នៅពេលដែលជំងឺកូវីដ-១៩បានផ្ទុះឡើងទូទាំងពិភពលោក តាំងពីខែមេសាឆ្នាំមុន អង្គការលើពិភពលោកបានរួមគ្នា ដើម្បីជួយធានាឱ្យបានថាជនងាយរងគ្រោះបំផុតនៅលើពិភពលោកនឹងទទួលបានវ៉ាក់សាំងចំពេលប្រទេសនានាកំពុងសម្រុកចាក់ថ្នាំបង្ការជាបន្ទាន់។ គំនិតផ្តួចផ្តើមដែលមានឈ្មោះថា COVAX ត្រូវបានបង្កើតឡើងដោយអង្គការសុខភាពពិភពលោក សម្ព័ន្ធវ៉ាក់សាំង GAVI និងសម្ព័ន្ធ CEPI។
COVAX បានធ្វើកិច្ចព្រមព្រៀងដើម្បីទិញវ៉ាក់សាំងក្នុងបរិមាណដ៏ច្រើនពីបណ្តាក្រុមហ៊ុនឱសថនានានិងក៏អាចទទួលការបរិច្ចាគវ៉ាក់សាំងពីប្រទេសអ្នកមានផងដែរ។ ប្រទេសក្រីក្រអាចទទួលបានវ៉ាក់សាំងឥតគិតថ្លៃ ហើយប្រទេសអ្នកមានក៏អាចទិញវ៉ាក់សាំងពីមណ្ឌលនេះបានដែរ។
ប៉ុន្តែ COVAX បានជាប់គាំងជាមួយកង្វះខាតសាច់ប្រាក់ និងការផ្គត់ផ្គង់ក៏ដូចជាឧបសគ្គខាងការដឹកជញ្ជូនវ៉ាក់សាំង ខណៈប្រទេសអ្នកមានមួយចំនួនតូចប៉ុណ្ណោះបានពន្លឿនទៅមុខនូវយុទ្ធនាការចាក់វ៉ាក់សាំង។
ហើយគិតត្រឹមថ្ងៃពុធទី២៤កុម្ភៈ វ៉ាក់សាំងដំបូងបំផុតរបស់ COVAX ទើបតែបានទៅដល់ប្រទេសហ្គាណាមួយប៉ុណ្ណោះ។
COVAX មិនអាចចែកចាយបានរហ័ស ដោយសារមិនមានវ៉ាក់សាំងគ្រប់គ្រាន់ ដោយហេតុថាក្រុមហ៊ុនផលិតឱសថកំពុងជួបការលំបាកច្រើនក្នុងការផលិត ហើយអ្នកជំនាញព្យាករណ៍ថានឹងមិនមានវ៉ាក់សាំងគ្រប់គ្រាន់សម្រាប់ពិភពលោកទាំងមូលរហូតដល់ឆ្នាំ ២០២៣ ឬ ២០២៤ឯណោះ៕