ភាគច្រើននៃពួកយើងប្រហែលជាមិនធ្លាប់ដឹងទេថា សំបកផ្លែឈើមួយចំនួនអាចជួយឱ្យសម្រស់ស្បែកកាន់តែប្រសើរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើសំបកផ្លែឈើទាំងនោះមានអ្វីខ្លះ? កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗប្រើប្រាស់សំបកផ្លែឈើមួយចំនួនថែស្បែក ៖

១. សំបកចេកទុំ

មានផ្ទុកសម្បូរទៅដោយសារធាតុប្រឆាំងអុកស៊ីតកម្មដែលនេះជាមូលហេតុនាំឱ្យសំបកផ្លែឈើនេះអាចជួយកម្ចាត់សញ្ញានៃភាពចាស់តាមវ័យរបស់ស្បែក។ អ្វីដែលអ្នកត្រូវធ្វើ គឺគ្រាន់តែដុសផ្នែកខាងក្នុងនៃសំបកចេកថ្នមៗលើស្បែក។ វិធីនេះនឹងជួយឱ្យសារធាតុប្រឆាំងអុកស៊ីតកម្មជ្រាបចូលក្នុងកោសិកាស្បែក។ តាមរយៈការផ្គត់ផ្គង់សារធាតុប្រឆាំងអុកស៊ីតកម្មដល់កោសិកាស្បែក នោះស្បែកនឹងទទួលបានការការពារតាមតម្រូវការប្រឆាំងការបំផ្លាញពីសំណាក់រ៉ាឌីកាល់សេរី។

២. សំបកផ្លែស្វាយទុំ

ជាប្រភពនៃវីតាមីន A និងវីតាមីន C ដែលជាសារធាតុប្រឆាំងអុកស៊ីតកម្មដ៏មានថាមពលជួយពន្យារដំណើរការនៃភាពចាស់តាមវ័យរបស់ស្បែក។ អ្វីដែលអ្នកត្រូវធ្វើ គឺគ្រាន់តែលាងសម្អាតស្បែកមុខកម្ចាត់ជាតិខ្លាញ់និងភាពកខ្វក់ចេញជាមុនសិន។ បន្ទាប់មកសឹមជូតផ្ដិតៗឱ្យស្ងួត រួចដាក់បិតផ្នែកខាងក្នុងនៃសំបកផ្លែស្វាយលើស្បែកមុខ។ រងចាំសម្រាប់រយៈពេលពី ១៥ ទៅ ២០ នាទី សឹមលាងសម្អាតចេញជាមួយទឹកក្ដៅឧណ្ហៗជាការស្រេច។

៣. សំបកផ្លែល្ហុងទុំ

មានផ្ទុកសម្បូរទៅដោយវីតាមីន A និងវីតាមីន C ជាពិសេសអង់ស៊ីម papain ដែលល្អសម្រាប់សុខភាពស្បែកប្រឆាំងភាពចាស់តាមវ័យ។ អ្វីដែលអ្នកត្រូវធ្វើ គឺគ្រាន់តែប្រើប្រាស់ស្លាបព្រាកោសយកផ្នែកខាងក្នុងនៃសំបកផ្លែល្ហុងទុំ។ បន្ទាប់មកលាបម៉ាស្សាសាច់ល្ហុងនោះលើស្បែកមុខ។ រងចាំសម្រាប់រយៈពេល ៣០ នាទី សឹមលាងសម្អាតចេញជាមួយទឹកក្ដៅឧណ្ហៗជាការស្រេច។

៤. សំបកផ្លែបឺរទុំ

ជាប្រភពដ៏ប្រសើរនៃវីតាមីន E និងអាស៊ីតខ្លាញ់សុខភាពល្អដែលធ្វើឱ្យស្បែកទន់និងគ្មានស្នាមជ្រីវជ្រួញ។ អ្វីដែលអ្នកត្រូវធ្វើ គឺគ្រាន់តែកោសយកសាច់ផ្នែកខាងក្នុងនៃសំបកផ្លែបឺរមកលាបម៉ាស្សាលើស្បែកមុខ។ រងចាំសម្រាប់រយៈពេល ៣០ នាទី សឹមលាងសម្អាតចេញ។ អ្នកអាចលាយជាមួយទឹកឃ្មុំ ឬយ៉ាអួរបន្តិចក៏បាន។

៥. សំបកក្រូច

មានផ្ទុកសម្បូរទៅដោយវីតាមីន C ដែលមិនត្រឹមតែល្អសម្រាប់ពង្រឹងប្រព័ន្ធភាពស៊ាំប៉ុណ្ណោះទេ ប៉ុន្តែក៏ចាំបាច់សម្រាប់ភាពទន់រលោង និងតឹងណែននៃស្បែកផងដែរ។ អ្វីដែលអ្នកត្រូវធ្វើ គឺគ្រាន់តែកិនសំបកផ្លែក្រូចក្នុងម៉ាស៊ីនកិនកាហ្វេ បន្ទាប់មកលាយជាមួយយ៉ាអួរសុទ្ធ ឬប្រេងអូលីវបន្តិច។ លាបល្បាយលើស្បែកមុខនិងរងចាំសម្រាប់រយៈពេលពី ១៥ ទៅ ២០ នាទី។ លាងសម្អាតចេញជាមួយទឹកក្ដៅឧណ្ហៗ។ អនុវត្តជាប្រចាំដើម្បីជួយឱ្យស្បែកបាត់ស្នាមនិងភ្លឹរលោង៕