ដោយយោងតាមការស្រាវជ្រាវមួយពីសមាគមន៍ជំងឺមហារីកអាមេរិក, អ្នកដែលផឹកកាហ្វេដែលមានជាតិកាហ្វេអ៊ីនច្រើនជាង៤ពែងជារៀងរាល់ថ្ងៃអាចបន្ថយហានិភ័យនៃការស្លាប់ពីទម្រង់នៃជំងឺមហារីកមួយចំនួនបាន។
អ្នកស្រាវជ្រាវបានរកឃើញថា អ្នកផឹកកាហ្វេជាទៀងទាត់មានហានិភ័យពាក់កណ្តាលនៃការស្លាប់ពីជំងឺមហារីកមាត់ និងបំពង់កជាងអ្នកដទៃទៀតដែលមិនដែលផឹកកាហ្វេសោះ ឬផឹកម្តងម្កាល។
ជេណេត ហីលដឺប្រេន (Janet Hildebrand) បាននិយាយថា កាហ្វេគឺជាភេសជ្ជៈមួយប្រភេទដែលពេញនិយមនៅក្នុងពិភពលោក ហើយមានសមាសធាតុផ្សំនៃអង់ទីអុកស៊ីដង់, ប៉ូលីហ្វេណុល និងសារធាតុសកម្មដទៃទៀតដែលអាចជួយការពារប្រឆាំងទៅនឹងការវិវត្តនៃជំងឺមហារីក។ ទោះបីជាវាមិនសូវជាជួបញឹកញាប់នៅក្នុងសហរដ្ឋអាមេរិកក៏ដោយ, ប៉ុន្តែជំងឺមហារីកក្រអូមមាត់ ឬបំពង់កគឺជាជំងឺមហារីកមួយក្នុងចំនោមជំងឺមហារីកទូទៅបំផុតចំនួន១០នៅក្នុងពិភពលោក។
នៅក្នុងការស្រាវជ្រាវ, អ្នកស្រាវជ្រាវបានមើលទៅលើមនុស្សជិត១លាននាក់។ ពួកគេបានពិនិត្យលើការផ្សារភ្ជាប់ក្នារវាងការផឹកកាហ្វេ ឬតែដែលមានជិតកាហ្វេអ៊ីន ជាមួយនឹងទម្រង់នៃជំងឺមហារីកក្រអូមមាត់។អ្នកចូលរួមមិនមានជំងឺមហារីកនោះទេនៅពេលការស្រាវជ្រាវបានចាប់ផ្តើម។ ទោះជាយ៉ាងណាក៏ដោយ, ក្រោយការស្រាវជ្រាវអស់រយៈពេល២៦ឆ្នាំ, ៨៦៨នាក់បានស្លាប់ដោយសារជំងឺមហារីកមាត់ និងបំពង់ក។
ការស្រាវជ្រាវបានរកឃើញថា ការផឹកកាហ្វេដែលមានជាតិកាហ្វេអ៊ីនច្រើនជាង៤ពែងជារៀងរាល់ថ្ងៃត្រូវបានផ្សារភ្ជាប់ទៅនឹង៤៩%នៃការថយចុះហានិភ័យនៃការស្លាប់ពីជំងឺមហារីកមាត់។ បើមិនមើលទៅលើភេទ ឬថាតើអ្នកចូលរួមជក់បារី ឬផឹកស្រាយ៉ាងណានោះ, អ្នកស្រាវជ្រាវបានចង្អុលបង្ហាញថា ជាមួយនឹងពែងនីមួយៗនៃកាហ្វេដែលពួកគេបានផឹក, ហានិភ័យនៃការស្លាប់របស់ពួកគេពីទម្រង់នៃជំងឺមហារីកនេះបានធ្លាក់ចុះ។ការស្រាវជ្រាវក៏បានបង្ហាញថា ការផឹកកាហ្វេដែលមិនមានជាតិកាហ្វេអ៊ីនច្រើនជាង២ពែងក្នុងមួយថ្ងៃអាចមានអត្ថប្រយោជន៍ដូចគ្នា។ គាត់បានបន្ថែមថា ប៉ុន្តែមិនមានការផ្សារភ្ជាប់គ្នាណាត្រូវបានរកឃើញរវាងជំងឺមហារីកមាត់ និងការផឹកតែនោះទេ។
អ្នកស្រាវជ្រាវបានសម្គាល់ថា ការស្រាវជ្រាវបន្ថែមគឺចាំបាច់ដើម្បីអោយយល់ច្បាស់ពីមូលហេតុថាតើហេតុអ្វីបានជាកាហ្វេមានឥទ្ធិពលការពារប្រឆាំងនឹងជំងឺមហារីកក្រអូមមាត់នោះ។
វេជ្ជបណ្ឌិត រ៉ូប៊ឺត ខេល (Robert Kelsch) ដែលមកពីប្រព័ន្ធសុខភាព North Shore-LIJ បាននិយាយថា ការស្រាវជ្រាវបន្ថែមគឺជារឿងចាំបាច់ដើម្បីបញ្ជាក់ពីប្រសិទ្ធភាពនេះ និងវាជះឥទ្ធិពលទៅលើប្រជាជនទាំងមូលឬយ៉ាងណា។ គាត់បានបន្ថែមថា ជំងឺមហារីកក្រអូមមាត់ និងបំពង់កជាច្រើនត្រូវបានផ្សារភ្ជាប់ទៅនឹងការឆ្លងមេរោគ HPV ហើយការស្រាវជ្រាវមិនបានបញ្ជាក់ពីឥទ្ធិពលនាននៃជំងឺមហារីកក្រអូមមាត់ទៅនឹងមេរោគ HPV នោះទេ។
បន្ថែមពីនេះ, ខេលបាននិយាយថា សូមចាំថា, ការស្រាវជ្រាវនេះបានបញ្ជាក់តែការថយចុះការស្លាប់ពីជំងឺមហារីកក្រអូមមាត់តែប៉ុណ្ណោះ។ វាមិនបានបង្ហាញថា កាហ្វេដែលមានជាតិកាហ្វេអ៊ីននឹងការពារពីអ្វីដែលអ្នកមានជំងឺមហារីកក្រអូមមាត់ហើយនោះទេ។វេជ្ជបណ្ឌិត ម៉ាស៊ល ផូសណឺរ (Marshall Posner) បាននិយាយថា នេះគឺជាព័ត៌មានល្អមួយប្រសិនបើអ្នកផឹកកាហ្វេច្រើននោះ។
ទោះជាយ៉ាងណាក៏ដោយ, ផូសណឺរបានយល់ស្របថា តួនាទីនៃជំងឺមហារីកដែលទាក់ទងទៅនឹងមេរោគ HPV នោះចាំបាច់ត្រូវបានគេបញ្ជាក់។ អ្នកជំងឺដែលមានជំងឺមហារីកក្រអូមមាត់ និងបំពង់កដែលត្រូវបានទាក់ទងទៅនឹងមេរោគ HPV ត្រូវបានជាសះស្បើយច្រើនជាង៧៥%។
ការស្រាវជ្រាវត្រូវបានចេញផ្សាយនៅក្នុងកាសែត American Journal of Epidemiology៕