វៀតណាមនឹងចាប់ផ្តើមកម្មវិធីចាក់វ៉ាក់សាំងកូវីដ-១៩ របស់ខ្លួននៅខែមីនាខាងមុខនេះ ដោយបុគ្គលិកវេជ្ជសាស្ត្រជួរមុខ និងមនុស្សចាស់នឹងទទួលដូសមុនគេ។
វៀតណាម រំពឹងថានឹងទទួលបានវ៉ាក់សាំង៦០លានដូសនៅឆ្នាំនេះ រួមមាន៣០លាននៅក្រោមកម្មវិធី Covax របស់អង្គការសុខភាពពិភពលោក ហើយវ៉ាក់សាំងរបស់ក្រុមហ៊ុន AstraZeneca ចំនួន២០៤.០០០ដូសដំបូង ត្រូវមកដល់ប្រទេសនេះនៅថ្ងៃ២៨ កុម្ភៈនេះ។
កាសែតមួយរបស់រដ្ឋនៃប្រទេសនេះ បានរាយការណ៍ថា «ការចាក់វ៉ាក់សាំងរលកដំបូងដែលផ្តោតលើបុគ្គលិកវេជ្ជសាស្ត្រជួរមុខ និងក្រុមមនុស្សងាយរងគ្រោះនឹងចាប់ផ្តើមនៅខែមីនា បន្ទាប់ពីវ៉ាក់សាំងក្រុមដំបូងបានមកដល់ភ្លាម និងឆ្លងផុតការត្រួតពិនិត្យគុណភាព»។
ទូក្លាសេធំៗសំរាប់ទុកវ៉ាក់សាំងនៅសីតុណ្ហភាព -៤០C ទៅ -៨៦C ត្រូវបានត្រៀមជាស្រេចនៅទីក្រុង ហាណូយ ក្រុងហូជីមីញ និងក្រុងដាណាំង៕