ការស្រាវជ្រាវ​ថ្មី​មួយ​បាន​និយាយថា ការ​មាន​អារម្មណ៍​មិន​សប្បាយចិត្ត និង​ធុញថប់​ជា​ញឹកញាប់​អំពី​ទំនាក់ទំនង​ស្នេហា​អាច​ប៉ះពាល់​ដល់​សុខភាព​របស់​អ្នក​។​​អ្នកស្រាវជ្រាវ​បាន​និយាយថា អារម្មណ៍​អាច​ជម្រុញ​កម្រិត​នៃ​ស្ត្រេ​ស​អរ​ម៉ូ​ន និង​បន្ថយ​ប្រព័ន្ធ​ភាពស៊ាំ​របស់​អ្នក​។​
​លីហ្សា ចា​រ៉េ​ម​កា (Lisa Jaremka) បាន​និយាយថា ចំពោះ​ការស្រាវជ្រាវ​របស់​ពួកគេ​, គូស្នេហ៍​រៀបការ​រួច​ដែល​ជារឿយៗ​មាន​អារម្មណ៍​ធុញថប់​អំពី​ទំនាក់ទំនង​ស្នេហា​របស់​ពួកគេ ដែល​ឆ្ងល់​ថា​តើ​ដៃគូរ​របស់​ពួកគេ​ស្រលាញ់​ពួកគេ​ពិត​ឬ​យ៉ាងណា​នោះ មាន​កម្រិត​ខ្ពស់​នៃ​ស្ត្រេ​ស​អរ​ម៉ូ​ន​ដែល​ត្រូវបាន​គេ​ស្គាល់​ថា​អរ​ម៉ូ​ន​ករទី​ស៊ុល និង​ធ្វើអោយ​កម្រិត​នៃ​កោសិកា T មាន​ការថយចុះ​ដែល​វា​មាន​មុខងារ​សំខាន់​ចំពោះ​ប្រព័ន្ធ​ភាពស៊ាំ​ដើម្បី​ប្រយុទ្ធប្រឆាំង​នឹង​ការឆ្លង​មេរោគ​។​

​ចា​រ៉េ​មកា​បាន​និយាយថា ការបារម្ភ​ទាំងនេះ និង​ថា​តើ​អ្នក​ត្រូវបាន​ដៃគូរ​យកចិត្តទុកដាក់​ពិត​នោះ​អាច​ប៉ះពាល់​អវិជ្ជមាន​ដល់​សុខភាព​។ ​ការស្រាវជ្រាវ​ត្រូវបាន​ចេញ​ផ្សាយ​ថ្មីៗ​នៅក្នុង Psychological Science​។​​ចា​រ៉េ​មកា​បាន​និយាយថា អ្នក​គ្រប់​គ្នា​ជួនកាល​មានគំនិត និង​អារម្មណ៍​ទាំងនេះ​។ វា​គឺជា​ផ្នែក​មួយ​នៃ​ធម្មជាតិ​អំពី​ទំនាក់ទំនង​ស្នេហា​នោះ​។​​គាត់​បាន​និយាយថា ប៉ុន្តែ​ចំពោះ​ការ​ធុញថប់​ខ្លាំងពេក​, វា​អាច​អោយ​វិវត្ត​ទៅ​ជា​រ៉ាំរ៉ៃ​។​

​ចា​រ៉េ​មកា​បាន​ស្រាវជ្រាវ​លើ​គូស្នេហ៍​៨៥​គូ​, ដែល​បាន​រៀប​អាពាហ៍ពិពាហ៍​ជា​មធ្យម​បាន​រយៈពេល​១២​ឆ្នាំ​។ អាយុ​របស់​ពួកគេ​ជា​មធ្យម​គឺ​៣៩​ឆ្នាំ​។ គ្រប់​ដៃគូរ​ទាំងអស់​បាន​ធ្វើ​សេចក្តីរាយការណ៍​ពី​កម្រិត​នៃ​ការ​ថប់​បារម្ភ​ធម្មតា និង​រោគសញ្ញា​, ហើយ​បាន​ឆ្លើយ​សំណួរ​អំពី​ការរៀប​អាពាហ៍ពិពាហ៍ និង​អំពី​បញ្ហា​សិច​របស់​ពួកគេ​។​​ជាទូទៅ គូរ​ស្នេហ៍​ទាំងនោះ​គឺ​មាន​សុខភាព​ល្អ​។ អ្នក​មាន​ប្រពន្ធ​ដែល​កំពុង​តែ​រំពឹង​ចង់​បាន​កូន​, ឬ​ដែល​ផឹកស្រា ឬ​កាហ្វេ​អ៊ី​ន​ច្រើន ឬ​មាន​បញ្ហា​សុខភាព​ដែល​ប៉ះពាល់​នឹង​ប្រព័ន្ធ​ភាពស៊ាំ មិន​ត្រូវបាន​គេ​យក​មក​ស្រាវជ្រាវ​នោះទេ​។​

