ការស្រាវជ្រាវថ្មីមួយបានរកឃើញថា ជំងឺខ្សោយតម្រងនោមរ៉ាំរ៉ៃគឺវិវត្តលឿនចំពោះជនជាតិស្បែកខ្មៅជាងជនជាតិដទៃទៀតនៅក្នុងសហរដ្ឋអាមេរិក។ការស្រាវជ្រាវក៏បានបង្ហាញថា ការតាមដាននៃជំងឺខ្សោយតម្រងនោមរ៉ាំរ៉ៃចំពោះជនជាតិស្បែកខ្មៅអាចជួយផ្តល់ភាពប្រសើរឡើងនៃការថែទាំរបស់ពួកគេ។
អត្រានៃជំងឺតម្រងនោមរ៉ាំរ៉ៃក្នុងចំនោមជនជាតិស្បែកខ្មៅគឺស្រដៀងគ្នាទៅនឹងជនជាតិអាមេរិកដទៃទៀត ប៉ុន្តែវាហាក់ដូចជាមានការវិវត្តលឿនទៅជាជំងឺខ្សោយតម្រងនោមក្នុងចំនោមជនជាតិស្បែកខ្មៅ។ ការកើតមាននៃជំងឺតម្រងនោមក្នុងចំនោមជនជាតិស្បែកខ្មៅគឺ៨,៦% ធៀបទៅនឹងជនជាតិអាមេរិកដទៃទៀតមានតែ៣,៥%ប៉ុណ្ណោះ។ ហេតុផលនៃការខុសប្លែកគ្នានេះមិនត្រូវបានគេដឹងនោះទេ។
ចំពោះការស្រាវជ្រាវនេះ, អ្នកស្រាវជ្រាវបានប្រើប្រាស់វិធីមួយនៃការវិវត្តនៃជំងឺតម្រងនោមរ៉ាំរ៉ៃដើម្បីកំណត់ថាតើអត្រានៃកត្តាហានិភ័យទូទៅចំពោះជំងឺតម្រងនោមរ៉ាំរ៉ៃដូចជា ជំងឺលើសឈាម និងជំងឺនោមផ្អែមនោះ, អាចពន្យល់បានហេតុអ្វីបានជាជនជាតិស្បែកខ្មៅមានការកើតមានខ្ពស់នៃជំងឺតម្រងនោមនោះ។
ការកើនឡើងហានិភ័យនោះមិនត្រូវបានគេពន្យល់បានដោយកត្តាហានិភ័យនោះទេ ប៉ុន្តែវាត្រូវបានផ្សារភ្ជាប់ទៅនឹងការវិវត្តលឿននៃជំងឺតម្រងនោមរ៉ាំរ៉ៃអំឡុងពេលនៃដំណាក់កាលចុងក្រោយនៃជំងឺ, នេះដោយយោងតាមការស្រាវជ្រាវដែលត្រូវបានចេញផ្សាយនៅ Journal of the American Society of Nephrology។
វេជ្ជបណ្ឌិត ថូម៉ាស ហឺរហ្គ័រ (Thomas Hoerger) បាននិយាយថា អ្នកស្រាវជ្រាវក៏បានសរុបថា ការប្រើប្រាស់តេស្តទឹកនោមដើម្បីតាមដានជនជាតិស្បែកខ្មៅចំពោះជំងឺតម្រងនោមនោះគឺមានតម្លៃប្រសិទ្ធភាព ក្នុងរយៈពេល៥ ទៅ១០ឆ្នាំក្រោយ ជាពិសេសចំពោះអ្នកដែលមានជំងឺទឹកនោមផ្អែម ឬជំងឺលើសឈាម។ ការតាមដានអាចនាំអោយមានការព្យាបាលទាន់ពេលវេលាដែលអាចការពារជំងឺខ្សោយតម្រងនោមបាន៕