Join with Health.com.kh on Telegram

​ការស្រាវជ្រាវ​របស់​ជ​ន​ជាតិ​ដា​ណឺ​ម៉ាក​បាន​បង្ហាញថា ការដើរ​លឿន និង​ការរត់​យឺតៗ​ជា​រៀងរាល់ថ្ងៃ​អាច​កាត់បន្ថយ​ហានិភ័យ​នៃ​ជំងឺ​បេះដូង និង​ជំងឺ​ដាច់​សរសៃឈាម​ខួរក្បាល​បាន​ប្រហែល​៥០% ប៉ុន្តែ​ការដើរ​រយៈពេល​មួយ​ម៉ោង​ជា​រៀងរាល់ថ្ងៃ​មិន​មាន​ការខុសប្លែក​គ្នា​នោះ​ទេ​។​

​អ្នកស្រាវជ្រាវ​បាន​និយាយថា ការស្រាវជ្រាវ​របស់​ពួកគេ​បាន​បង្ហាញថា កម្រិត​នៃ​ការធ្វើ​លំ​ហាត់ប្រាណ​ជាជាង​រយៈពេល​នៃ​ការធ្វើ​លំ​ហាត់ប្រាណ​គឺជា​អ្វី​ដែល​ការពារ​ប្រឆាំង​នឹង​ជំងឺ​មេ​តា​ប៉ូលីស ដែល​សំដៅ​ទៅលើ​ការបូកបញ្ចូល​គ្នា​នៃ​កត្តា​ដូចជា សម្ពាធ​ឈាម​ខ្ពស់​, កម្រិត​ជាតិ​ស្ករ​នៅក្នុង​ឈាម​កើនឡើង​, កម្រិត​ជាតិ​ខ្លាញ់​នៅក្នុង​ឈាម​មិន​ធម្មតា និង​ភាពធាត់ ដែល​បង្កើន​ហានិភ័យ​នៃ​ជំងឺ​បេះដូង​, ជំងឺ​ទឹកនោម​ផ្អែម និង​ជំងឺ​ដាច់​សរសៃឈាម​ខួរក្បាល​។​

​អ្នកស្រាវជ្រាវ អេ​វា ប្រ៊េស​ខត (Eva Prescott) និង​មិត្ត​រួម​ការងារ​របស់​គាត់​នៅ​សាកលវិទ្យាល័យ Bispebjerg ក្នុង​ទីក្រុង Copenhagen បាន​មើល​លើ​មនុស្ស​ពេញវ័យ​ជនជាតិ​ដា​ណឺម៉ា​កជាង ១០.០០០​នាក់​ដែល​មាន​អាយុ​ពី ២១​ឆ្នាំ ទៅ​៩៨​ឆ្នាំ ដែល​ត្រូវបាន​គេ​វាយតម្លៃ​ដំបូង​នៅ​ចន្លោះ​ឆ្នាំ ១៩៩១ ដល់​ឆ្នាំ​១៩៩៤ និង​បន្ទាប់មក​បាន​តាមដាន​រយៈពេល​លើសពី​១០​ឆ្នាំ​។ ចំពោះ​ការវាយតម្លៃ​ដំបូង​, ប្រហែល​២០%​នៃ​ស្ត្រី និង​២៧%​នៃ​បុរស​មាន​ជំងឺ​មេ​តា​បូ​លី​ក​។​

​ចំពោះ​ការចាប់ផ្តើម​នៃ​ការស្រាវជ្រាវ​, អ្នក​ដែល​មិនសូវ​ជា​ធ្វើ​សកម្មភាព​នានា ហាក់ដូចជា​ងាយ​នឹង​មាន​ជំងឺ​នេះ​។ ប្រហែល​១/៣​នៃ​ស្ត្រី​ដែល​មិន​ធ្វើ​សកម្មភាព​នានា និង​៣៧%​នៃ​បុរស​ដែល​មិន​ធ្វើ​សកម្មភាព​នានា មាន​ជំងឺ​មេ​តា​បូ​លី​ក បើ​ធៀប​ទៅ​នឹង​ស្ត្រី​ដែល​ធ្វើ​សកម្មភាព​គឺ ១០% និង​១៤%​នៃ​បុរស​ដែល​ធ្វើ​សកម្មភាព​។​

​នៅ​បញ្ចប់​នៃ​ការស្រាវជ្រាវ​, ជំងឺ​មេ​តា​ប៉ូ​លី​ក​បាន​វិវត្ត​ប្រហែល​១៥%​នៃ​អ្នក​ដែល​មិន​មាន​រោគសញ្ញា​នៃ​ជំងឺ​នេះ​នៅ​ពេល​ចាប់ផ្តើម​នៃ​ការស្រាវជ្រាវ​។ ជំងឺ​នេះ​បានវិវត្ត​ប្រហែល​១៩%​នៃ​អ្នក​ដែល​មិន​ធ្វើ​សកម្មភាព និង​១២%​នៃ​អ្នក​ដែល​ធ្វើ​សកម្មភាព​ខ្លាំងក្លា​។​

​ការស្រាវជ្រាវ​ចុងក្រោយ​បានបង្ហាញ​ថា វា​មិន​ត្រឹមតែ​បរិមាណ​នៃ​ការធ្វើ​លំ​ហាត់ប្រាណ​ប៉ុណ្ណោះ​ទេ​, ប៉ុន្តែ​កម្រិត​នៃ​ការធ្វើ​លំ​ហាត់ប្រាណ​ក៏​ជួយ​បន្ថយ​ហានិភ័យ​នៃ​ជំងឺ​មេ​តា​ប៉ូ​លី​ក​ផងដែរ​។ ការដើរ​លឿន​កាត់​បន្ថយ​ហានិភ័យ​បាន​ដល់​ទៅ​៥០% និង​ការរត់​យឺតៗ​កាត់បន្ថយ​ហានិភ័យ​បាន​ដល់​ទៅ​៤០% ខណៈពេល​ការដើរ​រយៈពេល​មួយ​ម៉ោង​ក្នុង​មួយ​ថ្ងៃៗ​មិនមាន​អ្វី​ខុសប្លែក​បន្តិច​សោះ​៕