​គូរ​ស្នេហ៍​ទាំងអស់​បាន​ផ្តល់​គម្រូ​នៃ​ទឹកមាត់​ចំនួន​៣​ថ្ងៃ និង​គម្រូ​នៃ​ឈាម​ចំនួន​២​ដង​។ បន្ទាប់មក​, ក្រុម​អ្នកស្រាវជ្រាវ​បាន​វាស់​ពី​កម្រិត​នៃ​អរ​ម៉ូ​នករ​ទី​ស៊ុល និង​កោសិកា T ។​អ្នកចូលរួម​ដែល​មាន​កម្រិត​នៃ​ការ​ធុញថប់​ខ្លាំង​អំពី​ជីវិត​រៀប​អាពាហ៍ពិពាហ៍​របស់​ពួកគេ​បាន​ផលិត​អរ​ម៉ូ​នករ​ទី​ស៊ុល​ប្រហែល​១១%​ច្រើន​ជាង​អ្នក​ដែល​មាន​កម្រិត​នៃ​ការ​ធុញថប់​តិច​។ ប្តី​ប្រពន្ធ​ដែល​មាន​កម្រិត​នៃ​ការ​ធុញថប់​ខ្លាំង​មាន​ចន្លោះ​ពី​១១% ទៅ​២២%​នៃ​ការថយចុះ​កម្រិត​នៃ​កោសិកា T ជាង​អ្នក​ដែល​មាន​ការ​ធុញថប់​តិច​។​

​ចា​រ៉េ​មកា​បាន​និយាយថា ខណៈពេល​ដែល​ការស្រាវជ្រាវ​មិន​បង្ហាញ​ថា​តើ​ដៃគូរ​ដែល​ធុញថប់​ខ្លាំង​នឹង​ឈឺ​ជារឿយៗ​ក៏ដោយ​, ប៉ុន្តែ​ការផ្សារភ្ជាប់​គ្នា​នេះ​អាច​ជា​ហេតុផល​សមស្រប​មួយ​។​​គាត់​បាន​និយាយថា ផលវិបាក​អវិជ្ជមាន​ជាច្រើន​នៃ​ការកើនឡើង​អរ​ម៉ូ​ន​ករទី​ស៊ុល​គឺ​លើស​ពី​ជំងឺ​ផ្តាសាយ​ធម្មតា​។ គាត់​បន្ថែម កម្រិត​ខ្ពស់​នៃ​អរ​ម៉ូ​ន​នេះ​ត្រូវបាន​ផ្សារភ្ជាប់​ទៅ​នឹង​បញ្ហា​បេះដូង​, បញ្ហា​ដំណេក​, ជំងឺ​ធ្លាក់​ទឹកចិត្ត និង​បញ្ហា​ដទៃទៀត​។​​អ្នកឯកទេស​ដទៃទៀត​ដែល​បាន​ស្រាវជ្រាវ​ពី​បញ្ហា​នេះ​ក៏​បាន​និយាយថា ទំនាក់ទំនង​រវាង​ការ​ថប់​បារម្ភ និង​ស្ត្រេ​សគឺ​មិនមែនជា​រឿង​ថ្មី​នោះទេ ប៉ុន្តែ​ការផ្សារភ្ជាប់​ទៅកាន់​មុខងារ​នៃ​ប្រព័ន្ធ​ភាពស៊ាំ​គឺជា​រឿង​មួយ​ថ្មី​។

​ចា​រ៉េ​មកា​បាន​និយាយថា អ្នក​ដែល​មាន​ការ​ធុញថប់​ចំពោះ​ទំនាក់ទំនង​ស្នេហា​គួរតែ​បន្ថូរ​អារម្មណ៍​ដើម្បី​បន្ថយ​ភា​ពស្ត្រេ​ស​របស់​ពួកគេ​។ គាត់​បាន​បន្ថែមថា សូម​បន្ថយ​ស្ត្រេ​ស​ដោយ​ការធ្វើយូ​ហ្គា ឬ​លំ​ហាត់ប្រាណ​ដទៃទៀត​។​​ជេ​នី ប៊ួរ​នេ​ត (Jeni Burnette) ជា​សាស្ត្រាចារ្យ​រង​ខាង​ផ្នែក​ចិត្តសាស្ត្រ​នៅ​សាកលវិទ្យាល័យ Richmond បាន​និយាយថា ដៃគូរ​ដែល​ធុញថប់​ខ្លាំង ត្រូវតែ​ព្យាយាម​អត់អោន​អោយ​គ្នា និង​មិន​គួរ​ទុក​បញ្ហា​នៅក្នុង​ចិត្ត​នោះ​ទេ​ដូចជា ការឈ្លោះគ្នា​ជាដើម​។ គាត់​បាន​បន្ថែមថា ការស្រាវជ្រាវ​របស់​យើង​បានបង្ហាញ​ថា បុគ្គល​ដែល​មាន​ការ​ធុញថប់​គឺ​មិនសូវ​ជា​ចេះ​អធ្យាស្រ័យ​គ្នា និង​ទំនោរ​ជា​ឆ្លើយតប​ជាមួយនឹង​ការចង់​ឈ្នះ​ទៅវិញ​៕