ពាក់ព័ន្ធនឹងមេរោគកូវីដ-១៩ បំប្លែងខ្លួនថ្មី និងមន្ទិលថាតើវ៉ាក់សាំងបច្ចុប្បន្ន អាចបង្ការនឹងវីរុសបំប្លែងខ្លួននេះបានឫទេ លោកស្រីវេជ្ជបណ្ឌិតឱ វណ្ណឌីន បានឱ្យដឹងថា លទ្ធភាពនៃការចម្លងរបស់វា គឺខ្លាំង សាហាវ និងលឿនជាង។ ប៉ុន្តែ ទោះជាយ៉ាងណា លោកស្រីអះអាងថា អ្នកវិទ្យាសាស្ត្រ បានបញ្ជាក់ហើយ ថាវ៉ាក់សាំងកូវីដ-១៩ ដែលកំពុងប្រើប្រាស់នៅលើពិភពលោក ហើយប្រទេសជាច្រើនកំពុងតែប្រើប្រាស់ គឺនៅតែមានប្រសិទ្ធភាព។ ដោយឡែក ឆ្លើយតបនឹងសំណួរថា តើវាមានប្រសិទ្ធភាពកម្រិតណានោះ គឺគេកំពុងតែធ្វើការសិក្សា។
លោកស្រីវេជ្ជបណ្ឌិត បានបញ្ជាក់ថា បើទោះបីវីរុសកូវីដ-១៩ នេះមានការបំលែងខ្លួនថ្មីក៏ពិតមែន តែគោលការណ៍គ្រឹះរបស់វា គឺនៅដដែល មិនខុសអ្វីពីមនុស្សយើងដែលទៅកែសម្ផស្សដូច្នោះដែរ ទោះបីកែមុខមាត់ឫច្រមុះទៅជាបែបណាក្តី យើងនៅតែជាយើង ឈ្មោះ វង្សត្រកូលយើងបែបណាគឺនៅតែដដែល។ ដូចគ្នាដែរ វីរុសកូវីដ-១៩បំលែងខ្លួនថ្មី គឺនៅតែជាវីរុសកូវីដ-១៩។ ដូច្នេះ វ៉ាក់សាំង គឺវានៅតែមានប្រសិទ្ធភាព នៅក្នុងកម្រិតមួយដែលអាចទប់ស្កាត់បាន មិនឱ្យបុគ្គលនោះមានស្ថានភាពធ្ងន់ធ្ងរ ទោះបីជាកំពុងវាយលុកដោយវីរុសបច្ចុប្បន្នក្តី ឫវីរុសដែលកំពុងបំលែងខ្លួនក្តី៕