អ្នកដែលចំណាយពេលជាច្រើនម៉ោងក្នុងមួយថ្ងៃៗដោយមិនមានការក្រោកឈរ និងធ្វើចលនាអ្វីសោះនោះគួរតែប្រុងប្រយ័ត្ន។ ការស្រាវជ្រាវថ្មីមួយបានបង្ហាញថា មនុស្សអង្គុយក្នុងមួយថ្ងៃៗច្រើនប៉ុណ្ណា, ហានិភ័យនៃបញ្ហាសុខភាពរ៉ាំរ៉ៃនឹងកើតមានច្រើនប៉ុណ្ណោះដែលមានដូចជាជំងឺមហារីក, ជំងឺទឹកនោមផ្អែម និងជំងឺបេះដូង។
អ្នកស្រាវជ្រាវដែលមកពីសាកលវិទ្យាល័យអូស្ត្រាលី និងកាន់សាស បាននិយាយថា ការស្រាវជ្រាវរបស់ពួកគេមានការផ្សារភ្ជាប់ចំពោះអ្នកធ្វើការក្នុងការិយាល័យ, អ្នកបើកបរ និងមនុស្សដទៃទៀតដែលអង្គុយជាទៀងទាត់ក្នុងរយៈពេលយូរ។ ដើម្បីបន្ថយហានិភ័យនៃជំងឺរ៉ាំរ៉ៃ, អ្នកស្រាវជ្រាវបានសរុបថា មនុស្សគួរតែអង្គុយអោយបានតិច និងធ្វើចលនាអោយបានច្រើន។
រីឆាដ រ៉ូសេនក្រេន (Richard Rosenkranz) ជាសាស្ត្រាចារ្យរងខាងផ្នែកចំណីអាហារនៅសាកលវិទ្យាល័យកាន់សាសបាននិយាយថា យើងដឹងថា អ្នកដែលធ្វើចលនាច្រើនគឺមានភាពល្អប្រសើរចំពោះជំងឺបើធៀបទៅនឹងអ្នកដែលធ្វើចលនាតិច ប៉ុន្តែយើងក៏គួរតែកាត់បន្ថយការអង្គុយផងដែរ។
គាត់បានពន្យល់ថា ការងារនៅក្នុងការិយាល័យជាច្រើនដែលតម្រូវអោយអង្គុយក្នុងរយៈពេលយូរនោះ អាចផ្តល់គ្រោះថ្នាក់ដល់សុខភាពរបស់អ្នកដោយសារតែភាពមិនមានចលនា និងថយចុះការចំណាយថាមពល។ការស្រាវជ្រាវបានធ្វើទៅលើបុរសជនជាតិអូស្ត្រាលី ៦៣.០០០នាក់ដែលមានអាយុពី៤៥ឆ្នាំ ទៅ៦៥ឆ្នាំ។ អ្នកស្រាវជ្រាវបានសួរសំនួរទៅបុរសអំពីថាតើពួកគេមានជំងឺរ៉ាំរ៉ៃឬយ៉ាងណា។ បុរសទាំងនោះក៏បានប្រាប់ថាតើរយៈពេលប៉ុន្មានម៉ោងដែលពួកគេបានចំណាយពេលក្នុងការអង្គុយក្នុងមួយថ្ងៃៗនោះ។
ការស្រាវជ្រាវបានលើកឡើងថា បុរសដែលបានអង្គុយតិចជាង៤ម៉ោងក្នុងមួយថ្ងៃៗហាក់ដូចជាមានបញ្ហាសុខភាពរ៉ាំរ៉ៃ ដូចជាជំងឺមហារីក, ជំងឺទឹកនោមផ្អែម, ជំងឺបេះដូង ឬជំងឺលើសឈាមតិចជាងអ្នកដែលអង្គុយច្រើនជាង៤ម៉ោងក្នុងមួយថ្ងៃៗ។ អ្នកស្រាវជ្រាវក៏បានសម្គាល់ឃើញថា ហើយបុរសដែលបានអាយុក្នុងរយៈពេលតិចជាង៦ម៉ោងជារៀងរាល់ថ្ងៃហាក់ដូចជាមានហានិភ័យខ្ពស់ទៅនឹងជំងឺទឹកនោមផ្អែម។
ចំនួននៃជំងឺរ៉ាំរ៉ៃបានបង្ហាញថាមានការកើនឡើងទៅតាមរយៈពេលនៃការអង្គុយ។ នេះគឺជាការពិតក្រោយពីអ្នកស្រាវជ្រាវបានមើលទៅលើកម្រិតនៃការធ្វើសកម្មភាព, អាយុ, ប្រាក់ចំណូល, ចំនេះដឹង, ទម្ងន់ និងកម្ពស់របស់បុរសនោះ។
រ៉ូសេនក្រេនបាននិយាយថា ក្រុមដែលអង្គុយយូរជាង៨ម៉ោងមានហានិភ័យខ្ពស់បំផុត។គាត់បាននិយាយថា វាមិនត្រឹមតែមនុស្សមិនធ្វើលំហាត់ប្រាណបានគ្រប់គ្រាន់នោះទេ ប៉ុន្តែវាដោយសារតែពួកគេអង្គុយយូរផងដែរ។ នេះបង្ហាញថា អ្នកអង្គុយយូរប៉ុណ្ណា, ពេលដែលអ្នកនឹងធ្វើលំហាត់ប្រាណគឺតិចប៉ុនហ្នឹង។
ការស្រាវជ្រាវត្រូវបានចេញផ្សាយថ្មីៗនៅក្នុងកាសែត International Journal of Behavioral Nutrition and Physical Activity៕