ការស្រាវជ្រាវថ្មីមួយបានបង្ហាញថា ការផឹកកាហ្វេជំនួសអោយការផឹកទឹកអាចកែប្រែមុខងារនៃលាមកមកធម្មតាវិញលឿនក្នុងចំនោមអ្នកដែលបានទទួលការវះកាត់មួយផ្នែកនៃពោះវៀនធំរបស់ពួកគេ។គេយល់ថាកាហ្វេនឹងធ្វើអោយអ្នកជំងឺឆាប់ផោមជាងអ្នកផឹកទឹក។
អ្នកស្រាវជ្រាវដែលមកពីសាកលវិទ្យាល័យមន្ទីរពេទ្យ Heidelberg ក្នុងប្រទេសអាល្លឺម៉ង់ ក៏បានរកឃើញថា អ្នកជំងឺទាំងនោះអាចមានស្ថេរភាពទៅនឹងការញ៉ាំអាហារដែលរឹងឆាប់បន្ទាប់ពីការវះកាត់របស់ពួកគេជាងអ្នកដែលមិនផឹកកាហ្វេ។
ការស្រាវជ្រាវត្រូវបានចេញផ្សាយនៅក្នុងកាសែត BJS។
វេជ្ជបណ្ឌិត សាសឆា ម៉ូលឺរ (Sascha Muller) បាននិយាយថា ការស្ទះដំណើរការរបស់លាមកក្រោយពីធ្វើការវះកាត់គឺជាបញ្ហាទូទៅមួយបន្ទាប់ពីធ្វើការវះកាត់ពោះ ហើយគោលបំណងនៃការស្រាវជ្រាវនេះគឺដើម្បីធ្វើតេស្តមើលថាកាហ្វេនឹងជួយផ្តល់ភាពប្រសើរឡើងមែនឬយ៉ាងណា។
អ្នកស្រាវជ្រាវបានជ្រើសរើសអ្នកជំងឺ៨០នាក់ដែលមានបញ្ហាជំងឺមហារីកពោះវៀនធំ, ជំងឺបញ្ហាលើរចនាសម្ព័ន្ធនៃពោះវៀនធំ (diverticular disease), ជំងឺរលាកពោះវៀនធំ និងបញ្ហាដទៃទៀត។ អ្នកជំងឺមានអាយុជាមធ្យម ៦១ឆ្នាំ និងជាងពាក់កណ្តាលគឺជាបុរស។
អ្នកចូលរួមត្រូវបានចែកចេញជា២ក្រមៈ ក្រុមដែលបានផឹកកាហ្វេ និងក្រុមដែលបានផឹកទឹកបន្ទាប់ពីធ្វើការវះកាត់ពោះវៀនធំ។ អ្នកជំងឺត្រូវបានអោយ១០០មីលីលីត្រនៃកាហ្វេ ឬទឹកក្នុងពេល៣ដងផ្សេងៗគ្នាក្នុងមួយថ្ងៃៗ។
ការស្រាវជ្រាវបានរកឃើញថា អ្នកផឹកកាហ្វេបានចំណាយពេលលើសពី៦០ម៉ោងក្នុងការមានចលនាពោះវៀនដំបូង។ ចំណែកអ្នកផឹកទឹកវិញចំណាយពេលដល់ទៅ៧៤ម៉ោង។
ក្រុមអ្នកផឹកកាហ្វេក៏ងាយនឹងមានស្ថេរភាពទៅនឹងការញ៉ាំអាហាររឹងលឿនជាង៤៩ម៉ោងក្រោយពីការវះកាត់ផងដែរ។ អ្នកផឹកទឹកចំណាយពេលដល់ទៅ៥៦ម៉ោង។ អ្នកផឹកកាហ្វេក៏ងាយនឹងផោមក្នុងអំឡុងពេល៤១ម៉ោងបន្ទាប់ពីការវះកាត់បើធៀបទៅនឹងអ្នកផឹកទឹកគឺ៤៦ម៉ោង។
ម៉ូលឺរបាននិយាយថា នេះបង្ហាញថា មិនមានផលវិបាកដែលត្រូវបានទាក់ទងទៅនឹងការផឹកកាហ្វេណាដែលត្រូវបានឃើញនៅក្នុងការស្រាវជ្រាវនេះទេ។
អ្នកស្រាវជ្រាវបានសម្គាល់ឃើញថា របៀបនៃការអោយមុខងារពោះវៀនត្រឡប់មកធម្មតាវិញដោយការផឹកកាហ្វេនោះគឺមិនទាន់ដឹងច្បាស់នៅឡើយទេ។ មិនថាអ្វីក៏ដោយនៃចលនការ, វាច្បាស់ណាស់ថា ការផឹកកាហ្វេក្រោយការវះកាត់គឺមានតម្លៃថោក និងជាមធ្យោបាយដែលផ្តល់សុវត្ថិភាពដើម្បីអោយចលនានៃពោះវៀនដំណើរការក្រោយពីការវះកាត់ពោះវៀននោះ៕