ទម្លាប់មួយចំនួនមុនធ្វើលំហាត់ប្រាណអាចនឹងផ្ដល់ផលល្អ ឬអាក្រក់ស្មានមិនដល់ ដូច្នេះអ្នកចាំបាច់ត្រូវតែប្រុងប្រយ័ត្ន! (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើមុនធ្វើលំហាត់ប្រាណ អ្នកគួរចៀសវាងទម្លាប់អ្វីខ្លះ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអ្វីដែលមិនគួរធ្វើមុនពេលហាត់ប្រាណ ៖

១. កុំចាប់ផ្ដើមធ្វើលំហាត់ប្រាណនៅពេលពោះទទេរមិនទាន់ទទួលទានអ្វី

ទោះជាយ៉ាងណាក៏ដោយ ប្រសិនបើអ្នកមិនទាន់ញ៊ាំអ្វីសោះកំឡុងពេលពី ២ ទៅ ៣ ម៉ោងមុនធ្វើលំហាត់ប្រាណ នោះរាងកាយអាចនឹងចាប់ផ្ដើមប្រើប្រាស់ប្រូតេអ៊ីនជាថាមពល។ នេះមានន័យថាអ្នកនឹងមានផ្ទុកប្រូតេអ៊ីនតិចជាងមុនសម្រាប់សាច់ដុំដើម្បីជួសជុលនិងលូតលាស់។ ម្យ៉ាងវិញទៀតប្រសិនបើអ្នកផ្ដោតលើការប្រើប្រាស់ខ្លាញ់ជាប្រភពចម្បងនៃថាមពល ក៏មិនមែនមានន័យថារាងកាយនឹងដុតបំផ្លាញ់កាឡូរីបន្ថែមដែរ។

២. កុំទទួលទានទឹកច្រើនពេកមុនពេលហាត់ប្រាណ

ការរក្សាជាតិទឹកឱ្យបានច្រើនគ្រប់គ្រាន់មុនធ្វើលំហាត់ប្រាណ គឺសំខាន់ ប៉ុន្តែចៀសវាងការទទួលទានច្រើនពេក! បើមិនដូច្នោះទេឈាមរបស់អ្នកនឹងព្យាយាមរក្សាតុល្យភាពកម្រិតអំបិល។ កោសិកាអាចនឹងហើម ហើយអ្នកក៏អាចជួបប្រទះអាការៈវិលមុខ ឈឺចាប់ និងសូម្បីតែក្អួត។ ដើម្បីជាការប្រសើរចូរទទួលទានទឹកប្រមាណពី ៤៤៤មីលីលីត្រ ទៅ ៥៩០ មីលីលីត្រកំឡុងពេល ១ ទៅ ២ ម៉ោងមុនពេលហាត់។ ១៥ នាទីមុនពេលចាប់ផ្ដើម ចូរទទួលទានទឹកប្រមាណ ២៣៦ មីលីលីត្រ ទៅ ២៩៦ មីលីលីត្រ។ អ្នកអាចត្រូវទទួលទានទឹកច្រើនជាងនេះ ប្រសិនបើអ្នកបែកញើសច្រើន ឬអាកាសធាតុរាងក្ដៅ។

៣. កុំស្លៀកស្ដើង ឬក្រាស់ច្រើនជាន់ពេក

សូម្បីតែអ្នកធ្វើលំហាត់ប្រាណនៅថ្ងៃដែលមានអាកាសធាតុត្រជាក់បំផុតនៃឆ្នាំក៏ដោយ ក៏អ្នកមិនគួរស្លៀកពាក់ច្រើនជាន់ពេកដែរ។ ការធ្វើលំហាត់ប្រាណអាចធ្វើឱ្យសីតុណ្ហភាពរាងកាយកើនឡើង ហើយបែកញើសច្រើន។ ដូច្នេះប្រសិនបើខ្យល់ត្រជាក់បក់មកប៉ះ ញើសនឹងហួតយ៉ាងលឿន ហើយអ្នកប្រាកដជាមានអារម្មណ៍ព្រឺត្រជាក់។ ផ្ទុយមកវិញនៅថ្ងៃដែលមានអាកាសធាតុក្ដៅ ចូរជ្រើសរើសសម្លៀកបំពាក់សាច់ក្រណាត់ដែលអនុញ្ញាតឱ្យស្បែកដកដង្ហើមបាន ហើយផ្ដល់ផាសុកភាពងាយធ្វើចលនា។

៤. កុំចាប់ផ្ដើមធ្វើលំហាត់ប្រាណដោយមិនសម្រាកឱ្យបានត្រឹមត្រូវជាមុនសិន

ថ្ងៃសម្រាក គឺសំខាន់ណាស់សម្រាប់រាងកាយដើម្បីជុសជួលនិងពង្រឹងសុខភាពឡើងវិញ។ ហើយវាក៏ជាផ្នែកដ៏ចាំបាច់បំផុតមួយនៃកាលវិភាគធ្វើលំហាត់ប្រាណរបស់អ្នក។ ប្រសិនបើអ្នករំលងថ្ងៃសម្រាក នោះអ្នកអាចនឹងជួបប្រទះអាការៈអស់កម្លាំងខ្លាំង។ ការអនុញ្ញាតឱ្យរាងកាយបានសម្រាក គឺល្អសម្រាប់សាច់ដុំដើម្បីមានឱកាសជាសះស្បើយនិងលូតលាស់ទប់ស្កាត់ការឆាប់អស់កម្លាំង។ អ្នកនឹងគេងបានស្រួលកាត់បន្ថយហានិភ័យនៃការរងរបួស។

៥. កុំទទួលទានកាហ្វេ

ពិតណាស់កាហ្វេអ៊ីនអាចជួយផ្ដល់ថាមពល និងការផ្ដោតអារម្មណ៍កំឡុងពេលធ្វើលំហាត់ប្រាណ ប៉ុន្តែមិនបានយូរឡើយ។ ការរំលាយកាហ្វេអ៊ីនច្រើនពេកអាចនាំឱ្យការកន្ត្រាក់ត្រូវប្រមូលផ្ដុំក្នុងពោះវៀនដែលបង្កើនចលនាពោះវៀន។ ជាលទ្ធផលអ្នកអាចចូលបន្ទប់ទឹកញឹកញាប់កំឡុងពេលហាត់ប្រាណ។ នេះគ្រាន់តែជាផ្នែកមួយនៃផលប៉ះពាល់ប៉ុណ្ណោះ ខណៈដែលអ្នកអាចជួបប្រទះអាការៈអស់កម្លាំង ពិបាកគេងលក់ ចង្វាក់បេះដូងលោតញាប់ខុសប្រក្រតី ថប់បារម្ភ ក្រហាយទ្រូង និងសម្ពាធឈាមឡើងខ្ពស់៕