Join with Health.com.kh on Telegram

​តើ​អ្នកមាន​រាងដូចជា​ផ្លែ​ប៉ោម​ឬ រាង​ផ្លែ​ព័រ (pear) ទេ​? លោក​វេជ្ជបណ្ឌិត តាន់ ហុង​ឆាង អ្នកពិគ្រោះ​យោបល់​នៃ​នាយកដ្ឋាន​ចក្ខុវិស័យ​នៃ​មន្ទីរពេទ្យ​ទូទៅ​នៃ​ប្រទេស​សឹង្ហ​បូរី (SGH) បាន​ពន្យល់​អំពី​ទំហំ​ចង្កេះ និង​របៀប​ដែល​រូបរាងកាយ​របស់​អ្នក​អាច​ប៉ះពាល់​ដល់​សុខភាព​របស់​អ្នក​។

​គ្រូពេទ្យ​កំពុង​ប្រើ​ទំហំ​ចង្កេះ និង​ទ្រង់​ទ្រា​ង​រូបរាង រួមជាមួយ​ទំងន់​រាងកាយ ដើម្បី​ព្យាករណ៍​ពី​ហានិភ័យ​របស់​អ្នក ចំពោះ​ស្ថានភាព​សុខភាព​រ៉ាំរ៉ៃ ដូចជា​ជំងឺលើសឈាម ជំងឺ​បេះដូង ទឹកនោមផ្អែម និង​ជំងឺ​ដាច់​សរសៃឈាម​ខួរក្បាល​។ មាន​ប្រភេទ​រូបរាង​សំខាន់​ពីរ ដែល​ទាក់ទង​នឹង​សុខភាព​របស់​អ្នក​គឺ​ផ្លែ​ប៉ោម និង​ផ្លែ​ព័រ​។​

​រូបរាង​របស់​អ្នក​ដែល​អាច​កំណត់​បាន​ដោយ​ប្រើ សមាមាត្រ​ចង្កេះ និង​ត្រគាក (WHR) គឺ​សំខាន់​ណាស់ ព្រោះ​វា​បង្ហាញ​ពី​ការបែងចែក​ជាតិ​ខ្លាញ់​នៅក្នុង​ខ្លួន​។ មនុស្ស​ដែលមាន​រាង​ដូច​ផ្លែ​ប៉ោម ផ្ទុក​ទំងន់​នៅ​ជុំវិញ​ពោះ​របស់​ពួកគេ​។ ចំណែក​អ្នក​ដែលមាន​រាង​ដូច​ផ្លែ​ព័រ មាន​ចង្កេះ​តូច​ជាង ហើយ​ផ្ទុក​ទំងន់​ច្រើន​នៅ​ជុំវិញ​ត្រគាក និង​ភ្លៅ​។​

​ការស្រាវជ្រាវ​ថ្មីៗ​នេះ បង្ហាញថា​ប្រភេទ​រាង​ទាំង​បុរស និង​ស្ត្រី ក៏​ជា​សូចនាករ​នៃ​គ្រោះថ្នាក់​សុខភាព​ផងដែរ​។ វេជ្ជបណ្ឌិត ដដែល​ខាងលើ បាន​និយាយថា ហានិភ័យ​សម្រាប់​អ្នក​ដែលមាន​រាង​ផ្លែ​ប៉ោម ហាក់ដូចជា​ខ្ពស់​បើ​ប្រៀបធៀប​ទៅនឹង​មនុស្ស​ម្នាក់ទៀត​ដែលមាន​រាង​ដូច​ផ្លែ​ព័រ​។​

​ការសិក្សា​មួយ​នៅ​គ្លីនិក Mayo បាន​រកឃើញថា​អ្នក​ដែលមាន BMI “​មាន​សុខ​ភាពល្អ​ធម្មតា​” និង​រាង​ក្រាស់​នៅ​កណ្តាល (​រាង​ផ្លែ​ប៉ោម​) ហាក់ដូចជា​ស្លាប់​ទ្វេដង​ដោយសារ​មូលហេតុ​ណាមួយ​។ ពួកគេ​ងាយ​នឹង​ស្លាប់​ដោយសារ​ជំងឺ​សរសៃឈាម​បេះដូង ជាង​មនុស្ស​ដែលមាន​ទំងន់​ធម្មតា​ដែលមាន​រាង​ដូច​ផ្លែ​ព័រ ។

​តើ​ទំហំ​ចង្កេះ​បែបណា ដែល​ល្អ​បំផុត​សម្រាប់​សុខភាព​?
​ហានិភ័យ​សុខភាព​របស់​អ្នក គឺ​ទាក់ទង​ដោយផ្ទាល់​ទៅនឹង​ទំហំ​ចង្កេះ​របស់​អ្នក​។​

ទំហំ​ចង្កេះ​សម្រាប់​ស្ត្រី​៖
-​ល្អ​៖ <៨០ ស​.​ម​ , -​ហានិភ័យ​ខ្ពស់​៖ ៨០-៨៨ ស​.​ម​ , -​ហានិភ័យ​ខ្ពស់បំផុត​៖ > ៨៨ ស​.​ម​។​

ទំហំ​ចង្កេះ​សម្រាប់​បុរស​៖
-​ល្អ​៖ <៩៤ ស​.​ម , -​ហានិភ័យ​ខ្ពស់​៖ ៩៤-១០២ ស​.​ម​ , -​ហានិភ័យ​ខ្ពស់បំផុត​៖ > ១០២ ស​.​ម​៕