Join with Health.com.kh on Telegram

ភាគច្រើននៃពួកយើងគិតថាឱ្យតែបានងូតទឹកស្អាតដុសសាប៊ូពេញខ្លួន គឺត្រឹមត្រូវប្រសើរចំពោះសុខភាពនិងរាងកាយ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប៉ុន្តែមិនដូច្នោះឡើយ! ក៏ព្រោះនៅមានទម្លាប់មួយចំនួនអាចបង្កគ្រោះថ្នាក់ចំពោះស្បែកនិងសក់គួរឱ្យបារម្ភ។ ថាតើទម្លាប់ទាំងនោះមានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីទម្លាប់ពេលងូតទឹកដែលអ្នកគួរបញ្ឈប់ ៖

១. ងូតទឹកយូរពេក

ភាគច្រើននៃពួកយើងច្រើនជ្រុលខ្លួនងូតទឹកយូរជាង ១០នាទីពិសេសនៅពេលងូតទឹកក្ដៅ។ ទោះយ៉ាងណាការងូតទឹកយូរពេក ពិសេសទឹកក្ដៅ គឺមិនល្អឡើងចំពោះសុខភាពស្បែក។ ខណៈដែលវាអាចធ្វើឱ្យបាត់បង់សំណើមពីស្បែក។

២. ងូតទឹកក្ដៅខ្លាំង

ទោះបីជាការងូតទឹកក្ដៅជួយឱ្យអ្នកមានអារម្មណ៍ធូរស្រាលស្រួលខ្លួន ប៉ុន្តែវាអាចកម្ចាត់នូវបាក់តេរីល្អៗចេញពីស្បែកបានយ៉ាងងាយប្រសិនបើអ្នកងូតទឹកក្ដៅខ្លាំងនិងជាពិសេសចំណាយពេលងូតទឹកយូរៗ។ នេះក៏ព្រោះតែវាបំផ្លាញស្រទាប់ការពារនៃស្បែកបណ្ដាលឱ្យស្បែកងាយនឹងស្ងួតរលាក។

៣. ប្រើប្រាស់សាប៊ូកម្រិតខ្លាំង

ភាគច្រើននៃពួកយើងជ្រើសរើសប្រើប្រាស់សាប៊ូកម្រិតខ្លាំងដែលមានប្រសិទ្ធភាពកម្ចាត់បាក់តេរីនិងមានក្លិនក្រអូប។ ទោះជាយ៉ាងណាសាប៊ូប្រភេទនេះជះផលប៉ះពាល់គួរឱ្យព្រួយបារម្ភចំពោះសុខភាពស្បែកដោយវាកម្ចាត់ជាតិសំណើមពីស្បែក។ សាប៊ូកម្ចាត់បាក់តេរីអាចបណ្ដាលឱ្យស្បែកស្ងួត របក និងរមាស់។ អ្នកឯកទេសខាងសើស្បែកណែនាំឱ្យប្រើប្រាស់សាប៊ូកម្ចាត់បាក់តេរីតិចជាងផលិតផលលាងសម្អាតស្បែកដែលមានកម្រិតស្រាល។

៤. ប្រើប្រាស់សាប៊ូដុំដុសគ្រប់ផ្នែកនៃរាងកាយ

អ្នកគួរប្រើប្រាស់សាប៊ូដុសសម្អាតតែត្រង់ផ្នែកណាដែលងាយជាប់ធូលី ភាពកខ្វក់ និងជាតិប្រេងខ្លាញ់ ហើយមិនអាចជម្រះចេញបាន ប្រសិនបើមិនប្រើសាប៊ូ។ ស្បែកត្រង់ក្លៀក គូថ ក្រលៀន មុខ ប្រអប់ដៃ និងប្រអប់ជើង គឺងាយជាប់ភាពកខ្វក់ដែលមិនអាចប្រើប្រាស់តែទឹកធម្មតាដើម្បីសម្អាតចេញបានណាស់! ទោះជាយ៉ាងណាគួរអ្នកមិនគួរប្រើប្រាស់សាប៊ូដុំលើផ្នែកណាដែលងាយស្ងួតឡើយ។ ប៉ុន្តែប្រសិនបើអ្នកធ្វើការ ឬស្ថិតនៅក្នុងបរិយាកាសដែលធ្វើឱ្យស្បែកជាប់ពេញដោយភាពកខ្វក់និងធូលី ព្រមទាំងជាតិខ្លាញ់ប្រេងផ្សេងៗ នោះអ្នកចាំបាច់គួរដុសសម្អាតឱ្យបានគ្រប់ផ្នែកនៃរាងកាយតែម្ដង។

៥. ងូតទឹក ប៉ុន្តែមិនលាងសម្អាតជើង

មនុស្សមួយចំនួនមិនបានដុសសម្អាតជើងរបស់ពួកគេឡើយ នៅខណៈពេលងូតទឹក ដោយគិតថាសាប៊ូនិងទឹកដែលហូរចុះក្រោមសម្អាតដល់ជើង។ ប៉ុន្តែវាមិនពិតឡើយ ប្រសិនបើអ្នកមិនដុសសម្អាតប្រអប់ជើងបានត្រឹមត្រូវទេនោះ អ្នកអាចនឹងឆ្លងរោគផ្សិតលើក្រចកជើងជាក់ជាមិនខាន។

៦. ងូតទឹកភ្លាមៗក្រោយទទួលទានអាហារ

បញ្ហាកើតឡើងនៅពេលដែលឈាមជាច្រើនត្រូវបានបញ្ជូនទៅកាន់ស្បែក ដើម្បីរក្សាសីតុណ្ហភាពស្នូលនៃរាងកាយដែលធ្វើអោយខ្វះខាតឈាមផ្គត់ផ្គង់ដល់ប្រព័ន្ធរំលាយអាហារ។ មានន័យថា ប្រព័ន្ធរំលាយអាហារនឹងមិនអាចទទួលបានការផ្គត់ផ្គង់ឈាមគ្រប់គ្រាន់ឡើយ ដើម្បីដំណើរការមុខងារប្រក្រតី។ ហើយជាលទ្ធផលបញ្ហាពិបាករំលាយអាហារនឹងកើតមានឡើង។ ការងូតទឹកក្ដៅក៏មិនល្អដែរក្រោយពេលទទួលទានអាហាររួចភ្លាម! ដូច្នេះដើម្បីជាការប្រសើរជៀសផុតពីបញ្ហាពិបាករំលាយអាហារ អ្នកគួរងូតទឹកនៅរយៈពេល ៣០ នាទី ឬ១ ម៉ោង បន្ទាប់ពីទទួលទានអាហារ ជាពិសេសប្រសិនបើអ្នកទទួលទានច្រើន ឬឆ្អែតខ្លាំង៕