Join with Health.com.kh on Telegram

​ការ​មាន​ផ្ទៃពោះ អាច​ក្លាយទៅជា​រឿង​មួយ​ផ្អែម​ផង និង​ល្វីង​ផង សម្រាប់​ជីវិត​ជា​មនុស្ស​ស្រី​។ ភាព​ភ្ញាក់ផ្អើល​ចំពោះ​កូន​ក្នុង​ផ្ទៃ គឺជា​រឿង​ដែល​តែងតែ​កើតមាន ប៉ុន្តែ រោគសញ្ញា​នៃ​ការ​មាន​ផ្ទៃពោះ ច្រើន​តែ​បង្ក​ទុក្ខទោស ដល់​អារម្មណ៍​ស្ត្រី​ជា​ម្តាយ​។ ស្ត្រី​អាច​នឹង​ឆ្លងកាត់​រឿង​ច្រើន​ណាស់​ក្នុង​ពេល​នេះ ដូច្នេះ ពួក​គេ​គួរតែ​ប្រុងប្រយ័ត្ន នូវ​អ្វី​ដែល​គួរ​ធ្វើ ជាពិសេស អ្វី​ដែល​គេ​ញ៉ាំ​តែម្តង​។ ស្ត្រី​ខ្លះ​ធ្លាប់មាន​បញ្ហា​រលូត​កូន ដោយ​គ្រាន់តែ​ញ៉ាំ​អាហារ ឬ​ទឹក​ភេសជ្ជៈ​ខុស​ប៉ុណ្ណោះ​។ អ្វី​ដែល​អ្នក​ញ៉ាំ គឺ​សំខាន់​ណាស់ សម្រាប់​ដំណាក់កាល​ដំបូង នៃ​ការ​មាន​ផ្ទៃពោះ ឬ​ត្រីមាស​ដំបូង​។ នេះ​គឺជា​ពេលវេលា​មួយ ដែល​អាហារ​នាំ​ឲ្យ​រ​លូតកូន មាន​ឥទ្ធិពល​ខ្លាំង​បំផុត​។ អាហារ​ទាំងនេះ អាច​ប៉ះពាល់​ដល់​ទារក ហើយ​អ្នក​ក៏​អាច​នឹងរង ការ​រលូត​កូន​ក្នុងពេល​ជាមួយគ្នា​បានដែរ​។ មាន​អាហារ​ច្រើនណាស់ ដែល​មិន​ត្រូវបាន​អនុញ្ញាត ឲ្យ​ស្ត្រី​មាន​ផ្ទៃពោះ​ញ៉ាំ ចាប់តាំងពី​វា​អាច​ធ្វើឲ្យ​ស្បូន​កន្ត្រាក់ និង​រលារ រហូត​ដល់រ​លូត​កូន​បាន​។ ដើម្បី​ការពារ​កុំឲ្យ​រ​លូតកូន​នោះ យើងខ្ញុំ​សូម​ណែនាំ នូវ​អាហារ​មួយចំនួន ដែល​ស្ត្រី​មាន​ផ្ទៃពោះ គួរតែ​ចៀសវាង ៖

