ការស្រាវជ្រាវថ្មីមួយបានរកឃើញថា ភាពមិនធម្មតាក្នុងចំនោមហ្សែន៥គឺកើតមានចំពោះដុំសាច់ខួរក្បាលម្យ៉ាងដែលត្រូវបានគេស្គាល់ថា ដុំសាច់ក្នុងស្រោមខួរ (meningioma) ។
ដុំសាច់ក្នុងស្រោមខួរក្បាលគឺជាប្រភេទនៃដុំសាច់ក្នុងខួរក្បាលទូទៅបំផុត។ ជាធម្មតា ដុំសាច់ប្រភេទនេះគឺជាដុំសាច់ប្រភេទស្លូត ប៉ុន្តែមានប្រហែល១០%នៃករណីបានវិវត្តទៅជាជំងឺមហារីក។ ការវះកាត់គឺជាការព្យាបាលតែមួយគត់ចំពោះជំងឺដុំសាច់ក្នុងស្រោមខួរក្បាលនេះ ប៉ុន្តែការស្រាវជ្រាវអាចជួយនាំផ្លូវនូវការព្យាបាលថ្មី។
ការស្រាវជ្រាវពីមុនបានរកឃើញថា ប្រហែលពាក់កណ្តាលនៃដុំសាច់ក្នុងស្រោមខួរក្បាលត្រូវបានផ្សារភ្ជាប់ទៅនឹងមុយតាស្យុង ឬការលេចឡើងហ្សែនមួយដែលត្រូវបានគេស្គាល់ថា neurofibromin 2។ ប្រភពសេនេទិចនៃប្រភេទនៃដុំសាច់ក្នុងស្រោមខួរក្បាលដទៃទៀតមិនត្រូវបានគេដឹងនោះទេ។
នៅក្នុងការស្រាវជ្រាវ, អ្នកស្រាវជ្រាវបានវិភាគលើគម្រូពីជំងឺដុំសាច់ក្នុងស្រោមខួរក្បាលចំនួន៣០០ ហើយបានរកឃើញថា ភាពមិនធម្មតាក្នុងចំនោមហ្សែន៤ដទៃទៀតក៏ត្រូវបានផ្សារភ្ជាប់ជាមួយនឹងដុំសាច់ខួរក្បាលផងដែរ។ ហ្សែននីមួយៗទំនោរជាត្រូវបានផ្សារភ្ជាប់ជាមួយនឹងដុំសាច់នៅក្នុងតំបន់ផ្សេងៗពីគ្នានៃខួរក្បាល។ ទីតាំងអាចបង្ហាញថាតើដុំសាច់ក្នុងស្រោមខួរក្បាលនោះនឹងក្លាយទៅជាជំងឺមហារីកបានយ៉ាងដូចម្តេច។
ការស្រាវជ្រាវត្រូវបានចេញផ្សាយនៅក្នុងកាសែត Science។
ម៉ុយរ៉ាត ហ្គុយនេល (Murat Gunel) ជាសាស្ត្រាចារ្យខាងផ្នែកវះកាត់ប្រព័ន្ធប្រសាទដែលមកពីសាកលវិទ្យាល័យ Yale បាននិយាយថា ការបញ្ចូលគ្នានៃមុយតាស្យុងជាមួយនឹងទីតាំងនៃដុំសាច់រីកលូតលាស់នោះបានបង្ហាញផ្ទាល់ និងបើកទ្វារសម្រាប់ការព្យាបាលដែលរួមមាន ការព្យាបាលអ្នកជំងឺមួយចំនួនជាមួយនឹងការព្យាបាលដោយសារធាតុគីមី ឬអោយការព្យាបាលដោយសារកាំរស្មីវិទ្យុសកម្ម៕