អតុល្យភាពអ័រម៉ូនបង្កបញ្ហាច្រើនណាស់ ដូច្នេះការរក្សាឱ្យបាននូវកម្រិតតុល្យភាពអ័រម៉ូន គឺចាំបាច់ណាស់។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) គួរធ្វើបែបណាទៅ? កុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងគន្លឹះងាយៗរក្សាតុល្យភាពអ័រម៉ូន ៖
១. រួមបញ្ចូលអាស៊ីតខ្លាញ់អូមេហ្កា ៣ក្នុងរបបអាហារ
អាស៊ីតខ្លាញ់អូមេហ្កា ៣ គឺចាំបាច់ណាស់សម្រាប់ការគ្រប់គ្រងអ័រម៉ូន។ អាស៊ីតខ្លាញ់នេះមានលក្ខណៈសម្បត្តិប្រឆាំងការរលាក ក៏ដូចជាសារធាតុប្រឆាំងអុកស៊ីតកម្មដែលអាចជួយរក្សាតុល្យភាពអ័រម៉ូនបានយ៉ាងប្រសើរ។
២. ធ្វើលំហាត់ប្រាណ
ប្រសិនបើអ្នកចង់រក្សាតុល្យភាពអ័រម៉ូនតាមបែបធម្មជាតិ អ្នកចាំបាច់គួរចាប់ផ្ដើមធ្វើលំហាត់ប្រាណឱ្យបានទៀងទាត់។ ការធ្វើសកម្មភាពរាងកាយ ឬហាត់ប្រាណអាចជួយកាត់បន្ថយអាំងស៊ុយលីន ខណៈពេលបង្កើនភាពប្រែប្រួលនឹងអាំងស៊ុយលីន។ នេះមិនត្រឹមតែជួយរាងកាយក្នុងការផលិតអ័រម៉ូនឱ្យបានត្រឹមត្រូវប៉ុណ្ណោះទេ ប៉ុន្តែថែមទាំងជួយរក្សាភាពរឹងមាំនៃសាច់ដុំនិងឆ្អឹង ព្រមទាំងមុខងារនៃសរីរាង្គផ្សេងទៀតផងដែរ។
៣. កុំរំលងវីតាមីន D
វីតាមីន D ជួយក្រពេញ pituitary គ្រប់គ្រងការផលិតអ័រម៉ូន។ ដូច្នេះកុំភ្លេចរួមបញ្ចូលអាហារសម្បូរវីតាមីន D ក្នុងរបបអាហារប្រចាំថ្ងៃ និងអនុញ្ញាតឱ្យស្បែកបានត្រូវពន្លឺព្រះអាទិត្យគ្រប់គ្រាន់ផងចន្លោះពេលមុនម៉ោង ១០ ព្រឹក និងក្រោយម៉ោង ៤ល្ងាច។
៤. គ្រប់គ្រងស្ត្រេស
ប្រសិនបើអ្នកចង់រក្សាតុល្យភាពអ័រម៉ូនឱ្យបានប្រសើរ អ្នកចាំបាច់ត្រូវព្យាយាមគ្រប់គ្រងស្ត្រេសឱ្យបាន! នេះក៏ព្រោះតែភាពតានតឹងក្នុងអារម្មណ៍អាចជះឥទ្ធិពលដល់អ័រម៉ូន។ នៅពេលអ្នកស្ត្រេស បញ្ហាសុខភាពផ្សេងទៀតអាចលេចឡើងដូចជាចង្វាក់បេះដូងលោតញាប់ខុសប្រក្រតី ធាត់ជ្រុល និងសូម្បីតែកើនឡើងនូវខ្លាញ់ក្បាលពោះ។ តាមរយៈការគ្រប់គ្រងស្ត្រេស អ្នកនឹងអាចរក្សាបាននូវតុល្យភាពអ័រម៉ូន។
៥. ប្រេងដូង
មានផ្ទុកអាស៊ីត lauric ដែលអាចជួយព្យាបាលស្បែកនិងផ្ដល់អត្ថប្រយោជន៍រក្សាតុល្យភាពអ័រម៉ូន។ ម្យ៉ាងវិញទៀតប្រេងដូងក៏មានលក្ខណៈសម្បត្តិសម្លាប់បាក់តេរីនិងពពួកវីរុសផ្សេងៗក្នុងរាងកាយ ហើយជួយបង្កើនកម្រិតថាមពល សម្រួលការរំលាយអាហារ និងការដុតរំលាយអាហារក្នុងពេលជាមួយគ្នាផងដែរ។
៦. កុំទទួលទានអាហាច្រើន ឬតិចពេក
ទម្លាប់នៃការទទួលទានក៏ដើរតួនាទីយ៉ាងសំខាន់ក្នុងការគ្រប់គ្រងផលិតអ័រម៉ូនផងដែរ។ ចូរចាំក្នុងចិត្តថា នៅពេលអ្នកទទួលទានច្រើន ឬតិចពេល នោះវានឹងជះផលប៉ះពាល់ដល់ការផលិតអ័រម៉ូនបង្កជាបញ្ហាពាក់ព័ន្ធជាមួយការឡើងចុះនៃទម្ងន់។ ដើម្បីជាការប្រសើរចូរទទួលទានឱ្យបានត្រឹមត្រូវ ប្រសិនបើអ្នកចង់រក្សាស្ថេរភាពនៃកម្រិតអ័រម៉ូន៕