ការស្រាវជ្រាវថ្មីមួយបានបង្ហាញថា ស្ត្រីដែលមានការមករដូវដំបូងនៅវ័យក្មេងពេកអាចមានហានិភ័យខ្ពស់នៃជំងឺបេះដូង។រយៈពេលនៃការចាប់ផ្តើមនៃការមករដូវនៅអាយុតិចពេកត្រូវបានផ្សារភ្ជាប់ជាមួយនឹងសន្ទស្សន៍នៃទម្ងន់ខ្លួន, ទំហំចង្កេះ និងភាពធាត់ឡើងខ្ពស់នៅពេលពេញវ័យ ដែលគ្រប់កត្តាទាំងអស់នេះបង្កើនហានិភ័យនៃជំងឺសរសៃឈាមបេះដូង។
ការស្រាវជ្រាវត្រូវបានចេញផ្សាយនៅក្នុងកាសែត Journal of Clinical Endocrinology & Metabolism។ការស្រាវជ្រាវបានរាប់បញ្ចូលស្ត្រីជាង ១.៦០០នាក់ ដែលមានអាយុលើសពី៤០ឆ្នាំ។ ស្ត្រីត្រូវបានគេវាយតម្លៃលើខ្លាញ់ក្បាលពោះ និងខ្លាញ់នៅក្រោមស្បែក។អ្នកស្រាវជ្រាវក៏បានមើលទៅលើទំនាក់ទំនងរវាងប្រភេទនៃខ្លាញ់ទាំងនោះ និងកត្តានៃប្រដាប់ភេទស្ត្រី, ការជក់បារី, ការផឹកស្រា, កម្រិតនៃការធ្វើលំហាត់ប្រាណ, ការព្យាបាលដោយអរម៉ូន និងស្ថានភាពនៃការអស់រដូវ។
អ្នកស្រាវជ្រាវក៏បានរកឃើញថា ពេលនៃការមានវដ្តរដូវដំបូងត្រូវបានផ្សារភ្ជាប់ជាមួយនឹងគ្រប់កម្រិតនៃខ្លាញ់ចំពោះស្ត្រី ប៉ុន្តែមិនកម្រិតនៃខ្លាញ់ត្រង់កន្លែងជាក់លាក់នៃខ្លួននោះទេ។វេជ្ជបណ្ឌិត សាប់ប៊ុយឡាមី ទ្រីគុយដាណាថាន (Subbulaxmi Trikudanathan) ដែលមកពីសាលាវេជ្ជសាស្ត្រ Harvard បាននិយាយថា ការស្រាវជ្រាវនេះបង្ហាញថា កត្តាហានិភ័យនៃប្រដាប់ភេទស្ត្រី, ជាពិសេសរយៈពេលនៃការមករដូវដំបូង, ត្រូវបានផ្សារភ្ជាប់ជាមួយនឹងគ្រប់កម្រិតខ្លាញ់ទាំងអស់ ប៉ុន្តែមិនគ្រប់កន្លែងនៃខ្លាញ់ជាក់លាក់នោះទេ។
ទ្រីគុយដាណាថាន បានបន្ថែមថា សំណួរសំខាន់គឺថាតើហានិភ័យនៃប្រដាប់បន្តពូជស្ត្រីអាចត្រូវបានគេប្រើប្រាស់ដើម្បីធ្វើអន្តរាគមន៍នៃរបៀបរស់នៅចំពោះស្ត្រីដែលមានហានិភ័យខ្ពស់ដើម្បីការពារផលវិបាកមេតាប៉ូលីសនៃជំងឺធាត់ និងជំងឺសរសៃឈាមបេះដូងឬយ៉ាងណា។ជំងឺសរសៃឈាមបេះដូង គឺជាមូលហេតុនៃការស្លាប់ចំពោះស្ត្រីនៅក្នុងសហរដ្ឋអាមេរិក៕