​ការស្រាវជ្រាវ​ថ្មី​មួយ​បាន​បង្ហាញថា មាន​ការផ្សារភ្ជាប់​គ្នា​រវាង​រោគសញ្ញា​នៃ​ជំងឺ​ធ្លាក់​ទឹកចិត្ត​, ជំងឺ​ថប់​បារម្ភ និង​ជំងឺ​នៃ​ការឈឺ​ថ្គាម​។​​ជំងឺ​ឈឺ​ថ្គាម​ប៉ះពាល់​ទៅលើ​សាច់ដុំ និង​សន្លាក់​ដែល​ផ្សារភ្ជាប់​ពី​ថ្គាម​ក្រោម​ទៅ​លលា​ដ៏​ក្បាល​។​​ការស្រាវជ្រាវ​បាន​មើល​ទៅលើ​អ្នកជំងឺ​ជាង​៤.០០០​នាក់​ដែល​បាន​ធ្វើ​ការពិនិត្យ​សុខភាព​ទូទៅ និង​សុខភាព​មាត់​ធ្មេញ ហើយ​ការវាយតម្លៃ​លើ​ការឈឺ​ថ្គាម​នេះ និង​បំពេញ​លើ​សំណួរ​ដែល​ទាក់ទង​កត្តា​ហានិភ័យ​នៃ​បញ្ហា​ផ្លូវចិត្ត​។​

​អ្នកស្រាវជ្រាវ​បាន​រកឃើញថា រោគសញ្ញា​នៃ​ជំងឺ​ធ្លាក់​ទឹកចិត្ត​ត្រូវ​បាន​ផ្សារភ្ជាប់​ច្រើន​ទៅនឹង​ការឈឺ​ថ្គាម​ជាង​ការឈឺចាប់​សាច់ដុំ ខណៈពេល​ដែល​រោគសញ្ញា​នៃ​ជំងឺ​ថប់​បារម្ភ​ត្រូវ​បាន​ផ្សារភ្ជាប់​ជាមួយ​នឹង​ការឈឺចាប់​សាច់ដុំ​។ ការស្រាវជ្រាវ​ត្រូវ​បាន​ចេញផ្សាយ​នៅក្នុង​កាសែត The Journal of Pain​។​

​អ្នកស្រាវជ្រាវ​បាន​និយាយថា ការឈឺ​ថ្គាម​អាច​ជា​រោគសញ្ញា​រាងកាយ​នៃ​ជំងឺ​ធ្លាក់​ទឹកចិត្ត ឬ​ជំងឺ​ថប់​បារម្ភ​។ ពួកគេ​បាន​ពន្យល់ថា បញ្ហា​សុខភាព​ផ្លូវចិត្ត​ទាំងនោះ​អាច​នាំអោយ​មាន​ការកើនឡើង​សកម្មភាព​នៅ​នឹង​សាច់ដុំ​ថ្គាម​ដែល​អាច​នាំអោយ​មាន​ការ​រលាក និង​ឈឺ​។​

​វេជ្ជបណ្ឌិត ស្តេ​វិន ខីន​លឺរ (Stefan Kindler) ដែល​មកពី​សាកលវិទ្យាល័យ Greifswald បាន​និយាយថា វា​ក៏​អាច​ទៅ​រួច​ផង​ដែរ​ដែល ភាព​មិន​មាន​លំនឹង​នៃ​សារធាតុ​គីមី​នៅ​ក្នុង​ខួរក្បាល​ចំពោះ​អ្នក​ដែល​មាន​ជំងឺ​ធ្លាក់​ទឹកចិត្ត និង​ជំងឺ​ថប់​បារម្ភ​អាច​នាំអោយ​មាន​ដំណើរកា​រ​នៃ​អារម្មណ៍​ឈឺ​មិន​ធម្មតា​។​

​អ្នកស្រាវជ្រាវ​បានចង្អុលបង្ហាញ​ថា ការស្រាវជ្រាវ​ពីមុន​បាន​បង្ហាញ​ពី​ការ​ផ្សារភ្ជាប់​រវាង​ជំងឺ​ធ្លាក់​ទឹកចិត្ត និង​ជំងឺ​ឈឺ​ថ្គាម​នោះ​។ ដោយយោង​តាម​ការស្រាវជ្រាវ​របស់​ពួកគេ​, ក្រុម​របស់​ខីន​លឺរ​បាន​សរុបថា វា​មាន​ការផ្សារភ្ជាប់​ខ្លាំង​រវាង​រោគសញ្ញា​នៃ​ជំងឺ​ធ្លាក់​ទឹកចិត្ត​, រោគសញ្ញា​នៃ​ជំងឺ​ថប់​បារម្ភ ជាមួយនឹង​ការឈឺ​ថ្គាម​៕