ប្រទេសហ្វីលីពីននឹងអនុញ្ញាតឱ្យបុគ្គលិកថែទាំសុខភាពរបស់ខ្លួនរាប់ពាន់នាក់ ដែលភាគច្រើនជាគិលានុប្បដ្ឋាយិកា ចាប់យកការងារនៅចក្រភពអង់គ្លេស និងអាឡឺម៉ង់ប្រសិនបើប្រទេសទាំងពីរយល់ព្រមផ្តល់វ៉ាក់សាំងការពារមេរោគឆ្លង។
ក្រសួងសុខាភិបាលអង់គ្លេសបាននិយាយថាខ្លួនមិនចាប់អារម្មណ៍លើកិច្ចព្រមព្រៀងបែបនេះទេ ហើយអាទិភាពរបស់វា គឺត្រូវប្រើថ្នាំបង្ការក្នុងស្រុក ប៉ុន្តែបានបន្ថែមថា ខ្លួននឹងចែកចាយវ៉ាក់សាំង ដែលមានចំនួនលើសគេ ជាអន្តរជាតិនាពេលអនាគត។
ប្រទេសហ្វីលីពីនដែលស្ថិតក្នុងចំណោមករណីឆ្លងវីរុសកូរ៉ូណាខ្ពស់បំផុតនៅអាស៊ី បានបន្ធូរបន្ថយបម្រាមមិនឱ្យដាក់ពង្រាយបុគ្គលិកថែទាំសុខភាពរបស់ខ្លួននៅក្រៅប្រទេស ប៉ុន្តែនៅតែកំណត់ចំនួនអ្នកជំនាញវេជ្ជសាស្ត្រ ដែលចាកចេញពីប្រទេសនេះដល់ ៥.០០០ នាក់ក្នុងមួយឆ្នាំ។
ប្រទេសអង់គ្លេស មានចំនួនអ្នកស្លាប់ដោយសារជំងឺឆ្លងវីរុសខ្ពស់ជាងគេទី៥ នៅលើពិភពលោក ខណៈដែលប្រទេសអាឡឺម៉ង់មានចំនួនអ្នកឆ្លងច្រើនជាងគេលំដាប់ទី ១០ នៅលើពិភពលោក៕