  • ​ម្នា​ស់ ៖ ម្នាស់​មាន​សារធាតុ Bromelain ដែល​ត្រូវបាន​គេ​ស្គាល់​ថា ធ្វើឲ្យ​ស្បូន​ទន់ និង​កន្ត្រាក់  ដូច្នេះ យក​ល្អ អ្នក​គួរតែ​ចៀសវាង​ការ​ញ៉ាំ​ផ្លែឈើ​មួយ​នេះ ក្នុង​រយៈពេល ៣ ខែ​ដំបូង នៃ​ការ​មាន​ផ្ទៃពោះ​
  • ​ល្ហុង ៖ ល្ហុង​ពណ៌​បៃតង​មាន​គ្រោះថ្នាក់​បំផុត សម្រាប់​ស្ត្រី​មាន​ផ្ទៃពោះ ជាពិសេស ក្នុង​ត្រីមាស​ដំបូង​តែម្តង ដូច្នេះ គួរតែ​ចៀសវាង​ការ​ញ៉ាំ​វា ក្នុងពេល​មាន​ផ្ទៃពោះ​សិន​ទៅ​។​
  • ​សាច់​ឆៅ ៖ សាច់​ឆៅ មិន​ត្រឹមតែ​មិន​ផ្តល់​សុខភាព​ល្អ ដល់​ស្ត្រី​មាន​ផ្ទៃពោះ​ទេ តែ​វា​ថែម​ទាំង​ងាយ​នឹង​ផ្ទុក​បា​រ៉ា​សិត Toxoplasma Gondii ដែល​ជា​ហេតុផល​ធំ នាំ​ឲ្យ​រ​លូតកូន​បាន​ថែម​ទៀត​។ ដូច្នេះ ចូរ​ប្រាកដថា សាច់​ដែល​អ្នក​ញ៉ាំ គឺ​ឆ្លងកាត់​ការ​ចម្អិន​ឆ្អិន​ល្អ​ហើយ​។
  • ​ថ្លើម​សត្វ ៖ វីតាមីន A ក្នុង​ថ្លើម​សត្វ គឺជា​សារធាតុ​ម្យ៉ាង ដែល​អាច​បង្អាក់​ការលូតលាស់​របស់​ទារ​ក​ក្នុង​ផ្ទៃ និង​បង្ក​ការ​រលូត​បាន​។ កាលណា​ក្នុង​ខ្លួន​មាន​វីតាមីន A ច្រើនពេក វា​អាច​បណ្តាល​ឲ្យ កោសិកា​របស់​ទារក ខូច​កាន់តែ​ច្រើន បង្ក​ជា​ជំងឺ​ពក​ឆ្អឹងខ្នង ស្បូន​កន្ត្រាក់​ខុសធម្មតា និង​មាន​បញ្ហា​ដល់​ខួរក្បាល​ទៀត​។
  • ​ត្រី​មួយ​ចំនួន ៖ បើសិន​ជា​អ្នក​ចូលចិត្ត​ញ៉ាំ​ស៊ូ​ស៊ី សូម​ចូលរួម​សោកស្តាយ​ផង ព្រោះថា ត្រី​ឆៅ​របស់​អាហារ​ជប៉ុន​មួយ​នេះ គឺ​មិន​ត្រូវបាន​អនុញ្ញាត ឲ្យ​ស្ត្រី​មាន​ផ្ទៃពោះ​ញ៉ាំ​ទេ​។​
  • ​តែ​បៃតង ៖ តែ​បៃតង គឺជា​ហេតុផល​មួយ ដែល​នាំ​ឲ្យ​រ​លូតកូន​ដែរ​។ យ៉ាងណាមិញ តែ​បៃតង​មាន​ជាតិ​កាហ្វេ​អ៊ី​ន ២០០ មី​លី​ក្រាម ដែល​អាច​ផ្តល់​គ្រោះថ្នាក់​ច្រើន ដល់​ទារក​មិន​ទាន់​កើត​បាន ហើយក៏​ប៉ះពាល់​ដល់​ទឹកដោះ​ម្តាយ នៅពេល​អនាគត​ដែរ​។

​ផ្នែក​មួយ​ដ៏​សំខាន់ នៃ​របប​អាហារ​ប្រកប​ដោយ​សុខភាព ក្នុងពេល​មាន​ផ្ទៃពោះ គឺ​ញ៉ាំ​អាហា​រណា​ដែល​មាន​វីតាមីន និង​ជីវជាតិ​ច្រើន ព្រោះ​រាងកាយ​ត្រូវការ​វា ដើម្បី​ចិញ្ចើម​មនុស្ស​ពីរ​នាក់​។ ស្ត្រី​គួរតែ​ប្រុងប្រយ័ត្ន នូវ​អ្វី​ដែល​ពួកគេ​ញ៉ាំ ក្នុងពេល​មាន​ផ្ទៃពោះ​។ រឿង​គ្រប់យ៉ាង​ដែល​ពួកគេ​ញ៉ាំ អាច​ប៉ះពាល់​ដល់ ទារក​ក្នុង​ផ្ទៃ​បាន​ទាំងអស់​។ ចំពោះ​អាហារ​មួយចំនួន​ខាងលើ គឺ​មិន​ប៉ះពាល់​អ្វី​ទេ បើសិនជា​ញ៉ាំ​តិចតួច ប៉ុន្តែ បើ​ញ៉ាំ​ច្រើនពេក វា​ពិតជា​អាច​នាំ​ឲ្យ​រ​លូតកូន​បាន​៕