​ពី​ជំងឺ​មហារីក​ស្បែក​នេះ​ត្រូវបាន​ធ្វើ​រោគវិនិច្ឆ័យ និង​ត្រូវបាន​គេ​ព្យាបាល​មុន​វា​រាលដាល​ទៅ​លើ​កូន​កណ្តុរ គឺ​មាន​រហូត​ដល់ ៩៨%​។​

​រ៉ូ​រ៉េ​បាន​សរុប​ថា លទ្ធផល​នៃ​ការស្ទង់មតិ​គួរតែ​ប្រាប់​បុរស​អំពី​ការការពារ​ស្បែក​របស់​ពួកគេ​ពី​ការប៉ះពាល់​ទៅ​នឹង​កម្តៅ​ព្រះអាទិត្យ និង​ពិនិត្យ​ទៅលើ​ស្បែក​របស់​ពួកគេ​ជា​ទៀងទាត់​ចំពោះ​ជំងឺមហារីក​ស្បែក​នេះ​។ ការពិនិត្យ​នេះ​គឺ​មាន​សារៈសំខាន់​ចាប់​ពី​ព្រោះ​ការស្វែងរក​ទាន់​ពេល​នៃ​ជំងឺមហារីក​ស្បែក​ជួយសង្គ្រោះ​ជីវិត​បាន​។