កាលពីថ្ងៃចន្ទម្សិលមិញ រដ្ឋបាលស្បៀង និងឱសថថៃ បានអនុញ្ញាអោយប្រើគ្រាអាសន្នសំរាប់វ៉ាក់សាំងចិនផលិតដោយក្រុមហ៊ុន Sinovac Biotec ដែលជាការចាក់វ៉ាក់សាំងប្រឆាំងកូវីដ-១៩ជាលើកដំបូងរបស់ប្រទេសនេះ។
ការអនុញ្ញាតនេះ ធ្វើឡើងតែប៉ុន្មានថ្ងៃ មុនពេលថៃគ្រោងនឹងទទួលវ៉ាក់សាំង២សែនដូសដំបូងរបស់ Sinovac ជាវ៉ាក់សាំងក្រុមដំបូងដែលនឹងចាក់អោយពួកបុគ្គលិកវេជ្ជសាស្ត្រថៃ។
តាមពិតរដ្ឋាភិបាលថៃបានបញ្ជាទិញវ៉ាក់សាំង២៦លានដូសមកពីក្រុមហ៊ុន AstraZeneca និងបំរុងទុក៣៥លានដូសទៀតមកពីក្រុមហ៊ុនដដែល។ AstraZeneca បានអនុញ្ញាតអោយក្រុមហ៊ុនថៃមួយផលិតវ៉ាក់សាំងរបស់ខ្លួននៅក្នុងប្រទេសថៃ។
ងាកមកហ្វីលីពីនឯណេះវិញ កាលពីថ្ងៃចន្ទ បានអនុម័តប្រើវ៉ាក់សាំង Sinovac របស់ចិននេះដើម្បីប្រឆាំងកូវីដ-១៩ក្នុងគ្រាអាសន្នសំរាប់ប្រជាជនទូទៅ តែមិនណែនាំអោយប្រើវាលើបុគ្គលិកវេជ្ជសាស្ត្រទេដោយសារតែការពិសោធន៍បង្ហាញថាវាមានប្រសិទ្ធភាពទាប។
ហ្វីលីពីន ដែលមានអ្នកឆ្លងកូវីដ-១៩ ខ្ពស់បំផុតលំដាប់ទី២នៅអាស៊ីអាគ្នេយ៍ នៅមិនទាន់ចាប់ផ្តើមកម្មវិធីចាក់វ៉ាក់សាំងបង្ការកូវីដ-១៩នៅឡើយទេ៕