​ការស្រាវជ្រាវ​ថ្មី​មួយ​បាន​បង្ហាញថា ការ​ធាត់​អាច​ប៉ះពាល់​ទៅ​នឹង​ការឆ្លើយតប​លើ​ការព្យាបាល​នៃ​ជំងឺមហារីក​សុដន់​ចំពោះ​ស្ត្រី​។​

​អ្នកស្រាវជ្រាវ​ចក្រភព​អស់គ្លេ​ង​បាន​មើល​ទៅលើ​ស្ត្រី​ក្រោយ​អស់​រដូវ​៥៤​នាក់​ដែល​មាន​ជំងឺមហារីក​សុដន់​ដែល​ជំងឺមហារីក​សុដន់​នោះ​អាច​លូតលាស់​ទៅ​បាន​ដោយសារ​វត្តមាន​របស់​អរ​ម៉ូ​ន​អ៊ឹ​ស្ត្រូ​សែន​។ ជាង​៣/៤​នៃ​ជំងឺមហារីក​សុដន់​ដែល​ត្រូវការ​អរ​ម៉ូ​ន​អ៊ឹ​ស្ត្រូ​សែន​ដើម្បី​ធ្វើ​ការលូតលាស់​, ដូចនេះ​ការរាំងស្ទះ​ការផលិត ឬ​សកម្មភាព​នៃ​អរ​ម៉ូ​ន​អ៊ឹ​ស្ត្រូ​សែន​គឺជា​មធ្យោបាយ​តែ​មួយ​សំខាន់​ដើម្បី​ព្យាបាល​ជំងឺ​នេះ​។​

​អ្នកស្រាវជ្រាវ​បាន​រកឃើញថា អ្នកជំងឺ​ធាត់​ដែល​មាន​ជំងឺ​មហារីក​សុដន់​មាន​កម្រិត​នៃ​អរ​ម៉ូ​ន​អ៊ឹ​ស្ត្រូ​សែន​ខ្ពស់​ជាង​ស្ត្រី​ដែល​មាន​ទម្ងន់​ធម្មតា​។​

ស្ត្រី​នៅ​ក្នុង​ការស្រាវជ្រាវ​ត្រូវ​បាន​ប្រៀបធៀប​ផងដែរ​ដោយ​យោង​ទៅតាម​ស​ន្ទ​ស្សន៍​នៃ​ទម្ងន់​ខ្លួន​(BMI) របស់​ពួកគេ​នោះ​។ អ្នកស្រាវជ្រាវ​បាន​ធ្វើ​របាយការណ៍​នៅក្នុង Journal of Clinical Oncology​។ ស​ន្ទ​ស្សន៍​នៃ​ទម្ងន់​ខ្លួន​លើសពី​៣០​ត្រូវបាន​គេ​ចាត់ទុក​ថា​ធាត់​។ ស្ត្រី​ដែល​មាន​ស​ន្ទ​ស្សន៍​នៃ​ទម្ងន់​ខ្លួន​ពី​៣០ ទៅ​៣៥​មាន​កម្រិត​នៃ​អរ​ម៉ូ​ន​អ៊ឹ​ស្ត្រូ​សែន​នៅក្នុង​ឈាម​ខ្ពស់ជាង​៣​ដង​ជាង​អ្នក​ដែល​មាន​ស​ន្ទ​ស្សន៍​នៃ​ទម្ងន់​ខ្លួន​ទាប​ជាង​២៥​។​

​បន្ទាប់ពី​ធ្វើ​ការព្យាបាល​ជាមួយនឹង​ថ្នាំ​បន្ថយ​អរ​ម៉ូ​ន​, កម្រិត​អរ​ម៉ូ​ន​អ៊ឹ​ស្ត្រូ​សែន​ចំពោះ​ស្ត្រី​ដែល​ធាត់​បាន​ធ្លាក់ចុះ​, ប៉ុន្តែ​នៅតែ​ខ្ពស់​ជាង​ទ្វេដង​ដែល​ត្រូវ​បាន​ឃើញ​ចំពោះ​ស្ត្រី​មាន​ទម្ងន់​ធម្មតា​។​

​អ្នកស្រាវជ្រាវ​បាន​សង្កត់ធ្ងន់ថា ស្ត្រី​ដែល​ធ្វើការ​ព្យាបាល​ជំងឺមហារីក​សុដន់​មិនគួរ​ព្រួយបារម្ភ​ដោយ​ការស្រាវជ្រាវ​នេះ​ទេ​។ ពួកគេ​ក៏​បាន​និយាយថា លទ្ធផល​នៃ​ការស្រាវជ្រាវ​អាច​នាំអោយ​មាន​ភាពប្រសើ​រ​ឡើង​ចំពោះ​សមត្ថភាព​របស់​គ្រូពេត្យ​ដើម្បី​ជ្រើសរើស​មើល​ពី​ការព្យាបា​ល​ដែល​ល្អ​បំផុត​ចំពោះ​អ្នក​ជំងឺមហារីក​សុដន់​ដែល​លើស​ទម្ងន់ និង​ធាត់​នោះ​។​

​មី​ត ដូវ​សេត​(Mitch Dowsett) ជា​អ្នកដឹកនាំ​នៅក្នុង​មជ្ឈមណ្ឌល​ស្រាវជ្រាវ​ជំងឺមហារីក​សុដន់ Breakthrough ក្នុង​ទីក្រុង​ឡុង​បាន​និយាយថា ការស្រាវជ្រាវ​របស់​យើង​ត្រូវ​បាន​ពឹងផ្អែក​លើ​ការស្រាវជ្រាវ​របស់​មន្ទី​រ​ពិសោធន៍ ដូចនេះ​យើង​ត្រូវការ​ព័ត៌មាន​ដើម្បី​ដឹង​ថា​តើ​ស្ត្រី​ដែល​មាន​ស​ន្ទ​ស្សន៍​នៃ​ទម្ងន់​ខ្លួន​ខ្ពស់​គួរតែ​ទទួល​អត្ថប្រយោជន៍​ពី​ការផ្លាស់ប្តូរ​ការព្យាបាល​របស់​ពួកគេ​ឬ​យ៉ាងណា​។​

​គាត់​បាន​និយាយថា ស្ត្រី​ដែល​មាន​ស​ន្ទ​ស្សន៍​នៃ​ទម្ងន់​ខ្លួន​ខ្ពស់​មិនគួរ​ភ័យ​ដោយសារ​ការស្រាវជ្រាវ​នេះ ឬ​បញ្ឈប់​ការព្យាបាល​របស់​ពួកគេ​នោះទេ​។ ទោះជា​យ៉ាងណា​ក៏ដោយ​, ការស្រាវជ្រាវ​របស់​ពួក​យើង​បាន​ផ្តល់អោយ​ពួក​យើង​យល់​ថា​តើ​ជម្រើស​នៃ​ការព្យាបាល​ណាមួយ​ដែល​សាក​សម​សម្រាប់​ស្ត្រី​ម្នាក់ៗ​នោះ​។​